សម្តេចធិបតី៖ កត្តាសុខសន្តិភាព បានធ្វើឱ្យប្រជាពលរដ្ឋទូទាំងប្រទេស អាចអបអរសាទរ និងសប្បាយរីករាយពិធីបុណ្យចូលឆ្នាំថ្មី

ភ្នំពេញ៖ ក្នុងឱកាសអញ្ជើញជាអធិបតីដ៏ខ្ពង់ខ្ពស់ ក្នុងពិធីបើកជាផ្លូវការព្រឹត្តិការណ៍ «អង្គរសង្ក្រាន្ត ឆ្នាំ២០២៥» នៅខេត្តសៀមរាប នាថ្ងៃ ទី ១៤ ខែមេសា ឆ្នាំ២០២៥ ស្ថិតនៅបរិវេណមុខប្រាសាទអង្គរវត្ត ខេត្តសៀមរាប សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា កត្តាសុខសន្តិភាព បានរួមចំណែកធ្វើឱ្យប្រជាពលរដ្ឋទូទាំងប្រទេស អាចអបអរសាទរ និងសប្បាយរីករាយ ប្រារព្ធនូវពិធីបុណ្យចូលឆ្នាំថ្មី ប្រពៃណីជាតិខ្មែរនេះឡើង។

សម្តេចធិបតី ថាមិនមែនយោងតាមរបាយការណ៍នោះទេ តែបានមើលឃើញនិងភ្នែក នូវការជំរុញបំផុសនូវស្មារតីស្នេហាជាតិ តាមរយៈការប្រមូលកម្លាំងសរុបរបស់ជាតិ ដោយមិនប្រកាន់និន្នាការ មិនប្រកាន់សាសនា មិនប្រកាន់វិស័យ រួមគ្នាទាំងអស់ ដើម្បីប្រារព្ធពិធីចូលឆ្នាំថ្មីប្រពៃណីជាតិ តាមរយៈព្រឹត្តិការណ៍អង្គរសង្ក្រាន្ត ឱ្យបានល្អ ដើម្បីលើកតម្កើននូវវប្បធម៌សិល្បៈរបស់ខ្មែរ។

សម្តេចធិបតី បន្តថា ការពិតបើគ្មានសន្តិភាព គឺគ្មានការអភិវឌ្ឍណាមួយកើតឡើងនោះទេ ហើយក៏គ្មានការជួបជុំសប្បាយរីករាយនោះដែរ ក្នុងន័យនេះ រាជរដ្ឋាភិបាល នីតិកាលទី៧ នៃរដ្ឋសភាព ប្តេជ្ញាការពារសន្តិភាព ទោះក្នុងតម្លៃណាក៏ដោយ ដើម្បីធានាថា ប្រទេសកម្ពុជា នឹងក្លាយទៅ ជាប្រទេស ដែលមានការអភិវឌ្ឍរឹងមាំ មិនធ្លាក់នៅក្នុងសង្គ្រាមរាំរៃ ដូចពីអតីតកាលនោះទេ ហើយជាពិសេសដើម្បីសម្រេចបាន នៅចក្ខុវិស័យឆ្នាំ២០៥០។

សម្តេចធិបតី ក៏បានបញ្ជាក់ថា ពលរដ្ឋទាំងចាស់ និងក្មេង ទទួលបាននូវភាពសប្បាយរីករាយ ជាមួយសង្ក្រាន្តនានាទូទាំងប្រទេស ជាពិសេសការរៀប ចំអង្គរសង្ក្រាន្ត ផ្តល់នូវភាពសប្បាយរីករាយ ដែលមានមនុស្សជាច្រើន មិនថា អ្នកសៀមរាប និងប្រជាជនទូទាំងប្រទេស ចង់ឱ្យមានព្រឹត្តិការណ៍បែបនេះ ដើម្បីអបអរសាទរឆ្នាំថ្មីរបស់ខ្មែរ៕