ឯកឧត្តមកិត្តិសេដ្ឋាបណ្ឌិត ជាម យៀប ដឹកនាំកិច្ចប្រជុំផ្សព្វផ្សាយស្តីពីការបង្កើតគណៈកម្មការរៀបចំ និងសមាសភាពគណៈប្រតិភូសភាកម្ពុជា សម្រាប់កិច្ចប្រជុំ AIPA Caucus លើកទី១៦

ភ្នំពេញ៖ នាព្រឹកថ្ងៃទី៩ ខែឧសភា ឆ្នាំ២០២៥ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងជាប្រធានក្រុមរដ្ឋសភាកម្ពុជានៃអន្តរសភាអាស៊ាន (AIPA) បានអញ្ជើញដឹកនាំកិច្ចប្រជុំផ្សព្វផ្សាយស្តីពីការបង្កើតគណៈកម្មការរៀបចំ និងសមាសភាពគណៈប្រតិភូ សភាកម្ពុជា សម្រាប់ចូលរួមកិច្ចប្រជុំ AIPA Caucus លើកទី១៦ នៅវិមានរដ្ឋសភា។

កិច្ចប្រជុំនេះមានការអញ្ជើញចូលរួមពីសំណាក់ ឯកឧត្តម លោកជំទាវ អនុប្រធាន សមាជិក សមាជិកា គណៈកម្មការរៀបចំ គណៈប្រតិភូសភាកម្ពុជាដែលត្រូវ ចូលរួមកិច្ចប្រជុំ AIPA Caucus លើកទី១៦ គណៈប្រតិភូសមាជិកសភាវ័យក្មេងអោយប៉ា (YPA)ដែលត្រូវ ចូលរួមកម្មវិធី AIPA Roadshow ព្រមទាំងឯកឧត្តម លោកជំទាវ លោក លោកស្រី ក្នុងលេខាធិការដ្ឋានជាតិ អោយប៉ា-កម្ពុជា។

ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍ថា កម្ពុជាធ្លាប់មានបទពិសោធន៍ចូលរួម និងរៀបចំមហាសន្និបាត ក៏ដូចជាកិច្ចប្រជុំនានារបស់អាយប៉ាជាង២០ឆ្នាំមកហើយ ដែលឯកឧត្តមកិត្តិសេដ្ឋាបណ្ឌិត សង្ឃឹមថា ផ្អែកលើបទពិសោធន៍ជោគជ័យកន្លងមក ការទទួលធ្វើជាម្ចាស់ផ្ទះរៀបចំកិច្ចប្រជុំ AIPA Caucus លើកទី១៦ របស់សភាកម្ពុជានាពេលខាងមុខ គឺចាប់ពីថ្ងៃទី១៤ ដល់ថ្ងៃទី១៧ ខែកក្កដា ឆ្នាំ២០២៥ នឹងមានដំណើរការទៅដោយរលូន និងទទួលបានជោគជ័យជាក់ជាមិនខាន។

តែដោយសារតែ កិច្ចប្រជុំ AIPA Caucus លើកទី១៦ ដែលសភាកម្ពុជាធ្វើជាម្ចាស់ផ្ទះរៀបចំនៅពេលនេះ មានលក្ខណៈពិសេសប្លែកជាងពេលមុនៗ គឺដោយមានបន្ថែមកម្មវិធី AIPA Roadshow និងមានការអញ្ជើញសភាសង្កេតការណ៍មួយចំនួនចូលរួមផងដែរនោះ ឯកឧត្តមកិត្តិសេដ្ឋាបណ្ឌិត ជាម យៀប ក៏បានណែនាំឱ្យអគ្គលេខាធិការដ្ឋានអាយប៉ាកម្ពុជា ត្រូវបង្កើនការយកចិត្តទុកដាក់បន្ថែមទៀតនៅក្នុងការបំពេញការងារ ដោយត្រូវធ្វើការទាក់ទងទៅលេខាធិការដ្ឋានអាយប៉ានៅហ្សារការតាជាប្រចាំ ក៏ដូចជាអង្គភាពពាក់ព័ន្ធនៅក្នុងប្រទេស មានដូចជាទីតាំសម្រាប់ការរៀបចំកម្មវិធី AIPA Roadshow នៅសាកលវិទ្យាល័យភ្នំពេញជាដើម ដើម្បីជួយសម្របសម្រួលការងារឱ្យប្រព្រឹត្តទៅ បានដោយរលូនល្អ៕