អ្នកចរចាពាណិជ្ជកម្មកំពូលកូរ៉េខាងត្បូង កំពុងស្ថិតនៅសហរដ្ឋអាមេរិក ដើម្បីស្វែងរកការសម្រេចបានជាចុងក្រោយនូវកិច្ចព្រមព្រៀង បញ្ចុះអត្រាពន្ធគយអាមេរិក ដែលដាក់ចេញកាលពីចុងខែកក្កដា

វ៉ាស៉ីនតោន៖ បើយោងតាមការចេញផ្សាយដោយទីភ្នាក់ងារសារព័ត៌មាន CNA នៅថ្ងៃព្រហស្បតិ៍ ទី១៨ ខែកញ្ញា ឆ្នាំ២០២៥ បានំ្យដឹងថា អ្នកចរចាពាណិជ្ជកម្មកំពូលកូរ៉េខាងត្បូង លោក Yeo Han-koo កំពុងស្ថិតនៅសហរដ្ឋអាមេរិក ក្នុងសប្តាហ៍នេះ ដើម្បីស្វែងរកការសម្រេចបានជាចុងក្រោយនូវកិច្ចព្រមព្រៀង បញ្ចុះអត្រាពន្ធគយអាមេរិក ដែលដាក់ចេញកាលពីចុងខែកក្កដា។

ភាពខ្វែងគំនិតគ្នាលើការអនុវត្តកិច្ចព្រមព្រៀង ពិសេសបញ្ហាប្តូររូបិយប័ណ្ណនៃមូលនិធិវិនិយោគ ៣៥០ពាន់លានដុល្លារ បានរារាំងភាគីទាំងពីរមិនឱ្យឈានដល់កិច្ចព្រមព្រៀងចុងក្រោយ។ ថ្មីៗនេះ ក្រសួងហិរញ្ញវត្ថុកូរ៉េខាងត្បូង បានឱ្យដឹងថា ខ្លួនកំពុងពិភាក្សាជាមួយទីក្រុងវ៉ាស៉ីនតោន រកវិធានការដើម្បីកំណត់ផលប៉ះពាល់ចំពោះកញ្ចប់វិនិយោគលើទីផ្សាររូបិយប័ណ្ណ ប៉ុន្តែបានបដិសេធធ្វើការបញ្ជាក់ ទាក់ទងនឹងបញ្ហាប្តូររូបិយប័ណ្ណ។

បើតាមប្រព័ន្ធផ្សព្វផ្សាយកូរ៉េខាងត្បូង កង្វះវឌ្ឍនភាពក្នុងកិច្ចចរចាពាណិជ្ជកម្ម នាំឱ្យមានការព្រួយបារម្ភអំពីភាពជាប់គាំង ខណៈទីក្រុងសេអ៊ូល ចង់ជំរុញឱ្យមានការបញ្ចុះពន្ធលើរថយន្ត ស្រដៀងនឹងអ្វីដែលសហរដ្ឋអាមេរិកផ្តល់ឱ្យជប៉ុន។

គួរបញ្ជាក់ថា អត្រាពន្ធរបស់សហរដ្ឋអាមេរិក លើរថយន្តកូរ៉េខាងត្បូងមានចំនួន ២៥ភាគរយ ដែលធ្វើឱ្យក្រុមហ៊ុនផលិតរថយន្តរបស់ពួកគេ ជួបផលវិបាក។ ទីក្រុងសេអ៊ូល និងទីក្រុង វ៉ាស៉ីនតោន កំពុងព្យាយាម ជួសជុលទំនាក់ទំនង តានតឹង ក្រោយការវាយឆ្មក់បង្រ្កាបជនអន្តោប្រវេសន៍របស់សហរដ្ឋអាមេរិក លើរោងចក្រ Hyundai-LG និងចាប់ខ្លួនជនជាតិកូរ៉េខាងត្បូងជាច្រើននាក់៕