ក្រសួងការបរទេសចិន៖ អាម៉េរិក បានបំភ្លៃការពិតប្រវត្តិសាស្ត្រ និងវាយប្រហារប្រព័ន្ធនយោបាយរបស់ប្រទេសចិន នៅក្នុងសាររំឭកដល់ការតវ៉ានៅទីលានធានអានមេនក្នុងឆ្នាំ១៩៨៩
ចិន៖ ក្រសួងការបរទេសចិន នៅថ្ងៃទី៤ ខែមិថុនា បានលើកឡើងថា សហរដ្ឋអាម៉េរិក បានបំភ្លៃការពិតប្រវត្តិសាស្ត្រ និងវាយប្រហារប្រព័ន្ធនយោបាយរបស់ប្រទេសចិន នៅក្នុងសាររំឭកដល់ការតវ៉ានៅទីលានធានអានមេនក្នុងឆ្នាំ១៩៨៩។
អ្នកនាំពាក្យរបស់ក្រសួងចិន លោក លីន ជៀន បានថ្លែងយ៉ាងដូច្នេះថា៖«សេចក្តីថ្លែងការណ៍ខុសពីភាគីអាម៉េរិក មានចេតនាបំភ្លៃការពិតជាប្រវត្តិសាស្ត្រ និងវាយប្រហារដោយចេតនាលើប្រព័ន្ធនយោបាយ និងផ្លូវអភិវឌ្ឍន៍របស់ប្រទេសចិន និងជ្រៀតជ្រែកយ៉ាងធ្ងន់ធ្ងរនៅក្នុងកិច្ចការផ្ទៃក្នុងរបស់ប្រទេសចិន។ ភាគីចិន មិនពេញចិត្តយ៉ាងខ្លាំងចំពោះរឿងនេះ ហើយប្រឆាំងយ៉ាងម៉ឺងម៉ាត់ចំពោះបញ្ហានេះ។ យើងបានដាក់ការតវ៉ាយ៉ាងឱឡារិកជាមួយភាគីអាម៉េរិក»។
លោកបន្ថែមថា៖«ទាក់ទងនឹងភាពចលាចលនយោបាយ ដែលបានកើតឡើងនៅចុងទសវត្សរ៍ឆ្នាំ១៩៨០ រដ្ឋាភិបាលចិន បានសន្និដ្ឋានយ៉ាងច្បាស់លាស់ថា ផ្លូវនៃសង្គមនិយមចិន គឺជាជម្រើសនៃប្រវត្តិសាស្ត្រ និងប្រជាជន»។
ប្រតិកម្មរបស់មហាយក្សចិន កើតឡើងបន្ទាប់ពីរដ្ឋមន្រ្តីក្រសួងការបរទេសអាម៉េរិក លោក ម៉ាកូ រូប៊ីអូ កោតសរសើរចំពោះភាពក្លាហានរបស់ប្រជាជនចិន ដែលត្រូវបានសម្លាប់នៅក្នុងការបង្រ្កាបដ៏បង្ហូរឈាមនោះ។
លោក រូប៊ូអូ បានថ្លែងយ៉ាងដូច្នេះថា៖«ថ្ងៃនេះយើងរំឭកដល់ភាពក្លាហានរបស់ប្រជាជនចិន ដែលត្រូវបានសម្លាប់ ខណៈពួកគេបានព្យាយាមអនុវត្តសេរីភាពជាមូលដ្ឋានរបស់ពួកគេ ក៏ដូចជាអ្នកដែលបន្តរងការបៀតបៀននៅពេលពួកគេស្វែងរកការទទួលខុសត្រូវ និងយុត្តិធម៌សម្រាប់ព្រឹត្តិការណ៍ថ្ងៃទី៤មិថុនា ឆ្នាំ១៩៨៩»។
លោកបន្តថា៖«គណបក្ស កុម្មុយនីស្ដ ចិន ព្យាយាម យ៉ាង សកម្ម ដើម្បី លាក់បាំងការពិត ប៉ុន្តែ ពិភពលោក នឹង មិន ភ្លេច ឡើយ»។
គួររំឭកថា នៅថ្ងៃទី៤មិថុនា ឆ្នាំ១៩៨៩ រថក្រោះចិនបានបើកចូលក្នុងទីលានធានអានមេនកណ្តាលរដ្ឋធានីប៉េកាំង ហើយកងទ័ពបានបើកការបាញ់ប្រហារដើម្បីបង្ក្រាបបាតុកម្មគាំទ្រលទ្ធិប្រជាធិបតេយ្យ។ បក្សកុម្មុយនីស្ដចិន មិនដែលបញ្ចេញចំនួនអ្នកស្លាប់ទេ តែក្រុមសិទ្ធិមនុស្ស និងសាក្សីអះអាងថា តួលេខនេះអាចកើនដល់រាប់ពាន់នាក់។ ព្រឹត្តិការណ៍កើតឡើងនៅចំកណ្តាលរដ្ឋធានីប៉េកាំង នៅថ្ងៃទី៤មិថុនា ឆ្នាំ១៩៨៩ មិនត្រូវបានពិភាក្សាជាសាធារណៈនៅក្នុងប្រទេសចិនទេ៕
