UNCTAD៖ កំណើនសេដ្ឋកិច្ចសកលអាចធ្លាក់ចុះមកត្រឹម២,៣ ភាគរយ ដោយសារភាពតានតឹងពាណិជ្ជកម្ម

ហ្សឺណែវ៖ ទីភ្នាក់ងារពាណិជ្ជកម្ម និងអភិវឌ្ឍន៍របស់អង្គការសហប្រជាជាតិ (UNCTAD) បានបង្ហាញកាលពីថ្ងៃពុធទី១៦ ខែមេសាថា កំណើនសេដ្ឋកិច្ចសកលអាចធ្លាក់ចុះមកត្រឹម២,៣ ភាគរយ ដោយសារភាពតានតឹងពាណិជ្ជកម្ម និងភាពមិនច្បាស់លាស់ជំរុញឱ្យមាននិន្នាការធ្លាក់ចុះ។

UNCTAD បានបង្ហាញក្នុងរបាយការណ៍ចេញផ្សាយស្តីពីទស្សនវិស័យពាណិជ្ជកម្ម និងការអភិវឌ្ឍសម្រាប់ឆ្នាំនេះថា៖«កំណើនសកលត្រូវបានព្យាករណ៍ថានឹងថយចុះមកត្រឹម២,៣ ភាគរយនៅឆ្នាំ ២០២៥»។ សេដ្ឋកិច្ចពិភពលោកបានកើនឡើង២,៨ ភាគរយក្នុងឆ្នាំ២០២៤។ របាយការណ៍នេះបានបង្ហាញថា នេះគឺជាការថយចុះគួរឱ្យកត់សម្គាល់បើប្រៀបធៀបទៅនឹងអត្រាកំណើនប្រចាំឆ្នាំជាមធ្យមដែលបានចុះបញ្ជីនៅក្នុងរយៈពេលមុនការរាតត្បាតនៃជំងឺកូវីដ១៩ ដែលជារយៈពេលនៃកំណើនធ្លាក់ចុះជាសកល។

ភាពមិនច្បាស់លាស់ផ្នែកពាណិជ្ជកម្មបានធ្វើឱ្យទីផ្សារហិរញ្ញវត្ថុរង្គោះរង្គើក្នុងខែនេះ បន្ទាប់ពីប្រធានាធិបតីអាម៉េរិក លោក ដូណាល់ ត្រាំ បានប្រកាសដំឡើងពន្ធលើប្រទេសជាច្រើនកាលពីថ្ងៃទី២ ខែមេសា។ យ៉ាងណាលោក ត្រាំ បានពន្យារពេលយកពន្ធរយៈពេល៩០ ថ្ងៃ ប៉ុន្តែបានរឹតកចិនជាមួយនឹងគំនាបពន្ធ១៤៥ ភាគរយ។

ការភ័យខ្លាចនៃការធ្លាក់ចុះសេដ្ឋកិច្ចនៅសហរដ្ឋអាម៉េរិកកំពុងកើនឡើង ខណៈដែលការព្រួយបារម្ភអំពីពន្ធបន្ថែមការថប់បារម្ភរបស់វិនិយោគិន។

របាយ ការណ៍ បាន បញ្ជាក់ ថា ៖« ការ អនុវត្ត វិធានការ រឹតត្បិត ពាណិជ្ជកម្ម ជា បន្តបន្ទាប់ និង ការ ប្រឈមមុខ ដាក់ គ្នា ផ្នែក ភូមិសាស្ត្រនយោបាយ មាន ហានិភ័យ នៃ ការ រំខាន យ៉ាង ធ្ងន់ធ្ងរ ដល់ ខ្សែ ផលិតកម្ម ឆ្លង កាត់ ព្រំដែន និង លំហូរ ពាណិជ្ជកម្ម អន្តរជាតិ ដែល នាំ ឱ្យ សកម្មភាព សេដ្ឋកិច្ច នៅ ទូទាំង ពិភពលោក ធ្លាក់ ចុះ»។

ទីភ្នាក់ងារអង្គការសហប្រជាជាតិបានជំរុញឱ្យរដ្ឋបាលរបស់លោក ត្រាំ ដកប្រទេសក្រីក្របំផុតចេញពីបញ្ជីពន្ធគយបដិការ ព្រោះវានឹងមានផលប៉ះពាល់តិចតួចបំផុតលើគោលបំណងគោលនយោបាយពាណិជ្ជកម្មរបស់សហរដ្ឋអាម៉េរិក៕