ថៃយល់ព្រមកាត់បន្ថយរយៈពេលស្នាក់នៅដោយគ្មានទិដ្ឋាការពី៦០ថ្ងៃមក៣០ថ្ងៃវិញ ដើម្បីប្រយុទ្ធប្រឆាំងនឹងអាជីវកម្មខុសច្បាប់

បាងកក៖ ក្រសួងទេសចរណ៍ និងកីឡារបស់ប្រទេសថៃ បានយល់ព្រមកាត់បន្ថយរយៈពេលស្នាក់នៅដោយគ្មានទិដ្ឋាការពី៦០ថ្ងៃមក៣០ថ្ងៃវិញ ដើម្បីប្រយុទ្ធប្រឆាំងនឹងអាជីវកម្មខុសច្បាប់ ដែលកេងប្រវ័ញ្ចលើគម្រោងលើកលែងទិដ្ឋាការ។

ក្រសួងការបរទេស ទទួលស្គាល់បញ្ហានេះដោយបញ្ជាក់ថា ភាគីពាក់ព័ន្ធទាំងអស់បានយល់ព្រមជាគោលការណ៍ ដើម្បីកាត់បន្ថយរយៈពេលស្នាក់នៅពី៦០ថ្ងៃ មកនៅត្រឹម៣០ថ្ងៃសម្រាប់ពលរដ្ឋមកពីប្រទេសនានា ដែលបានផ្តល់ការលើកលែងទិដ្ឋាការក្រោមកម្មវិធីរបស់រាជរដ្ឋាភិបាល។ ព័ត៌មានលម្អិតបន្ថែមនឹងត្រូវបានពិភាក្សាមុននឹងប្រកាសជាផ្លូវការនូវការកែសម្រួលបទប្បញ្ញត្តិនេះ។

ចាប់តាំងពីខែកក្កដា ឆ្នាំ២០២៤ រាជរដ្ឋាភិបាលបានអនុញ្ញាតឱ្យអ្នកកាន់លិខិតឆ្លងដែនមកពី៩៣ប្រទេស ចូលទៅក្នុងប្រទេសថៃ សម្រាប់គោលបំណងទេសចរណ៍ក្នុងរយៈពេលមិនលើសពី៦០ថ្ងៃ។

ប្រតិបត្តិករទេសចរណ៍ បានសម្ដែងការព្រួយបារម្ភលើរយៈពេលនេះ ដោយសារអ្នកទេសចរផ្លូវវែងជាធម្មតាស្នាក់នៅត្រឹមតែ១៤ទៅ២១ថ្ងៃជាមធ្យម ខណៈអ្នកធ្វើដំណើរផ្លូវខ្លីចំណាយពេលតិចជាង២សប្តាហ៍ក្នុងមួយការធ្វើដំណើរ ឬប្រហែល៧ថ្ងៃជាមធ្យម។សមាគមភ្នាក់ងារទេសចរណ៍ថៃ បានលើកឡើងពីការព្រួយបារម្ភនេះ ជាមួយក្រសួង ដោយសារតែមានការកើនឡើងនៃចំនួនជនបរទេសធ្វើការ ឬរកស៊ីខុសច្បាប់នៅក្នុងប្រទេស។

លោកស្រី ណាត់រីយៈ ថៈវីវង្ស រដ្ឋលេខាធិការអចិន្ត្រៃយ៍របស់ក្រសួង បានណែនាំដល់នាយកដ្ឋានទេសចរណ៍ ឱ្យអនុវត្តច្បាប់ធុរកិច្ចទេសចរណ៍ និងមគ្គុទ្ទេសក៍ទេសចរណ៍ឱ្យកាន់តែធ្ងន់ធ្ងរ។

មជ្ឈមណ្ឌលប្រតិបត្តិការពិសេសដែលដំណើរការដោយអាជ្ញាធរចំនួន៦ រួមទាំងនាយកដ្ឋានទេសចរណ៍ និងប៉ូលិសទេសចរ បានស៊ើបអង្កេតជាប់លាប់នូវសកម្មភាពខុសច្បាប់ដែលកើតឡើងនៅកោះភូកេត និងតំបន់ទេសចរណ៍ដ៏ពេញនិយមចំនួន៥ផ្សេងទៀត។ នៅឆ្នាំ២០២៤ នាយកដ្ឋានបានដកហូតអាជ្ញាបណ្ណរបស់ក្រុមហ៊ុនចំនួន៤០ សម្រាប់ការផ្លាស់ប្ដូរនាយកដែលមានការអនុញ្ញាត និងសមាមាត្រនៃនាយក និងម្ចាស់ភាគហ៊ុន បណ្តាលឱ្យពួកគេបាត់បង់សិទ្ធិក្នុងការធ្វើអាជីវកម្មទេសចរណ៍៕