ប៉ូឡូញបាញ់ទម្លាក់យន្តហោះគ្មានមនុស្សបើករបស់រុស្ស៊ី ដែលហោះជ្រែកចូលក្នុងដែនអាកាសរបស់ខ្លួន
វ៉ាសូវី៖ នាថ្ងៃពុធទី១០ ខែកញ្ញានេះ ប៉ូឡូញបានបាញ់ទម្លាក់យន្តហោះគ្មានមនុស្សបើករបស់រុស្ស៊ី ដែលបានហោះជ្រែកចូលក្នុងដែនអាកាសរបស់ខ្លួន កំលុងពេលវាយប្រហារនៅភាគខាងលិចប្រទេសអ៊ុយក្រែន ខណៈប្រទេសជាសមាជិកណាតូមួយនេះបានហៅការលុកលុយនេះថាជា «សកម្មភាពឈ្លានពាន»។
នាយករដ្ឋមន្ត្រីប៉ូឡូញ លោក ដូណាល់ ថាស់ (Donald Tusk) បានអះអាងថា ដែនអាកាសរបស់ប្រទេសប៉ូឡូញ ត្រូវបានរំលោភបំពានដោយយន្តហោះគ្មានមនុស្សបើករុស្ស៊ីមួយចំនួនធំ ដែលបង្កការគំរាមកំហែងដោយផ្ទាល់ តម្រូវឱ្យបាញ់ទម្លាក់។
លើសពីនេះ លោកបានសង្កត់ធ្ងន់ថា៖«យើងកំពុងដោះស្រាយជាមួយនឹងការញុះញង់ទ្រង់ទ្រាយធំ.យើងត្រៀមខ្លួនរួចជាស្រេចដើម្បីលុបបំបាត់ការបង្កហេតុបែបនេះ។ ស្ថានភាពនេះគឺធ្ងន់ធ្ងរ.យើងត្រូវរៀបចំសម្រាប់គ្រោងការណ៍ផ្សេងៗ»។
អ្នកនាំពាក្យអង្គការណាតូ បានអះអាងថា ប្រធានអង្គការណាតូ លោក ម៉ាក រ៉ូត (Mark Rutte) ទាក់ទងជាមួយថ្នាក់ដឹកនាំប៉ូឡូញ ហើយសម្ព័ន្ធភាពកំពុងពិគ្រោះយោបល់យ៉ាងជិតស្និទ្ធជាមួយប៉ូឡូញ លើរឿងរ៉ាវនេះ។ បញ្ជាការយោធារបស់ប្រទេសប៉ូឡូញបានបញ្ជាក់ថា យន្តហោះគ្មានមនុស្សបើកបានរំលោភដែនអាកាសប៉ូឡូញម្ដងហើយម្ដងទៀត ក្នុងអំឡុងពេលការវាយប្រហាររបស់រុស្ស៊ីឆ្លងកាត់ព្រំដែននៅភាគខាងលិចអ៊ុយក្រែន ប៉ុន្តែប្រតិបត្តិការប្រឆាំងនឹងការរំលោភទាំងនេះត្រូវបានបញ្ចប់ភ្លាមៗ ដោយមានការគាំទ្រពីបញ្ជាការដ្ឋានអាកាសរបស់អង្គការណាតូ និងយន្តហោះចម្បាំង F-35 របស់កងកម្លាំងអាកាសហូឡង់។ បញ្ជាការយោធាប៉ូឡូញបានបញ្ជាក់ថា៖«នេះគឺជាទង្វើនៃការឈ្លានពានដែលបានគំរាមកំហែងយ៉ាងពិតប្រាកដដល់សុវត្ថិភាពរបស់ប្រជាពលរដ្ឋរបស់យើង»។
គួរជម្រាបថា ចាប់តាំងពីសង្រ្គាមបានចាប់ផ្តើមនៅឆ្នាំ២០២២ មានឧប្បត្តិហេតុជាច្រើននៃយន្តហោះគ្មានមនុស្សបើករបស់រុស្ស៊ី ចូលទៅក្នុងដែនអាកាសនៃរដ្ឋជាប់ព្រំដែនអ៊ុយក្រែន រួមទាំងប៉ូឡូញ និងរូម៉ានី។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី អះអាងថា រុស្ស៊ីបានប្រើប្រាស់យន្តហោះគ្មានមនុស្សបើកចំនួន៤១៥គ្រឿង និងមីស៊ីល ៤០ដើម ក្នុងការវាយប្រហារលើប្រទេសអ៊ុយក្រែនពេញមួយយប់ ហើយយ៉ាងហោចណាស់មានយន្តហោះគ្មានមនុស្សបើកចំនួន៨គ្រឿង ហោះសំដៅទៅកាន់ប្រទេសប៉ូឡូញ។ ឧប្បត្តិហេតុការណ៍នេះ នាំឱ្យអាកាសយានដ្ឋាន Chopin ក្នុងរដ្ឋធានីវ៉ាសូវី ដែលជាអាកាសយានដ្ឋានធំបំផុតរបស់ប្រទេសប៉ូឡូញ បិទដែនអាកាសជាច្រើនម៉ោង មុនពេលបើកដំណើរការឡើងវិញ៕
