យោធាប៉ាគីស្ថានអះអាងថា សមាជិកក្រុមតាលីបង់ប្រហែល២០នាក់ ត្រូវបានសម្លាប់នៅអាហ្វហ្កានីស្ថាន អំឡុងការប៉ះទង្គិចគ្នាជាមួយកងកម្លាំងប៉ាគីស្ថាន
អ៉ីស្លាម៉ាបាដ៖ បើតាមការចេញផ្សាយដោយ ទីភ្នាក់ងារព័ត៌មាន AFP យោធាប៉ាគីស្ថានបានអះអាងថា សមាជិកក្រុមតាលីបង់ប្រហែល២០នាក់ ត្រូវបានសម្លាប់នៅអាហ្វហ្កានីស្ថាន អំឡុងការប៉ះទង្គិចគ្នាជាមួយកងកម្លាំងប៉ាគីស្ថាន ខណៈការប្រយុទ្ធគ្នានៅព្រំដែនរវាងប្រទេសជិតខាងទាំងពីរ បន្តដល់សប្តាហ៍ទី២។
យោធាប៉ាគីស្ថាន បានឱ្យដឹងក្នុងសេចក្តីថ្លែងការណ៍ថា ក្រុមតាលីបង់ដែលបច្ចុប្បន្នគ្រប់គ្រងប្រទេសអាហ្វហ្កានីស្ថាន បានវាយប្រហារមកលើ ទីតាំងចំនួន៤របស់ខ្លួន ហើយនៅពេលវាយបកទប់ទល់ការវាយប្រហារនោះ សមាជិកតាលីបង់អាហ្វហ្កានីស្ថានខ្ទង់១៥-២០នាក់ ត្រូវបានសម្លាប់និងជាច្រើននាក់ទៀតរងរបួស ខណៈស្ថានការណ៍កំពុងបន្តវិវត្តនៅឡើយ។
បើតាមយោធាប៉ាគីស្ថាន មិនតែប៉ុណ្ណោះ សមាជិកតាលីបង់ និងអ្នកប្រយុទ្ធដែលមានទំនាក់ទំនងជាមួយតាលីបង់ប្រហែល៣០នាក់ផ្សេងទៀត ក៏ត្រូវសង្ស័យថាបានស្លាប់ដូចគ្នា ក្នុងការប៉ះទង្គិចដាច់ដោយឡែក កាលពីវេលាយប់កន្លងទៅ នៅតំបន់ព្រំប្រទល់។
មុនការចេញសេចក្តីថ្លែងការណ៍របស់យោធាប៉ាគីស្ថាន អ្នកនាំពាក្យក្រុមតាលីបង់ បានអះអាងថា ជនស៉ីវិលយ៉ាងហោច១៥នាក់ ត្រូវបានសម្លាប់ និងប្រហែល១០០នាក់ទៀតបានរងរបួស ក្នុងការវាយប្រហារទៅលើអាហ្វហ្កានីស្ថាន នាថ្ងៃពុធនេះ ដោយកងកម្លាំងប៉ាគីស្ថាន នៅស្រុក Spin Boldak ភាគខាងត្បូងប្រទេសអាហ្វហ្កានីស្ថាន៕
