បុរសជនជាតិអាម៉េរិកម្នាក់ត្រូវបានបាញ់សម្លាប់ ក្រោយប្លន់យន្តហោះ Tropic Air នៅប្រទេសបេលី

បែលម៉ូប៉ង់៖ បើយោងតាមស្នងការប៉ូលិស លោក ឆែស្ទើរ វីលៀម (Chester Williams) បានប្រាប់អ្នកសារព័ត៌មានថាបុរសជនជាតិអាម៉េរិកម្នាក់ត្រូវបានបាញ់សម្លាប់ ក្រោយប្លន់យន្តហោះ Tropic Air ខ្នាតតូចមួយគ្រឿងនៅប្រទេសបេលី។ ហេតុការណ៍នេះកើតឡើងកាលពីថ្ងៃព្រហស្បតិ៍ទី១៧ ខែមេសា។

ស្នងការប៉ូលិស បានប្រាប់ថា ចោរប្លន់បានទាញកាំបិតភ្ជង់ប្លន់ ខណៈយន្តហោះកំពុងហោះហើរលើអាកាស ហើយចោរចិត្តឆៅរូបនោះបានទាមទារឱ្យជើងហោះហើរក្នុងស្រុកដឹកលោកហោះចេញពីប្រទេសនេះ។

លោក វីលៀម បានបន្ថែមថា ចោរប្លន់នោះត្រូវបានគេកំណត់អត្តសញ្ញាណថាជាអតីតយុទ្ធជនយោធាអាម៉េរិក ឈ្មោះ អាគីនយេឡា សាវ៉ា ថេល័រ (Akinyela Sawa Taylor)។

ស្នងការប៉ូលិសរូបនេះបានបន្តទៀតថា ពេលជនល្មើសកំពុងធ្វើសកម្មភាព យន្តហោះបានហោះវង់លើដែនអាកាសភាគខាងជើងនៃប្រទេសបេលី ស្របពេលប្រេងឥន្ធនៈកាន់តែជិតអស់ ហើយពិតជាគួរឱ្យគ្រោះថ្នាក់ណាស់។

គួរជម្រាបថា ចោរប្លន់ជនជាតិអាម៉េរិករូបនោះបានចាក់មនុស្ស៣ នាក់នៅលើយន្តហោះឱ្យរបួស រួមទាំងអ្នកបើកយន្តហោះ និងអ្នកដំណើរម្នាក់ទៀត ដែលបានបាញ់សម្លាប់ចោរប្លន់រូបនោះ ក្រោយមកយន្តហោះក៏បានចុះចតនៅខាងក្រៅទីក្រុងបេលី។ អ្នក ដំណើរ ម្នាក់ ត្រូវ បាន គេ បញ្ជូន ទៅ មន្ទីរ ពេទ្យ ជា បន្ទាន់ ហើយចោរប្លន់អស់បុណ្យរូបនោះក៏ត្រូវអស់ជីវិតដោយ សារ គ្រាប់ កាំភ្លើង។ យ៉ាងណា គេនៅមិនទាន់ដឹងច្បាស់ទេថា តើចោរនោះឡើងយន្តហោះដោយរបៀបណាទេ? ជុំវិញបញ្ហានេះ អាជ្ញាធរនៃប្រទេសបេលីបានទាក់ទងទៅស្ថានទូតអាម៉េរិកប្រចាំប្រទេសនេះ ដើម្បីសុំជំនួយក្នុងការស៊ើបអង្កេតឧប្បត្តិហេតុនេះ៕