គណៈរដ្ឋមន្ត្រីថៃ បានអនុម័តលើសេចក្តីព្រាងច្បាប់សម្រាប់ការបើកដំណើរការកាស៊ីណូ និងកន្លែងកម្សាន្ត

បាងកក៖ នៅថ្ងៃព្រហស្បតិ៍ទី២៧មីនានេះ គណៈរដ្ឋមន្ត្រីប្រទេសថៃ បានអនុម័តលើសេចក្តីព្រាងច្បាប់សម្រាប់ការបើកដំណើរការកាស៊ីណូ និងកន្លែងកម្សាន្ត ខណៈរាជរដ្ឋាភិបាលរបស់ប្រទេសក្បែរខាងកម្ពុជាមួយនេះ សម្លឹងមើលការទាក់ទាញភ្ញៀវទេសចរកាន់តែច្រើន និងសាងសង់ឧស្សាហកម្មល្បែងដ៏ធំមួយ។

ការលេងល្បែងស៊ីសងភាគច្រើនត្រូវបានហាមឃាត់នៅក្នុងប្រទេសថៃ ក្រៅពីការប្រណាំងសេះគ្រប់គ្រងដោយរដ្ឋ ឆ្នោត និងកីឡាមួយចំនួន ប៉ុន្តែរាជរដ្ឋាភិបាលបន្តបន្ទាប់គ្នា បានជំរុញការអនុញ្ញាតឱ្យបើកកាស៊ីណូ ដើម្បីទាក់ទាញភ្ញៀវបរទេស បង្កើតការងារ និងចំណូលរដ្ឋកាន់តែច្រើន។ ប៉ុន្តែ សេចក្តីព្រាងចុងក្រោយត្រូវបានអនុម័តដោយគណៈរដ្ឋមន្ត្រីកំណត់យ៉ាងសំខាន់ថា ជនជាតិថៃត្រូវបង់ថ្លៃចូល៥០០០បាត និងត្រូវមានយ៉ាងហោចណាស់៥០លានបាត(១,៤៧លានដុល្លារ)នៅក្នុងប្រាក់បញ្ញើរបស់ធនាគារ។ ការដាក់កំហិតមួយទៀត គឺថា..តំបន់កាស៊ីណូអាចមានតែ១០ភាគរយនៃទំហំទាំងមូលក្នុងកន្លែងកម្សាន្តមួយ។ នេះបើយោងតាមសេចក្តីថ្លែងការណ៍របស់រាជរដ្ឋាភិបាល។

សេចក្តីព្រាងច្បាប់នេះ នឹងត្រូវបញ្ជូនទៅសភា ហើយប្រសិនបើត្រូវបានអនុម័ត ក៏នឹងត្រូវការការអនុម័តពីព្រឹទ្ធសភា និងព្រះមហាក្សត្រផងដែរ។

លោកស្រីនាយករដ្ឋមន្ត្រី ផែថងថាន ឈិនៈវ៉ាត់ បានប្រាប់អ្នកសារព័ត៌មានថា សេចក្តីលម្អិតនៃច្បាប់នេះ មិនទាន់ចប់ទេ ព្រោះសភានឹងសម្រេចចុងក្រោយ។

របាយការណ៍របស់ធនាគារ Citi កាលពីចុងឆ្នាំមុន បានប៉ាន់ប្រមាណថាប្រហែលពាក់កណ្តាលនៃមនុស្សមានអាយុចាប់ពី២០ឆ្នាំឡើងទៅ នៅក្នុងប្រទេសថៃអាចជាអ្នកលេងល្បែងក្នុងកាស៊ីណូ ដែលផ្តល់មូលដ្ឋានសម្រាប់ប្រទេសនេះ ដើម្បីក្លាយជាគោលដៅលេងល្បែងដ៏ធំបំផុតទីបីរបស់ពិភពលោក។

រាជរដ្ឋាភិបាលដឹកនាំដោយគណបក្សភឿថៃ សង្ឃឹមថា នឹងទាក់ទាញយ៉ាងហោចណាស់១០០ពាន់លានបាត ឬស្មើនឹងប្រមាណ៣ពាន់លានដុល្លារក្នុងការវិនិយោគថ្មីនៅក្នុងកាស៊ីណូ និងកន្លែងកម្សាន្ត ហើយមើលឃើញការជំរុញប្រចាំឆ្នាំដល់ការមកដល់របស់ភ្ញៀវទេសចរបរទេសពី៥ទៅ១០ភាគរយ ខណៈពេលបង្កើតប្រាក់ចំណូលជាង១២ ពាន់លានបាតក្នុងមួយឆ្នាំ។

គួរបញ្ជាក់ថា ប្រទេសជាច្រើននៅអាស៊ីអាគ្នេយ៍បានធ្វើឱ្យកាស៊ីណូស្របច្បាប់ ប៉ុន្តែមានតែប្រទេសសិង្ហបុរីមួយប៉ុណ្ណោះ ដែលទទួលបានជោគជ័យក្នុងការទាក់ទាញក្រុមហ៊ុនយក្សពិភពលោក។ វិស័យទេសចរណ៍ គឺជាកត្តាជំរុញដ៏សំខាន់របស់ប្រទេសថៃ ជាសេដ្ឋកិច្ចធំទីពីររបស់អាស៊ីអាគ្នេយ៍។ នៅឆ្នាំនេះ រាជរដ្ឋាភិបាលរំពឹងថា នឹងមានភ្ញៀវបរទេសចំនួន៣៨លាននាក់៕