តំបន់ប្រតិបត្តិការសឹករងឧត្តរមានជ័យ បន្តយកចិត្តទុកដាក់លើការងារអប់រំ នយោបាយចិត្តសាស្រ្តដល់កងទ័ព នៅតាមបណ្តាកងឯកភាពចំណុះ
ភ្នំពេញ៖ ផ្អែកលើផែនការយុទ្ធសាស្រ្តការពារជាតិ លើផ្នែកហ្វឹកហ្វឺន និងអប់រំបណ្តុះបណ្តាលដើម្បីលើកកម្ពស់សមត្ថភាព ចំណេះដឹង និងជំនាញបន្ថែមដល់យោធិនគ្រប់ថ្នាក់ នៅថ្ងៃទី២៩ ខែមិថុនា ឆ្នាំ២០២២ លោកវរសេនីយ៍ឯក ឡុង ណៃ មេបញ្ជាការរង តំបន់ប្រតិបត្តិការសឹករងឧត្តរមានជ័យ បានដឹកនាំក្រុមការងារ បន្តចុះផ្សព្វផ្សាយគោលនយោបាយការពារជាតិ ឆ្នាំ២០២២ (សៀវភៅសការពារជាតិ ឆ្នាំ២០២២) ជូននាយទាហាន-ពលទាហាននៅទីបញ្ជាការ ផ្នែកសឹករងអន្លង់វែង។
គូសបញ្ជាក់ថា សៀវភៅសការពារជាតិ ឆ្នាំ២០២២ ជាឯកសារថ្នាក់ជាតិ រៀបរៀងចងក្រងដោយក្រសួងការពារជាតិនៃព្រះរាជាណាចក្រកម្ពុជា ដែលឆ្លុះបញ្ចាំងអំពីទស្សនវិស័យ គោលនយោបាយ និងយុទ្ធសាស្រ្តរបស់រាជរដ្ឋាភិបាលលើវិស័យការពារជាតិនាពេលបច្ចុប្បន្ន និងតទៅអនាគត ដោយផ្អែកលើការវិភាគ ការគិតគូរយ៉ាងហ្មត់ចត់ និងយកចិត្តទុកដាក់ជាទីបំផុត។
គោលបំណងសំខាន់នៃសៀវភៅសការពារជាតិ ឆ្នាំ២០២២នេះ គឺដើម្បីផ្សព្វផ្សាយអំពីការពង្រឹង និងអភិវឌ្ឍវិស័យការពារជាតិរបស់កងយោធពលខេមរភូមិន្ទ។ ក្នុងនោះដែរ ឯកសារនេះបានបង្ហាញអំពីការរៀបចំផែនការយុទ្ធសាស្រ្ត ការធ្វើកំណែទម្រង់យោធា និងការកសាងសមត្ថភាពកងយោធពលខេមរភូមិន្ទឱ្យក្លាយជាកងកម្លាំងការពារជាតិដ៏រឹងមាំមួយ មានវិន័យម៉ឺងម៉ាត់ មានសមត្ថភាព មានការប្តេជ្ញាចិត្តខ្ពស់ និងស្មោះត្រង់ចំពោះជាតិមាតុភូមិ ព្រមទាំងត្រៀមខ្លួនជាប់ជានិច្ចក្នុងកិច្ចការពារសន្តិភាព សន្តិសុខ ស្ថិរភាព សុវត្ថិភាពសង្គម ព្រមទាំងរួមចំណែកក្នុងការអភិវឌ្ឍជាតិ និងលើកតម្កើងកិត្យានុភាពរបស់អង្គភាព និងព្រះរាជាណាចក្រកម្ពុជានៅ លើឆាកអន្តរជាតិ។
លោកវរសេនីយ៍ឯក មេបញ្ជាការ ក៏បានជំរុញឱ្យសិក្ខាកាមទាំងអស់យកចិត្តទុកដាក់សិក្សាស្វែងយល់បន្ថែមទៀតលើកឯកសារគោលនយោបាយការពារជាតិ ឆ្នាំ២០២២ ដើម្បីទទួលបាននូវចំណេះដឹងថ្មីៗបន្ថែម ព្រមទាំងក្រើនរម្លឹកឱ្យបន្តអនុវត្តតាមវិធានការរបស់សម្តេចតេជោគឺ ៣ការពារ និង៣កុំ ឱ្យបានជាប់លាប់ល្អផងដែរ ៕
