សហភាពចលនាកម្មករកម្ពុជាថា ការបង្កើតទារកដ្ឋាននៅក្នុងរោងចក្រ សហគ្រាស គឺជាអ្វីដែលសហជីពស្វាគមន៍ និងចង់បាន

ភ្នំពេញ៖ លោកស្រី កេន ឆេងឡាង អនុប្រធានសហភាពចលនាកម្មករកម្ពុជាបានលើកឡើងថា ការបង្កើតទារកដ្ឋានសម្រាប់មើលថែទារក និងកុមារជាកូនរបស់កម្មករនិយោជិត គឺជាអ្វីដែលសហជីពចង់បាន និងគាំទ្រយ៉ាងពេញទំហឹង។ ទារកដ្ឋានដើរតួនាទីសំខាន់ណាស់ក្នុងការមើលថែទាំទារក និងកុមារប្រកបដោយផាសុខភាព អំឡុងពេលបងប្អូនកម្មករនិយោជិតជាអាណាព្យាបាលកំពុងធ្វើការ។

អនុប្រធានសហភាពចលនាកម្មករកម្ពុជារូបនេះ បានគូសបញ្ជាក់បន្ថែមថា ការបង្កើតឱ្យមានទារកដ្ឋាននៅតាមបណ្តារោងចក្រ សហគ្រាស គឺជារឿងល្អ និងជាការផ្តល់នូវឧត្តមប្រយោជន៍ដល់បងប្អូនកម្មករនិយោជិត ពីព្រោះកម្មការិនីដែលមានកូនតូចៗអាចយកកូនរបស់ពួកគេទៅតាមនៅកន្លែងធ្វើការបាន ដោយដាក់ឱ្យមើលថែទាំនៅក្នុងទារកដ្ឋាន ដែលនៅក្បែររោងចក្រ សហគ្រាស របស់ពួកគេ។

ក្នុងនាមជាថ្នាក់ដឹកនាំសហជីព លោកស្រី កេន ឆេងឡាង រីករាយនៅពេលដែលទារកដ្ឋាននៅក្នុងរោងចក្រ សហគ្រាសដំបូងរបស់កម្ពុជាត្រូវបានដាក់ឱ្យប្រើប្រាស់។ លោកស្រីក៏វាយតម្លៃខ្ពស់ចំពោះការប្តេជ្ញាចិត្តរបស់រាជរដ្ឋាភិបាលលើការបន្តធ្វើឱ្យមានទារកដ្ឋាននៅតាមបណ្តារោងចក្រ សហគ្រាសនានា នៅទូទាំងប្រទេសថែមទៀត។

គួរបញ្ជាក់ថា រាជរដ្ឋាភិបាលកម្ពុជាកាលពីថ្ងៃទី១០ ខែមីនា ឆ្នាំ២០២៥ ថ្មីៗនេះបានសម្ពោធដាក់ឱ្យប្រើប្រាស់ទារកដ្ឋានរោងចក្រកាត់ដេរ ម៉ាវ៉ល ស្ថិតនៅតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ(Royal Group Phnom Penh SEZ) នៅក្នុងខណ្ឌកំបូល រាជធានីភ្នំពេញ។ ការសាងសង់ទារកដ្ឋាននេះ គឺជាអនុសាសន៍១ ក្នុងចំណោមអនុសាសន៍ទាំង១០ ដែលសម្តេចធិបតីនាយករដ្ឋមន្រ្តីបានផ្តល់ជូនក្រសួងការងារ និងបណ្តុះបណ្តាល សហការជាមួយភាគីពាក់ព័ន្ធក្នុងការសិក្សាលទ្ធភាពបង្កើតទារកដ្ឋាន និងមត្តេយ្យសហគមន៍ នៅតាមតំបន់ប្រមូលផ្តុំរោងចក្រ។

គោលបំណងនៃការបង្កើតទារកដ្ឋាននៅតាមសហគ្រាស គ្រឹះស្ថាន គឺដើម្បីធានាថា ទារកនិងកុមារទាំងនោះទទួលបានការថែទាំនិងអប់រំប្រកបដោយគុណភាព និងស្តង់ដាដែលជួយគាំទ្រការលូតលាស់ និងការអភិវឌ្ឍផ្នែករាងកាយ ព្រមទាំងផ្នែកបញ្ញានិងស្មារតី ក៏ដូចជាផ្តល់ពេលវេលាឱ្យឳពុកម្តាយ ឬអាណាព្យាបាលដែលជាកម្មករនិយោជិតមានឱកាសធ្វើការងារដើម្បីទទួលបានប្រាក់ចំណូល៕