ឯកឧត្តម ថង សាវុន និងលោកជំទាវ ប្រារព្ធពិធីសុំសេចក្ដីសុខជូនកងទ័ពជួរមុខ និងជនភៀសសឹក ដែលលះបង់សាច់ស្រស់ឈាមស្រស់ ដើម្បីជាតិមាតុភូមិកម្ពុជា
មណ្ឌលគិរី៖ នារសៀលថ្ងៃទី៧ ខែសីហា ឆ្នាំ២០២៥ ឯកឧត្តម ថង សាវុន សមាជិកគណៈកម្មាធិការកណ្ដាល ប្រធានគណៈកម្មាធិការគណបក្សប្រជាជនកម្ពុជាខេត្តមណ្ឌលគិរី និងជាសមាជិកយុវជនគណបក្សថ្នាក់កណ្ដាល អនុប្រធានផ្នែកវប្បធម៌ និងសាសនា នៃយុវជនគណបក្សថ្នាក់កណ្ដាលបានដឹកនាំក្រុមការងារ បានអញ្ជើញចូលរួម ប្រារព្ធពិធីថ្វាយគ្រឿងសក្ការៈ និងបួងសួងសុំសេចក្តីសុខ សេចក្តីចម្រើន ជូនដល់បងប្អូនទាំងអស់ ជាពិសេស តាមថែរក្សាការពារ វីរកងទ័ពជួរមុខរបស់កម្ពុជាទាំងអស់ ទទួលបានជោគជ័យ លើពួកខ្មាំងឈ្លានពានលើដែនដីខ្មែរ ដែលបានរៀបចំពិធីដោយ លោកជំទាវ ហេង លីដែន ប្រធានកិត្តិយស នៃសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តមណ្ឌលគិរី និងសមាជិក សមាគមនារីជាច្រើនរូប ពិធីបួងសួងសុំសេចក្តីសុខនេះ ត្រូវបានប្រារព្ឋឡើងងនៅភ្នំដោះក្រមុំ ស្ថិតនៅក្នុង ក្រុងសែនមនោរម្យ ខេត្តមណ្ឌលគិរី។
ឯកឧត្តម ថង សាវុន និងលោកជំទាវ ហេង លីដែន បានបួងសួងដល់វត្ថុស័ក្តិសិទ្ធិក្នុងលោកគុណបុណ្យ ព្រះរតនត្រ័យ មានព្រះពុទ្ធ ព្រះធម៌ ព្រះសង្ឃ ទេវតាថែរក្សាព្រះស្វេតឆ័ត្រ ទេវតាថែរក្សាចក្រវាឡទាំង ទេវតាឆ្នាំម្សាញ់ តាមជួយអភិបាលប្រោសព្រំបីបាច់ថែរក្សា និងប្រសិទ្ធពរជ័យ ដល់សម្តេចទ្រង់ ឯកឧត្តម អស់លោក លោកស្រី អ្នកនាងកញ្ញា និងប្រជាពលរដ្ឋនៅទូទាំងប្រទេសបានសមប្រកបតែសេចក្តីសុខ សេចក្តីចម្រើន វិបុលសុខ ជៀសផុតពីជម្ងឺឧបទ្រពចង្រៃ ជៀសផុតពីគ្រោះធម្មជាតិផ្សេងៗ មានទេសចរណ៍ចូលមកទស្សនាកម្ពុជាកាន់តែច្រើន សូមឱ្យកងកម្លាំងប្រដាប់អាវុធឈរជើងជួរមុខតាមបន្ទាត់ព្រំដែនកម្ពុជា-ថៃមានសុខភាពល្អនិងទទួលបានជោគជ័យក្នុងការការពារបូរណភាពទឹកដី សូមឱ្យសម្រេចរាល់បំណងប្រាថ្នា ទទួលជោគជ័យគ្រប់ការងារ និងសម្រេចបាននូវវឌ្ឍនភាពថ្មីៗបន្តទៅទៀត៕
