ឧត្តមសេនីយ៍ឯក ពៅ ហេង អញ្ជើញជាអធិបតីភាពក្នុងពិធីអបអរសាទរខួបអនុស្សាវរីយ៍លើកទី៧២ ទិវាបុណ្យឯករាជ្យជាតិ និងថ្ងៃកំណើតកងយោធពលខេមរភូមិន្ទ
សៀមរាប៖ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ នៅព្រឹកថ្ងៃទី៩ ខែវិច្ឆិកា ឆ្នាំ២០២៥ អញ្ជើញជាអធិបតីភាពក្នុងពិធីអបអរសាទរខួបអនុស្សាវរីយ៍លើកទី៧២ ទិវាបុណ្យឯករាជ្យជាតិ (៩ វិច្ឆិកា ១៩៥៣-៩ វិច្ឆិកា ២០២៥) និងថ្ងៃកំណើតកងយោធពលខេមរភូមិន្ទ នៅក្នុងបរិវេណវិមានរំលឹកគុណអតីតវីរៈយុទ្ធជន យុទ្ធនារី នៃខេត្តសៀមរាប ព្រមទាំងមានការអញ្ជើញចូលរួមពីក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំកងកម្លាំងប្រដាប់អាវុធទាំងបីប្រភេទ មន្ទីរ ស្ថាប័ននានា រួមជាមួយអាជ្ញាធរដែនដីក្រុងស្រុក និងសិស្សានុសិស្ស បានចូលដាក់កំរងផ្កា អុជធុក និងគោរពវិញ្ញាណក្ខន្ធអតីតវីរៈយុទ្ធជន យុទ្ធនារី ជាវីរៈបុរស អ្នកស្នេហាជាតិដែលបានពលីជីវិតដើម្បីបុព្វហេតុជាតិមាតុភូមិ និងប្រជាជន ក្នុងសម័យសង្គ្រាមផងដែរ។
សូមបញ្ជាក់ផងដែរថា ជារៀងរាល់ឆ្នាំព្រះរាជាណាចក្រកម្ពុជាតែងតែប្រារព្ធពិធីអបអរសាទរខួបអនុស្សាវរីយ៍ទិវាបុណ្យឯករាជ្យជាតិ និងថ្ងៃកំណើតកងយោធពលខេមរភូមិន្ទ ដើម្បីរំលឹកពីព្រះរាជបូជនីកិច្ចដ៏ឧត្តុងឧត្តមរបស់ព្រះករុណាព្រះបាទសម្ដេចព្រះ នរោត្តម សីហនុ ព្រះមហាក្សត្រនៃព្រះរាជាណាចក្រកម្ពុជា ព្រះបរមរតនកោដ្ឋ ដែលព្រះអង្គបានលះបង់ព្រះកាយពលមិនខ្លាចនឿយហត់ ដើម្បីទាមទារយកមកវិញនូវឯករាជ្យជាតិ ពេញលេញពីពួកអាណានិគមនិយមបារាំងសេស នៅថ្ងៃទី៩ ខែវិច្ឆិកា ឆ្នាំ១៩៥៣ នឹងបានបង្កើតកងយោធពលខេមរភូមិន្ទ ដើម្បីការពារឯករាជ្យជាតិ អធិបតេយ្យភាពជាតិ។ សូមថ្លែងនូវការដឹងគុណចំពោះកងយោធពលខេមរភូមិន្ទ និងកងកម្លាំងប្រដាប់អាវុធទាំងអស់ ដែលបានលះបង់សាច់ស្រស់ឈាមស្រស់ និងបានរួមចំណែកជាមួយសម្ដេចតេជោ ហ៊ុន សែន ក្នុងការអនុវត្តនូវនយោបាយឈ្នះឈ្នះ ដែលនាំមកនូវសុខសន្តិភាពពេញលេញដូចសព្វថ្ងៃនេះ។
កងយោធពលខេមរភូមិន្ទ និយាយរួម និងនិយាយដោយឡែកឧត្តមសេនីយ៍ឯក ពៅ ហេង រួមជាមួយកងកម្លាំងទាំងអស់ នៃយោធភូមិភាគទី៤ កងទ័ពជើងគោក សូមប្តេជ្ញាចិត្តការពារឱ្យបាននូវបូរណភាពទឹកដី មិនឲ្យខ្មាំងសត្រូវឈ្លានពានបានជាដាច់ខាត និងប្តេជ្ញាថែរក្សាការពារឲ្យបាននូវសុខសន្តិភាព ដែលកំពុងមានដូចបច្ចុប្បន្ននេះ ឱ្យនៅគង់វង្សជារៀងរហូត និងបានប្តេជ្ញាចិត្តការពារជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោតឱ្យបានដាច់ខាត៕
