ក្រុមធុរកិច្ចថៃ ជំរុញឱ្យលោកស្រីនាយករដ្ឋមន្ត្រី ចរចាជាមួយសហរដ្ឋអាម៉េរិក និងពិចារណាកាត់បន្ថយពន្ធនាំចូលលើទំនិញរបស់សហរដ្ឋអាម៉េរិក
បាងកក៖ ក្រុមធុរកិច្ចថៃ បានជំរុញឱ្យលោកស្រីនាយករដ្ឋមន្ត្រី ផែថងថាន ឈីនៈវ័តរ៍ ចរចាជាមួយសហរដ្ឋអាម៉េរិក និងពិចារណាកាត់បន្ថយពន្ធនាំចូលលើទំនិញរបស់សហរដ្ឋអាម៉េរិក ខណៈរាជរដ្ឋាភិបាលបានជួបជាមួយវិស័យឯកជន ដើម្បីពិភាក្សាអំពីគោលនយោបាយពាណិជ្ជកម្មរបស់សហរដ្ឋអាម៉េរិក។
កិច្ចប្រជុំនេះកើតឡើងមុនថ្ងៃកំណត់ដែលលោកប្រធានាធិបតីអាម៉េរិក ដូណាល់ ត្រាំ កំណត់នៅខែក្រោយសម្រាប់ទីភ្នាក់ងារសហព័ន្ធ ដើម្បីបំពេញការពិនិត្យឡើងវិញដ៏ទូលំទូលាយនៃបញ្ហាពាណិជ្ជកម្មជាច្រើន រួមទាំងការវិភាគអំពីឱនភាពពាណិជ្ជកម្មរបស់សហរដ្ឋអាម៉េរិក។
គណៈកម្មាធិការអចិន្ត្រៃយ៍រួមរបស់ប្រទេសថៃ ស្តីពីពាណិជ្ជកម្ម ឧស្សាហកម្ម និងធនាគារ ជាក្រុមវិស័យឯកជនក៏បានស្នើឱ្យមានការនាំចូលទំនិញពីសហរដ្ឋអាម៉េរិកបន្ថែមទៀត ដើម្បីកាត់បន្ថយគម្លាតពាណិជ្ជកម្មជាមួយរដ្ឋធានីវ៉ាស៊ីនតោន។
ប្រធានសភាពាណិជ្ជកម្មថៃ លោក សៈន័ន អាំងឧប៊ុលគុល (สนั่น อังอุบลกุล) បានប្រាប់អ្នកសារព័ត៌មានថា វិស័យឯកជនពេញចិត្តនឹងការពិភាក្សានេះ ដោយបន្ថែមថា ប្រទេសថៃនឹងមិនជួបការលំបាកក្នុងការចរចាជាមួយសហរដ្ឋអាម៉េរិកទេ ដោយសារតែអាជីវកម្មបានចែករំលែកព័ត៌មានជាមួយរាជរដ្ឋាភិបាល។
លោកបន្តថា៖«ការបើកទីផ្សាររដល់ការនាំចូលកាន់តែច្រើនគឺចាំបាច់ ប៉ុន្តែការចរចាត្រូវតែធ្វើឡើងដើម្បីផលប្រយោជន៍ទៅវិញទៅមកនៃប្រទេសទាំងពីរ»។ សភាពាណិជ្ជកម្មថៃ កាលពីសប្តាហ៍មុនបានជំរុញឱ្យមានចំណាត់ការរបស់រាជរដ្ឋាភិបាល ដើម្បីឆ្លើយតបចំពោះភាពមិនច្បាស់លាស់នៃគោលនយោបាយពាណិជ្ជកម្មរបស់សហរដ្ឋអាម៉េរិក ហើយបានស្នើឱ្យមាន «បន្ទប់សង្គ្រាម» ដើម្បីទប់ស្កាត់ការគំរាមកំហែងនៃពន្ធគយដោយរដ្ឋបាលរបស់លោក ត្រាំ។
យោងតាមតួលេខរបស់រាជរដ្ឋាភិបាល សហរដ្ឋអាម៉េរិក គឺជាទីផ្សារនាំចេញដ៏ធំបំផុតរបស់ប្រទេសថៃក្នុងឆ្នាំ២០២៤ ស្មើនឹង១៨,៣ ភាគរយនៃការនាំចេញសរុប ឬ៥៤,៩៦ពាន់លានដុល្លារ។ នៅក្នុងតំបន់អាស៊ី វៀតណាម កោះតៃវ៉ាន់ និងថៃ ប្រឈមមុខខ្លាំងនឹងលទ្ធភាពនៃការបង្កើនពន្ធរបស់សហរដ្ឋអាម៉េរិក ដោយសារសមាមាត្រនៃការនាំចេញផលិតផលក្នុងស្រុកសរុប (GDP) ខ្ពស់ជាមួយសហរដ្ឋអាម៉េរិក។
លោកស្រីនាយករដ្ឋមន្ត្រី ផែថងថាន បាននិយាយថា លោកស្រីបានធានាដល់វិស័យឯកជន រាជរដ្ឋាភិបាលមានយុទ្ធសាស្ត្រលើបញ្ហាពាណិជ្ជកម្មរបស់សហរដ្ឋអាម៉េរិក។ លោកស្រីបាននិយាយនៅក្នុងការបង្ហោះប្រព័ន្ធផ្សព្វផ្សាយសង្គម បន្ទាប់ពីកិច្ចប្រជុំថា រាជរដ្ឋាភិបាលកំពុងតាមដានយ៉ាងដិតដល់នូវស្ថានភាព ដោយបន្ថែមថា គណៈកម្មាធិការរដ្ឋាភិបាលនឹងជំរុញគោលនយោបាយដែលនឹងផ្តល់ផលប្រយោជន៍ដល់ប្រទេសទាំងពីរ៕
