ឧត្តមសេនីយ៍ឯក យឹម លាង ផ្ញើសារលិខិតថ្លែងអំណរគុណ ជូនដល់កងកម្លាំងនគរបាលជាតិ នៃនាយកដ្ឋានអង្គរក្ស
ភ្នំពេញ៖ ឯកឧត្តម ឧត្តមសេនីយ៍ឯក យឹម លាង អគ្គស្នងការរងនគរបាលជាតិ បានផ្ញើសារលិខិតថ្លែងអំណរគុណ ជូនដល់កងកម្លាំងនគរបាលជាតិ នៃនាយកដ្ឋានអង្គរក្ស។
តាមរយៈសារលិខិតថ្លែងអំណរគុណ ឯកឧត្តម ឧត្តមសេនីយ៍ឯក យឹម លាង បានលើកឡើងយ៉ាងដូច្នេះថា៖ «តាងនាម ឯកឧត្តម ឧត្តមសេនីយ៍ឯក អគ្គស្នងការរងនគរបាលជាតិ ទទួលដឹកនាំនាយកដ្ឋានអង្គរក្ស និងរូបខ្ញុំផ្ទាល់ សូមសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅជូនចំពោះថ្នាក់ដឹកនាំ នាយកដ្ឋាន នាយការិយាល័យ ប្រធានអង្គភាព និងមន្ត្រីនគរបាលជាតិ នៃនាយកដ្ឋានអង្គរក្ស ដែលបាន ខិតខំប្រឹងប្រែងយកចិត្តទុកដាក់ ប្រកបដោយស្មារតីទទួលខុសត្រូវខ្ពស់ ក្នុងប្រតិបត្តិការការពារសន្តិសុខ សណ្តាប់ធ្នាប់ថ្វាយ ព្រះករុណាជាអម្ចាស់ ជីវិតតម្កល់លើត្បូង ព្រះមហាក្សត្រ នៃព្រះរាជាណាចក្រកម្ពុជា ជូនសម្តេច ឥស្សរជនជាន់ខ្ពស់ជាតិ-អន្តរជាតិ ក្នុងឱកាសប្រារព្ធព្រះរាជពិធីបួងសួងចម្រើនសេចក្តីសុខ ជូនដល់ ព្រះរាជាណាចក្រកម្ពុជា ព្រឹត្តិការណ៍អង្គរសង្ក្រាន្ត ឆ្នាំម្សាញ់ សប្តស័ក ព.ស.២៥៦៨-២៥៦៩ គ.ស.២០២៥ នៅខេត្តសៀមរាប និងដំណើរបំពេញទស្សនកិច្ចផ្លូវរដ្ឋរបស់ ឯកឧត្តម ស៊ី ជើងពឹង (XI JINPING) ប្រធានាធិបតី នៃសាធារណរដ្ឋប្រជាមានិតចិន នៅព្រះរាជាណាចក្រកម្ពុជា ចាប់ពីថ្ងៃទី១៧-១៨ ខែមេសា ឆ្នាំ២០២៥ ដោយទទួលបានជោគជ័យគួរជាទីមោទនៈ។
ការចូលរួមរបស់អស់លោក លោកស្រី ក្នុងប្រតិបត្តិការការពារនេះ គឺជាការលះបង់កម្លាំងកាយ ចិត្ត បញ្ញាស្មារតី ព្រមទាំងពេលវេលាជួបជុំគ្រួសារ ញាតិសន្តាននាឱកាសពិធីបុណ្យចូលឆ្នាំថ្មីប្រពៃណីខ្មែរ បានសបញ្ជាក់យ៉ាងច្បាស់ពីស្មារតីស្នេហាជាតិ និងការចូលរួមចំណែកជាមួយរាជរដ្ឋាភិបាលយ៉ាងសកម្ម ក្នុងការលើកស្ទួយកិត្តិយស និងកិត្យានុភាពជាតិលើឆាកអន្តរជាតិ។
ឆ្លៀតក្នុងឱកាសចូលឆ្នាំថ្មីប្រពៃណីខ្មែរ ឆ្នាំម្សាញ់ សប្តស័ក ព.ស.២៥៦៨-២៥៦៩ គ.ស.២០២៥ តាងនាម ឯកឧត្តម ឧត្តមសេនីយ៍ឯក អគ្គស្នងការរងនគរបាលជាតិ ទទួលដឹកនាំនាយកដ្ឋានអង្គរក្ស និងរូបខ្ញុំផ្ទាល់ សូមបួងសួងដល់វត្ថុស័ក្តិសិទ្ធិទាំងឡាយក្នុងលោក សូមប្រោះព្រំបីបាច់ថែរក្សា និងប្រសិទ្ធពរជ័យ សិរីមង្គល វិបុលសុខគ្រប់ប្រការជូនថ្នាក់ដឹកនាំនាយកដ្ឋាន នាយការិយាល័យ ប្រធានអង្គភាព និងមន្ត្រីនគរបាលជាតិ នៃនាយកដ្ឋានអង្គរក្ស ព្រមទាំងក្រុមគ្រួសារ សូមប្រកបដោយពុទ្ធពរ ៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ» ៕
