ភ្នំពេញ៖ ពុទ្ធបរិស័ទចំណុះប្រាសាទវត្តអធ្វា បានរៀបចំកិច្ចពិធីឡើងអ្នកតា ៣កើត ខែពិសាខ និងកិច្ចពិធីបញ្ជូនអ្នកតាឡើងគោក ដែលជាទំនៀមពីបុរាណកាលមក។
ពិធីនេះដូចពិធីឡើងអ្នកតា នៅថ្ងៃ៣កើត ខែមាឃដូច្នោះដែរ គ្រាន់តែនៅខែមាឃ គឺគេបញ្ជូនអ្នកតាចុះទឹក ដែលបញ្ជាក់ពីការបញ្ចប់ វដ្ដរដូវធ្វើស្រែ។
ពិធីខាងលើធ្វើឡើងនៅរសៀលថ្ងៃទី២៩ ខែមេសា ឆ្នាំ២០២៥ នៅប្រាង្គកណ្ដាលប្រាសាទវត្តអធ្វា ដែលជាអ្នកតាធំ ទួលតាមឿង និងទួលដូនប៉ុក ដែលសុទ្ធសឹងជាកន្លែងអ្នកតាសំខាន់ៗ ជុំវិញតំបន់ ប្រាសាទវត្តអធ្វា។
កិច្ចពិធីនេះធ្វើឡើងក្នុងបំណង សុំសេចក្តីសុខសប្បាយ សូមឱ្យមានភ្លៀងគ្រប់គ្រាន់ និងបញ្ជាក់ពីការចាប់ផ្តើមនៃវដ្ដរដូវថ្មី ដែលពលរដ្ឋចាប់ផ្តើមភ្ជួររាស់ធ្វើស្រែ ហើយភ្លៀងក៏នឹងចាប់ផ្តើមធ្លាក់ បណ្ដើរៗក្នុងខែពិសាខនេះផងដែរ។
សូមបញ្ជាក់ថា អាជ្ញាធរជាតិអប្សរាតែងតែអនុញ្ញាតច្បាប់ឱ្យប្រជាពលរដ្ឋអាចរៀបចំកិច្ចពិធីបុណ្យនានា ដែលជាផ្នែកមួយ នៃការអភិរក្សមរតកអរូបីនៅក្នុងតំបន់រមណីយដ្ឋានអង្គរ។ ក្រៅពីនេះ អាជ្ញាធរជាតិអប្សរា ក៏បានគាំទ្រទាំងធនធាន និងស្មារតី ក្នុងន័យចូលរួមការពារ និងអភិរក្សមរតកទាំងនោះឱ្យបានគង់វង្ស៕
