ប៉ូឡូញ ព្រមានលោក ពូទីន ប្រឆាំងនឹងការធ្វើដំណើរឆ្លងកាត់ដែនអាកាសរបស់ខ្លួន សម្រាប់កិច្ចប្រជុំកំពូលនៅប្រទេសហុងគ្រីជាមួយប្រធានាធិបតីអាមេរិក លោក ដូណាល់ ត្រាំ

វ៉ារស្សាវ៉ា៖ បើតាមការចេញផ្សាយដោយ ទីភ្នាក់ងារព័ត៌មាន Reuters ប៉ូឡូញ នៅថ្ងៃអង្គារនេះបានព្រមានប្រធានាធិបតីរុស្ស៉ី លោក វ៉្លាឌីមៀ ពូទីន ប្រឆាំងនឹងការធ្វើដំណើរឆ្លងកាត់ដែនអាកាសរបស់ខ្លួន សម្រាប់កិច្ចប្រជុំកំពូលមួយនៅប្រទេសហុងគ្រីជាមួយប្រធានាធិបតីអាមេរិក លោក ដូណាល់ ត្រាំ ដោយបញ្ជាក់ថា ខ្លួនអាចនឹងត្រូវបង្ខំឱ្យអនុវត្តដីកាចាប់ខ្លួនជាអន្តរជាតិ ប្រសិនបើលោកធ្វើដូច្នេះ។

លោក រ៉ាដូស្លរ ស៊ីគ័រស្គី (Radoslaw Sikorski) រដ្ឋមន្ត្រីការបរទេសប៉ូឡូញ បានថ្លែងថា «ខ្ញុំមិនអាចធានាបានទេថា តុលាការឯករាជ្យរបស់ប៉ូឡូញនឹងមិនបញ្ជាឱ្យរដ្ឋាភិបាលបង្ខំយន្តហោះនោះឱ្យចុះចត ដើម្បីឃាត់ខ្លួនជនសង្ស័យប្រគល់ឱ្យតុលាការនៅទីក្រុងឡាអេនោះឡើយ»។

ទោះជាយ៉ាងណា ជំហរនេះគឺផ្ទុយពីប្រទេសប៊ុលហ្គារី ដែលរដ្ឋមន្ត្រីការបរទេសរបស់ខ្លួនបានលើកឡើងថា នឹងយល់ព្រមអនុញ្ញាតឱ្យលោក ពូទីន ប្រើប្រាស់ដែនអាកាសរបស់ខ្លួន ប្រសិនបើកិច្ចប្រជុំកំពូលនេះអាចជួយនាំមកនូវសន្តិភាពនៅអ៊ុយក្រែន។

គួរបញ្ជាក់ថា តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនលោក ពូទីន ពីបទនិរទេសកុមារអ៊ុយក្រែនដោយខុសច្បាប់។ ដីកានេះតម្រូវឱ្យរដ្ឋជាសមាជិក ICC ទាំងអស់ត្រូវចាប់ខ្លួនលោក ពូទីន ប្រសិនបើលោកធ្វើដំណើរចូលក្នុងទឹកដីរបស់ពួកគេ៕