ឯកឧត្តម គួច ចំរើន អំពាវនាវឱ្យប្រជាពលរដ្ឋគ្រប់រូប ត្រូវប្រុងប្រយ័ត្ននិងចូលរួមអនុវត្តវិធានការការពារពីជំងឺកូវីដប្រភេទថ្មី
ភ្នំពេញ៖ ឯកឧត្តម គួច ចំរើន អភិបាលខេត្ដកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល បានអំពាវនាវឱ្យប្រជាពលរដ្ឋគ្រប់រូប ត្រូវប្រុងប្រយ័ត្ននិងចូលរួមអនុវត្តវិធានការការពារពីជំងឺកូវីដប្រភេទថ្មី។
ប្រជាពលរដ្ឋ ៧គ្រួសារ មានទីលំនៅក្នុងភូមិលេខ៤ ឃុំប្រាសាទ ស្រុកស្អាង ខេត្តកណ្តាល ដែលបានរងផលប៉ះពាល់ដោយគ្រោះធម្មជាតិខ្យល់កន្ត្រាក់ កាលពីសប្តាហ៍កន្លងទៅ ជាប្រភេទផ្ទះឈើ ដំបូលប្រក់ស័ង្កសី បានទទូលជំនួយសង្គ្រោះជាលើកទី២ ពីសាខា កក្រក ខេត្តកណ្តាល ដើម្បីជួយសម្រួលការលំបាករបស់បងប្អូនរងគ្រោះ។
ក្នុងឱកាសអញ្ជើញចុះជួបផ្ទាល់ជាមួយបងប្អូនប្រជាពលរដ្ឋទាំង ៧គ្រួសារ នៅព្រឹកថ្ងៃទី១៤ ខែឧសភា ឆ្នាំ២០២៥នេះ ឯកឧត្តម គួច ចំរើន អភិបាលខេត្ដកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បាននាំមកនូវការសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនទៅដល់បងប្អូនដែលរងគ្រោះទាំងអស់ដោយក្តីនឹករលឹក។ ជានិច្ចកាលសម្តេចតែងបានណែនាំជាប្រចាំឱ្យមន្ត្រីថ្នាក់មូលដ្ឋាន ស្រុក និងខេត្ត ត្រូវពិនិត្យមើល និងជួយដោះស្រាយរាល់ទុក្ខលំបាករបស់បងប្អូនប្រជាពលរដ្ឋជានិច្ច។
ឯកឧត្តមប្រធានបានបញ្ជាក់ដែរថា ការផ្តល់ជូនជំនួយសង្រ្គោះបន្ទាន់ជូនបងប្អូនទាំង៧គ្រួសារនេះ គឺជាលើកទី២ហើយ ដោយកាលពីក្រោយពេលកើតហេតុភ្លាមៗ អនុសាខាកាកបាទក្រហមកម្ពុជាស្រុកស្អាង បានយកជំនួយមកផ្តល់ជូនម្តងរួចហើយ។
ឯកឧត្តមក៏បានផ្តាំផ្ញើដល់បងប្អូនទាំងអស់ នៅក្នុងរដូវវស្សាអាចមានភ្លៀងធ្លាក់ច្រើន ហើយមានទឹកដក់ និងលិចនៅទីតាំងមួយចំនួន ដូចនេះសូមបងប្អូនថែទាំសុខភាពជាចម្បង និងអនុវត្អនូវអនាម័យ៣ប្រការជាប់ជានិច្ច ពិសេសករណីក្មេងលង់ទឹកស្លាប់ ព្រមទាំងត្រូវប្រុងប្រយ័ត្នលើបញ្ហាសត្វពស់ និងសត្វមានពិសផ្សេងៗ ដោយក្នុងនោះឯកឧត្តមក៏បានណែនាំដល់មន្ត្រីសុខាភិបាល ត្រូវផ្តល់ថ្នាំពស់ចឹកមកដល់ស្រុកនិងមូលដ្ឋាន ដើម្បីការពារក្នុងករណីចាំបាច់ផងដែរ ។
ជាមួយគ្នានេះដែរឯកឧត្តម គួច ចំរើន ក៏បានអំពាវនាវសុំឱ្យបងប្អូនប្រជាពលរដ្ឋគ្រប់រូប ត្រូវប្រុងប្រយ័ត្ននិងចូលរួមអនុវត្តវិធានការការពារពីជំងឺកូវីដប្រភេទថ្មី ដែលសព្វថ្ងៃកំពុងតែកើតមានច្រើននៅប្រទេសជិតខាងយើង ដោយក្នុងនោះក្រសួងសុខាភិបាល ក៏ទើបតែបានចេញនូវសេចក្តីជូនដំណឹងពីបញ្ហាជំងឺកូវីដប្រភេទថ្មីនេះផងដែរ។
សូមបញ្ជាក់ជូនថា អំណោយមនុស្សធម៌ ដែលសាខាបានឧបត្ថម្ភជូនគ្រួសាររងគ្រោះខាងលើ ដោយក្នុង១គ្រួសារៗទទួលបាននូវ៖ អង្ករ ២៥ គីឡូក្រាម មី១កេស កៅស៊ូតង់១ផ្ទាំង ទឹកត្រី១យួរ ទឹកស៊ីអុីវ១យួរ ទឹកសុទ្ធ ១កេស ត្រីខ១យួរ ឃីតសម្ភារៈប្រើប្រាស់ ១កញ្ចប់ និងថវិកាចំនួន ៣០០,០០០រៀល (សាមសិបម៉ឺនរៀលគត់)៕
