ប៉ាគីស្ថាន យល់ព្រមធ្វើឱ្យពាណិជ្ជកម្ម និងការវិនិយោគកាន់តែស៊ីជម្រៅជាមួយមហាយក្សចិន
ប៉េកាំង៖ រដ្ឋមន្ត្រីការបរទេសប៉ាគីស្ថាន លោក អ៊ីហ្សាក ដា (Ishaq Dar) បានបញ្ជាក់ថា ប៉ាគីស្ថានបានយល់ព្រមធ្វើឱ្យពាណិជ្ជកម្ម និងការវិនិយោគកាន់តែស៊ីជម្រៅជាមួយមហាយក្សចិន។
រដ្ឋមន្ត្រីការបរទេសប៉ាគីស្ថាន លោក អ៊ីហ្សាក ដា (Ishaq Dar) បានជួបសមភាគីចិន លោក វ៉ាង យី ក្នុងរដ្ឋធានីប៉េកាំង កាលពីថ្ងៃអង្គារទី២០ឧសភា។
លោក វ៉ាង បាននិយាយថា ចិនស្វាគមន៍ និងគាំទ្រកិច្ចខិតខំប្រឹងប្រែងរបស់ប៉ាគីស្ថាន និងឥណ្ឌា ដើម្បីដោះស្រាយភាពខ្វែងគំនិតគ្នារបស់ពួកគេតាមរយៈការសន្ទនា និងដើម្បីសម្រេច បានបទឈប់បាញ់ដ៏ទូលំទូលាយ និងយូរអង្វែង។
បន្ថែមពីនោះ ប្រមុខការទូតចិន បានប្រាប់លោក អ៊ីហ្សាក ដា ថា ចិននឹងគាំទ្រប៉ាគីស្ថានក្នុងការការពារអធិបតេយ្យភាពជាតិ និងបូរណភាពទឹកដីរបស់ខ្លួន។ នេះបើយោងតាមសេចក្តីថ្លែងការណ៍របស់ក្រសួងការបរទេសចិន។
លើសពីនោះ ក្រសួងការបរទេសប៉ាគីស្ថាន បានបញ្ជាក់ថា ក្រៅពីរក្សាទំនាក់ទំនងជិតស្និទ្ធ ប្រទេសទាំងពីរ បានយល់ព្រមលើកិច្ចសហប្រតិបត្តិការបន្ថែមទៀត ក្នុងវិស័យពាណិជ្ជកម្ម ការវិនិយោគ កសិកម្ម ឧស្សាហូបនីយកម្ម និងវិស័យផ្សេងៗទៀត។ ប្រមុខការទូតទាំង២ ក៏បាន ជួបប្រជុំ មួយទៀត ជាមួយ រដ្ឋមន្ត្រីការបរទេស ស្តីទី អាហ្វ ហ្គា នី ស្ថាន លោក អាមៀ ខាន់ មូតាគី នៅ រដ្ឋធានី ប៉េកាំង ។
រដ្ឋមន្ត្រីការបរទេសទាំង២ បានសម្រេចចិត្តពង្រីកច្រករបៀងសេដ្ឋកិច្ចចិន-ប៉ាគីស្ថាន ទៅកាន់ប្រទេសអាហ្គានីស្ថាន និងកិច្ចសហប្រតិបត្តិការបន្ថែមទៀតសម្រាប់កម្មវិធីហេដ្ឋារចនាសម្ព័ន្ធសកលរបស់ប្រទេសចិន គំនិតផ្តួចផ្តើមខ្សែក្រវាត់មួយ ផ្លូវមួយ។ កិច្ចប្រជុំបន្ទាប់រវាងរដ្ឋម ន្ត្រីទាំងបី នឹងធ្វើឡើងនៅទីក្រុងកាប៊ុល។
គួរបញ្ជាក់ថា គូប្រជែងប្រដាប់ដោយអាវុធមហាប្រល័យទាំង២ [ឥណ្ឌា និងប៉ាគីស្ថាន] បានព្រមព្រៀងបទឈប់បាញ់គ្នានៅថ្ងៃទី១០ឧសភា បន្ទាប់ពីការប្រយុទ្ធគ្នារយៈពេលបួនថ្ងៃ។ ភាព តានតឹង បាន កើនឡើង រវាង ប្រទេស ជិតខាង ប្រដាប់អាវុធ នុយក្លេអ៊ែរ បន្ទាប់ពី ការវាយប្រហារ នៅ តំបន់ កាស្មៀ របស់ ឥណ្ឌា កាលពី ថ្ងៃទី២២ ខែមេសា ដែល បានសម្លាប់មនុស្ស២៦នាក់ ។ ឥណ្ឌា បាន បន្ទោស ប៉ាគីស្ថាន ចំពោះ ការ វាយ ប្រហារ នេះ ប៉ុន្តែ រដ្ឋធានី អ៊ីស្លាម៉ាបាដ បាន បដិសេធ ការ ជាប់ ពាក់ព័ន្ធ ណា មួយ ៕
