យន្តហោះរបស់កងទ័ពអាកាសបង់ក្លាដែសមួយគ្រឿងបានធ្លាក់លើសាលាមួយក្នុងរដ្ឋធានីដាកា បានសម្លាប់មនុស្សយ៉ាងហោចណាស់២០នាក់

ដាកា៖ យន្តហោះរបស់កងទ័ពអាកាសបង់ក្លាដែសមួយគ្រឿងបានធ្លាក់លើសាលាមួយក្នុងរដ្ឋធានីដាកាកាលពីថ្ងៃចន្ទទី២១ ខែកក្កដា ដោយបានសម្លាប់មនុស្សយ៉ាងហោចណាស់២០ នាក់និង១៧១ នាក់បានរងរបួស។ នេះជាឧបទ្ទវហេតុផ្លូវអាកាសដ៏សាហាវបំផុតរបស់ប្រទេស។

យន្តហោះ F-7 BGI បានហោះឡើងនៅម៉ោង១ និង០៦ នាទីរសៀល ម៉ោងនៅក្នុងស្រុក ចេញមូលដ្ឋានទ័ពអាកាស។ វាជាផ្នែកមួយនៃបេសកកម្មហ្វឹកហ្វឺនជាប្រចាំ ប៉ុន្តែបានជួបប្រទះនឹងការបរាជ័យផ្នែកមេកានិច។

យោធាបានបញ្ជាក់ថា៖«អ្នកបើកយន្តហោះបានព្យាយាមកាច់ចង្កូតយន្តហោះគេចចេញឱ្យឆ្ងាយពីតំបន់ដែលមានប្រជាជនច្រើន ឆ្ពោះទៅកាន់ទីតាំងដែលមានមនុស្សរស់នៅតិច។

ទោះបីជាមានការខិតខំប្រឹងប្រែងអស់ពីសមត្ថភាពក៏ដោយ យន្តហោះ… បានធ្លាក់លើអគារកម្ពស់ពីរជាន់ក្នុងបរិវាណសាលា»។ អ្នកបើកយន្តហោះស្ថិតក្នុងចំណោមអ្នកស្លាប់ក្នុងឧបទ្ទវហេតុនេះ។ គណៈកម្មាធិការមួយត្រូវបានបង្កើតឡើង ដើម្បីស៊ើបអង្កេតមូលហេតុរបស់វា។

កងកម្លាំងប្រដាប់អាវុធបង់ក្លាដែសបានបង្ហាញថា អ្នករងរបួសភាគច្រើនជាសិស្សដែលកំពុងសម្រាកព្យាបាលនៅមន្ទីរពេទ្យ។រដ្ឋាភិបាលបានប្រកាសថ្ងៃកាន់ទុក្ខ និងការអធិដ្ឋានពិសេស។ មេដឹកនាំបណ្ដោះអាសន្នរបស់ប្រទេសនេះ លោក មូហាំម៉ាត់ យូនុស បានសរសេរនៅក្នុងសារបង្ហោះនៅលើបណ្តាញសង្គម X ថា៖«ខ្ញុំសម្ដែងនូវទុក្ខសោកយ៉ាងជ្រាលជ្រៅចំពោះឧប្បត្តិហេតុសោកនាដកម្មនៃអ្នកស្លាប់ និងរបួសដែលបណ្ដាលមកពីការធ្លាក់យន្តហោះ»។

មេដឹកនាំបណ្ដោះអាសន្នរូបនេះបានបន្ថែមថា៖«នេះគឺជាពេលវេលាដ៏ឈឺចាប់សម្រាប់ប្រទេសជាតិ។ ខ្ញុំសូមបួងសួងឱ្យអ្នករបួសឆាប់ជាសះស្បើយ និងបញ្ជាឱ្យអាជ្ញាធរពាក់ព័ន្ធទាំងអស់ រួមទាំងមន្ទីរពេទ្យ ដោះស្រាយស្ថានការណ៍ជាអាទិភាពបំផុត»។

យន្តហោះ F-7 BGI គឺជាប្រភេទយន្តហោះចុងក្រោយ និងទំនើបបំផុតនៅក្នុងត្រកូលយន្តហោះ Chengdu J-7 របស់ប្រទេសចិន។ ឧបទ្ទវហេតុនេះកើតឡើងក្នុងរយៈពេលជាងមួយខែបន្ទាប់ពីយន្តហោះ Air India បានធ្លាក់ពីលើផ្ទះស្នាក់របស់សិស្សមហាវិទ្យាល័យវេជ្ជសាស្ត្រក្នុងទីក្រុង Ahmedabad ប្រទេសឥណ្ឌាដែលនៅជិតខាងបង់ក្លាដែស ដោយបានសម្លាប់មនុស្ស២៤១ នាក់ក្នុងចំណោមមនុស្ស២៤២ នាក់នៅលើយន្តហោះ និង១៩ នាក់នៅលើដី ដែលជាការកត់សម្គាល់ពីគ្រោះមហន្តរាយអាកាសចរណ៍ដ៏អាក្រក់បំផុតរបស់ពិភពលោកក្នុងរយៈពេលមួយទសវត្សរ៍៕