បរទេស៖ វិទ្យុអាស៊ីសេរី បានប្រកាសទៅកាន់ប្រិយមិត្ត និងអ្នកស្តាប់ខ្លួន នៅម៉ោង៩កន្លះព្រឹក ថ្ងៃទី១៧ ខែមីនា ឆ្នាំ២០២៥នេះថា វិទ្យុអាស៊ីសេរី អាចនឹងលែងដំណើរការហើយ។
ការប្រកាសរបស់វិទ្យុអាស៊ីសេរីនេះ ធ្វើឡើងបន្ទាប់ពីលោកប្រធានាធិបតីអាម៉េរិក ដូណាល់ ត្រាំ បានចុះហត្ថលេខាលើបទបញ្ជា កាលពីថ្ងៃទី១៥ ខែមីនា ឆ្នាំ២០២៥ ស្តីពីការបញ្ចប់ ការផ្តល់ជំនួយថវិកាដល់ទីភ្នាក់ងារ សហរដ្ឋអាម៉េរិកសម្រាប់ប្រព័ន្ធផ្សព្វផ្សាយ សាកល ដែលហៅកាត់ថា USAGM ហើយ USAGM នេះហើយដែលជាស្ថាប័នមេ គ្រប់គ្រង លើ អង្គភាពផ្សព្វផ្សាយព័ត៌មាននានារបស់សហរដ្ឋអាមេរិកដោយក្នុងនោះក៏មាន ទាំងវិទ្យុអាស៊ីសេរី និងវិទ្យុសំឡេងសហរដ្ឋអាម៉េរិក (វីអូអេ) ផងដែរ។
វិទ្យុអាស៊ីសេរីនិងវីអូអេ រួមទាំងស្ថាប័នផ្សព្វផ្សាយដទៃទៀត ទទួលបានជំនួយថវិកានេះបន្តពី USAGM ហើយអាចប្រតិបត្តិការ ការ ផ្សព្វផ្សាយ ព័ត៌មានរបស់ខ្លួន។ការដកជំនួយពី USAGM បណ្តាលឱ្យប៉ះពាល់ជាស្វ័យប្រវត្តិដល់ប្រតិបត្តិការរបស់ប្រព័ន្ធផ្សព្វផ្សាយដែលជាបណ្តាញថ្នាក់ក្រោម។
លោកស្រី បេយ៍ ហ្វាង នាយិកាវិទ្យុអាស៊ីសេរីលើកឡើងថា វិទ្យុ អាស៊ីសេរី បាន ក្លាយជាមូលដ្ឋានគ្រឹះដ៏សំខាន់ក្នុងការជួយ ដល់ ក្រុម អ្នក ធ្វើ គោលនយោបាយ សហរដ្ឋអាម៉េរិកឱ្យយល់ដឹង អំពី ការពិត ដែលកំពុងកើតមានឡើងនៅក្នុងប្រទេសនានាក្នុងតំបន់អាស៊ី។
លោកស្រីនាយិកា អះអាងថា ការផ្តាច់ជំនួយនេះ គឺជាការដកហូតសិទ្ធិពីមនុស្សជិត ៦០លាន នាក់ដែលពឹងផ្អែកលើសេចក្តីរាយការណ៍របស់វិទ្យុអាស៊ីសេរីដើម្បីស្វែងយល់ពីការពិត។
ទន្ទឹមនឹងការរងផលប៉ះពាល់ពីការផ្តាច់ជំនួយ បុគ្គលិកដល់១៣០០នាក់របស់វីដេអូ ត្រូវបានបញ្ឈប់ពីការងារ ក្រោមសេចក្តីសម្រេចរបស់លោកត្រាំ។ អាស៊ីសេរី និងវីអូអេ ត្រូវបានចាត់ទុកជាប្រព័ន្ធផ្សាយផ្សាយធំ២ក្នុងការផ្សព្វផ្សាយអំពីប្រទេសកម្ពុជា៕
