រដ្ឋបាលខេត្តពោធិ៍សាត់ ប្រារព្ធពិធីសូត្រមន្តចម្រើនព្រះបរិត្ត ក្នុងឱកាសបុណ្យចូលឆ្នាំថ្មីប្រពៃណីជាតិ

ភ្នំពេញ៖ រដ្ឋបាលខេត្តពោធិ៍សាត់ នាថ្ងៃទី១០ ខែមេសា ឆ្នាំ២០២៥ បានប្រារព្ធពិធីសូត្រមន្តចម្រើនព្រះបរិត្ត ក្នុងឱកាសអបអរសាទរបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៩ គ.ស ២០២៥ នៅអាគាររដ្ឋបាលខេត្តដែលពិធីនេះបានប្រព្រឹត្តទៅក្រោមអធិបតីភាព ម៉ក់ រ៉ា ប្រធានក្រុមប្រឹក្សាខេត្ត និងឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ និងលោកជំទាវ អាំង សុជាតា ខូយ រីដា ប្រធានកិត្តិយសសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្ត ព្រមទាំងសមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាពជុំវិញខេត្ត កងកម្លាំងប្រដាប់អាវុធទាំង៣ រដ្ឋបាលស្រុកក្រុងនិងមន្ត្រីសាលាខេត្ត។

បន្ទាប់ពីថ្នាក់ដឹកនាំនិងមន្ត្រីអ្នកមុខអ្នកការ គ្រប់ផ្នែក គ្រប់ថ្នាក់បានអញ្ជើញបូជាទៀនធូបព្រះអង្គចៅសែននៅលើបុរីវប្បធម៌កោះសំពៅមាសមុខសាលាខេត្តនិងបូជនីយដ្ឋានឧញ្ញាខ្លាំងមឿងលោកជំទាវខាន់ខៀវ ដែលមានទីតាំងស្ថិតក្នុងភូមិកំពែងស្វាយ ឃុំស្នាមព្រះនោះរួចមក ព្រះសង្ឃ៧អង្គសូត្រមន្តចម្រើនព្រះបរិត្តប្រោសព្រំ ប្រសិទ្ធិពរជ័យ សិរីសយស្តីជ័យមង្គល វិបុលសុខគ្រប់ប្រការនៅសាលប្រជុំអគារថ្មីសាលាខេត្ត។

ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ មានប្រសាសន៍ថា ការរៀបចំព្រឹត្តការណ៍សង្ក្រាន្តពោធិ៍សាត់ ឆ្នាំ២០២៥ គឺជាការចូលរួមអនុវត្តតាមអនុសាសន៍ដ៏ខ្ពង់ខ្ពស់បំផុត របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងបរិបទប្រទេសជាតិមានសុខសន្តិភាពនិងស្ថេរភាព នយោបាយល្អប្រសើរទូទាំប្រទេស ហើយម្យ៉ាងវិញទៀតជាការចូលរួមអបអរសាទរទទួលទេវតាឆ្នាំថ្មី សិរីសួស្តី ជ័យមង្គល និងជាឱកាសដ៏ល្អសម្រាប់ការជួបជុំក្រុមគ្រួសារ។

ជាមួយគ្នានោះ ឯកឧត្តមអភិបាលខេត្ត បានផ្ញើសារប្រគេន និងជូនពរ ដល់ព្រះសង្ឃគ្រប់អង្គ និងប្រជាពលរដ្ឋទូទាំងខេត្តពោធិ៍សាត់ទាំងក្នុងក្រុមគ្រួសារនិងសង្គមជាតិទាំងមូលចូលរួមអបអរសាទរក្នុងពិធីបុណ្យ ចូលឆ្នាំថ្មីប្រពៃណីជាតិខ្មែរដែលនឹងប្រព្រឹត្តទៅរយ៖ពេល៤ថ្ងៃគឺចាប់ពីថ្ងៃទី១៣ដល់១៦ខែមេសាឆ្នាំ២០២៥ សូមទទួលបានពរជ័យសិរីសួស្តីជ័យមង្គល បវរប្រសើរ វិបុលសុខ គ្រប់ប្រការ ។

ឯកឧត្តម ខូយ រីដា បានថ្លែងថា ពេលនេះគឺជាឱកាស ឲ្យប្រជាពលរដ្ឋយើងរួមគ្នាជម្រុះចោលឲ្យជ្រះស្រឡះនូវភាពអពមង្គល ឧបទ្រពចង្រៃនិង មន្ទិលហ្មងសៅទាំងពួងក្នុងឆ្នាំចាស់ហើយតាំងចិត្តថ្មីប្រព្រឹត្តអំពើល្អប្រកបដោយមេត្តា មុទិតា ឧបេក្ខា និងបញ្ញា ចាប់ពីឆ្នាំថ្មីនេះទៅ ៕