កៀវ៖ បើតាមការចេញផ្សាយដោយទីភ្នាក់ងារសារព័ត៌មាន Reuters ដៃស្ដាំរបស់ប្រធានាធិបតី លោក វ៉ូឡូឌីមៀ ហ្សេលេនស្គី និងជាប្រធានក្រុមដឹកនាំកិច្ចចរចាអំពីផែនការសន្តិភាពគាំទ្រដោយសហរដ្ឋអាមេរិក ខាងភាគីអ៊ុយក្រែន លោក Andriy Yermak បានលាលែងចេញតំណែង កាលពីថ្ងៃសុក្រ ទី២៨ ខែវិច្ឆិកា ប៉ុន្មានម៉ោងប៉ុណ្ណោះបន្ទាប់ពីទីភ្នាក់ងារប្រឆាំងអំពើពុករលួយចុះឆែកឆេរផ្ទះរបស់លោក។
ការស៊ើបអង្កេតពីអំពើពុករលួយពាក់ព័ន្ធនឹងមន្ត្រីជាន់ខ្ពស់អ៊ុយក្រែន ដែលធ្វើឡើងចំពេលអ៊ុយក្រែនកំពុងតស៊ូប្រយុទ្ធជាមួយរុស្ស៉ីបាន និងកំពុងបង្កការខឹងសម្បាយ៉ាងខ្លាំងនៅក្នុងចំណោមប្រជាជនអ៊ុយក្រែន និងដាក់សម្ពាធបន្ថែមលើរដ្ឋាភិបាលរបស់លោក ហ្សេលេនស្គីឱ្យធ្លាក់ចូលក្នុងវិបត្តិចំពោះមុខការដាក់សម្ពាធពីទីក្រុងវ៉ាស៊ីនតោនឱ្យទីក្រុងកៀវទទួលយកកិច្ចព្រមព្រៀងសន្តិភាពជាមួយរុស្ស៉ី។
នៅក្នុងសុន្ទរកថាជាវីដេអូមួយកាលពីថ្ងៃសុក្រ លោក ហ្សេលេនស្គីក៏បានលើកឡើងដែរថា «រុស្ស៉ីចង់ឱ្យអ៊ុយក្រែនបង្កើតកំហុស។ ប៉ុន្តៃយើងនឹងមិនបង្កើតកំហុសណាមួយនោះទេ ហើយការតស៊ូរបស់យើងនៅតែបន្ត»។
គួរបញ្ជាក់ថា លោក Andriy Yermak គឺជាមិត្តជិតស្និទ្ធម្នាក់របស់លោក ហ្សេលេនស្គី តាំងតែពីរូបលោកនៅជាតារាកំប្លែងមកម្ល៉េះ។ លោក Yermak ផ្ទាល់បានទទួលស្គាល់ថាផ្ទះរបស់លោកពិតត្រូវបានឆែកឆេរពិតមែន ហើយ លោកក៏បានផ្ដល់កិច្ចសហប្រតិបត្តិការដែរ។
ទីភ្នាក់ងារប្រឆាំងអំពើពុករលួយអ៊ុយក្រែនបានបើកការស៊ើបអង្កេតលើការចោទប្រកាន់ពីការស៊ីដាច់លុយជាង ១០០លានដុល្លារ ក្នុងក្រុមហ៊ុនថាមពលអាតូមិកមួយរបស់រដ្ឋដែលត្រូវបាន ចោទថាមានជាប់ពាក់ព័ន្ធនឹងអតីតមន្ត្រីជាន់ខ្ពស់ និងអតីតដៃគូរកស៊ីរបស់លោក ហ្សេលេនស្គី៕
លោក Yermak មិនត្រូវបានកត់ឈ្មោះបញ្ចូលជាជនសង្ស័យនោះទេ តែក្រុមសកម្មជន និងសមាជិកសភាបក្សប្រឆាំង រួមទាំង ក្រុមមន្ត្រីខ្លះក្នុងជួរគណបក្សរបស់លោក ហ្សេលេនស្គីបានអំពាវនាវឱ្យលោកចុះចេញពីតំណែងដោយនិយាយថាវត្តមានរបស់លោកកំពុងបំផ្លាញដល់អំណាចចរចារបស់អ៊ុយក្រែន៕
