អ្នកឃ្លាំមើល៖ យ៉ាងហោចណាស់ជនស៊ីវិល ១,៣៨៣នាក់ត្រូវបានសម្លាប់នៅក្នុងអំពើហឹង្សានៅតំបន់ឆ្នេរសមុទ្រស៊ីរី
បរទេស៖ យ៉ាងហោចណាស់ជនស៊ីវិល ១,៣៨៣នាក់ត្រូវបានសម្លាប់នៅក្នុងរលកនៃអំពើហិង្សានាពេលថ្មីៗនេះ នៅក្នុងតំបន់ឆ្នេរនៃប្រទេសស៊ីរី នេះបើយោងតាមការចុះផ្សាយរបស់ទីភ្នាក់ងារសារព័ត៌មាន ស៊ីនហួរ កាលពីថ្ងៃពុធ ទី១២ ខែមីនា ម្សិលមិញនេះ។
អំពើហឹង្សាបានផ្ទុះឡើងកាលពីថ្ងៃទី៦ ខែមីនា ដែលបង្កឡើងដោយការវាយប្រហារសម្របសម្រួលដោយក្រុមប្រដាប់អាវុធដែលស្មោះត្រង់នឹងអតីតប្រធានាធិបតី លោក Bashar al-Assad ទៅលើកងកម្លាំងសន្តិសុខក្នុងខេត្ត Latakia ជាប់មាត់សមុទ្រ ដែលបានសម្លាប់បុគ្គលិកសន្តិសុខយ៉ាងហោចណាស់ ១៦នាក់ នេះបើយោងតាមក្រសួងការពារប្រទេសស៊ីរី។
អ្នកនាំពាក្យសិទ្ធិមនុស្សរបស់អង្គការសហប្រជាជាតិ លោក Thameen Al-Kheetan បានឲ្យដឹងកាលពីថ្ងៃអង្គារថា អំពើហឹង្សាបានកើនឡើងយ៉ាងលឿនទៅជាការប៉ះទង្គិចគ្នាផ្នែកនិកាយកាន់តែទូលំទូលាយ ដោយផ្តោតសំខាន់លើទីប្រជុំជន និងភូមិភាគច្រើននៃ Alawite។
លោកបានបន្ថែមថា ការស៊ើបអង្កេតដំបូងបង្ហាញថាជនល្មើសរួមមានក្រុមយុទ្ធជនដែលមានទំនាក់ទំនងជាមួយអាជ្ញាធរបណ្តោះអាសន្នរបស់ស៊ីរីក៏ដូចជាក្រុមគាំទ្រលោកអាសាដ។ សហគមន៍ Alawite គឺជានិកាយជនជាតិភាគតិចដែលគ្រប់គ្រងរចនាសម្ព័ន្ធអំណាចរបស់ស៊ីរីក្រោមការដឹកនាំរបស់លោក Assad។
រហូតមកដល់ពេលនេះ ក្រុមសង្កេតការណ៍ដែលមានមូលដ្ឋាននៅចក្រភពអង់គ្លេសបានចងក្រងឯកសារមរណភាពជនស៊ីវិលយ៉ាងហោចណាស់ ១,៣៨៣នាក់ ដោយព្រមានប្រឆាំងនឹងនីតិវិធីបញ្ចុះសពមិនត្រឹមត្រូវ ដោយសារទំហំនៃអំពើហិង្សាប៉ះពាល់ដល់សមត្ថភាពក្នុងតំបន់ក្នុងការគ្រប់គ្រងវិបត្តិ។
លោកបានបន្ថែមថាចំនួនអ្នកស្លាប់ទំនងជានឹងកើនឡើងនៅពេលដែលសាកសពកាន់តែច្រើនត្រូវបានគេរកឃើញ ជាមួយនឹងការស្លាប់ចុងក្រោយបង្អស់ត្រូវបានកត់ត្រានៅក្នុងខេត្ត Latakia, Tartous និង Hama។
កាលពីថ្ងៃអាទិត្យ ប្រធានាធិបតីបណ្តោះអាសន្នស៊ីរី លោក Ahmed al-Sharaa បានបញ្ជាឱ្យបង្កើតគណៈកម្មាធិការជាតិឯករាជ្យមួយ ដើម្បីស៊ើបអង្កេតលើអំពើហឹង្សា និងធ្វើឱ្យជនល្មើសទទួលខុសត្រូវ។ គណៈកម្មាធិការត្រូវបំពេញបេសកកម្មរបស់ខ្លួនក្នុងរយៈពេល ៣០ថ្ងៃ។
កាលពីថ្ងៃច័ន្ទ ក្រសួងការពារជាតិបានប្រកាសពីការបញ្ចប់ប្រតិបត្តិការយោធារបស់ខ្លួននៅក្នុងតំបន់ឆ្នេរ ដោយបញ្ជាក់នៅក្នុងសេចក្តីថ្លែងការណ៍ថា គោលដៅយុទ្ធសាស្ត្រ ទាំងអស់ត្រូវបានសម្រេច ជាមួយនឹងការស្តារសន្តិសុខឡើងវិញ ធាតុអរិភាពត្រូវបានបន្សាប ឬបណ្តេញចេញ និងហេដ្ឋារចនាសម្ព័ន្ធសំខាន់ៗត្រូវបានការពារ។
