ក្រុមហ៊ុនថាមពលរដ្ឋ Pertamina របស់ឥណ្ឌូណេស៉ី បង្កើនកិច្ចខិតខំប្រឹងប្រែង ផលិតប្រេងឥន្ធនៈកាបូនទាបសម្រាប់យន្តហោះ

CILACAP៖ បើយោងតាមការចេញផ្សាយដោយទីភ្នាក់ងារសារព័ត៌មាន CNA នៅថ្ងៃពុធ ទី២៦ ខែវិច្ឆិកា ឆ្នាំ ២០២៥ ក្រុមហ៊ុនថាមពលរដ្ឋ Pertamina របស់ឥណ្ឌូណេស៉ី បានបង្កើនកិច្ចខិតខំប្រឹងប្រែង ផលិតប្រេងឥន្ធនៈកាបូនទាបសម្រាប់យន្តហោះ ដែលជាផ្នែកមួយនៃការជំរុញ ដើម្បកាត់បន្ថយការបញ្ចេញកាបូនពីការធ្វើដំណើរតាមផ្លូវអាកាស។

ក្រុមហ៊ុន Pertamina គ្រោងពង្រីកសមត្ថភាពផលិតកម្ម នៅរោងចក្រចម្រាញ់ប្រេងដែលមានស្រាប់ ហើយកំពុងស្វែងរកលទ្ធភាពសង់រោងចក្រចម្រាញ់ថាមពលបៃតងថ្មី។

បច្ចុប្បន្ន គម្រោងប្រេងឥន្ធនៈយន្តហោះប្រកបដោយនិរន្តរភាព (SAF) ដំណើរការនៅរោងចក្រចម្រាញ់ប្រេងរបស់ក្រុមហ៊ុនក្នុងទីក្រុង Cilacap ភាគកណ្តាលខេត្ត Java ហើយក្រុមហ៊ុនក៏កំពុងអភិវឌ្ឍ ឬរៀបចំផែនការសមត្ថភាពរោងចក្រចម្រាញ់ថាមពលបៃតង ដើម្បីផលិតឥន្ធនៈប្រភេទនេះ នៅតាមរោងចក្ររបស់ខ្លួន នៅខេត្ត South Sumatra, Riau, West Java និង East Kalimantan។ រដ្ឋាភិបាលឥណ្ឌូណេស៉ី ចង់ឱ្យគម្រោង SAF ទូទាំងប្រទេស រួមចំណែកសម្រាប់ការហោះហើរអន្តរជាតិដល់ ៥ភាគរយ នាឆ្នាំ២០៣៥៕