អូម៉ង់​បញ្ជាក់​ពី​វឌ្ឍនភាព​នៅ​អ៊ីរ៉ង់​-​អាមេរិក

បរទេស៖ ក្រសួងការបរទេសអូម៉ង់ បានបញ្ជាក់កាលពីថ្ងៃសៅរ៍ថា រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi និងបេសកជនប្រធានាធិបតីសហរដ្ឋអាមេរិក លោក Steve Witkoff បានយល់ព្រមឈានទៅដំណាក់កាលបន្ទាប់នៃការចរចា សំដៅសម្រេចបាននូវកិច្ចព្រមព្រៀងដ៏ត្រឹមត្រូវ យូរអង្វែង និងចងភ្ជាប់លើបញ្ហានុយក្លេអ៊ែររបស់ទីក្រុងតេអេរ៉ង់។

លោក Araghchi និងលោក Witkoff បានធ្វើការពិភាក្សាដោយប្រយោលនៅព្រឹកព្រលឹមក្នុងទីក្រុងរ៉ូម ដោយរដ្ឋមន្ត្រីការបរទេសអូម៉ានី លោក Badr Albusaidi ជាអ្នកសម្រុះសម្រួលការពិភាក្សានេះ។

អ្នកនាំពាក្យក្រសួងការបរទេសអូម៉ានី បាននិយាយថា ការសន្ទនា និងការប្រាស្រ័យទាក់ទងច្បាស់លាស់ នៅតែមានសារៈសំខាន់ ដើម្បីសម្រេចបាននូវកិច្ចព្រមព្រៀង និងការយោគយល់គ្នាដែលអាចជឿទុកចិត្តបានសម្រាប់ផលប្រយោជន៍នៃតំបន់ និងអន្តរជាតិដែលពាក់ព័ន្ធទាំងអស់។

វាត្រូវបានព្រមព្រៀងផងដែរថា ជុំបន្ទាប់នៃកិច្ចចរចានឹងត្រូវធ្វើឡើងនៅទីក្រុង Muscat នៅប៉ុន្មានថ្ងៃខាងមុខនេះ។

លោក Albusaidi បានសម្តែងការកោតសរសើរនៅលើវេទិកាប្រព័ន្ធផ្សព្វផ្សាយសង្គម X សម្រាប់ស្មារតីនៃកិច្ចសហប្រតិបត្តិការដែលបង្ហាញដោយភាគីទាំងពីរ។

លោកបាននិយាយថា «ខ្ញុំសូមអរគុណរដ្ឋមន្ត្រីការបរទេសអ៊ីរ៉ង់លោក Dr Seyed Abbas Araghchi និងបេសកជនប្រធានាធិបតីលោក Steve Witkoff សម្រាប់វិធីសាស្រ្តស្ថាបនាខ្ពស់របស់ពួកគេចំពោះកិច្ចចរចាថ្ងៃនេះ»។