អង់គ្លេស និង បារាំង សង្ឃឹមបញ្ចប់ ផែនការ សន្តិភាព ជូនអ៊ុយក្រែនក្នុង រយៈពេល ប៉ុន្មាន ថ្ងៃ ខាងមុខនេះ

ប៉ារីស៖ ចក្រភព អង់គ្លេស និង បារាំង សង្ឃឹមបញ្ចប់ ផែនការ សន្តិភាព ជូនអ៊ុយក្រែនក្នុង រយៈពេល ប៉ុន្មាន ថ្ងៃ ខាងមុខនេះ ខណៈបងធំអឺរ៉ុបទាំង២ ព្យាយាមជួសជុលទំនាក់ទំនងរវាងសហរដ្ឋអាម៉េរិក-អ៊ុយក្រែនឡើងវិញ មុនពេលទៅសេតវិមានជជែកចរចារកពន្លឺសន្តិភាពជូនអ៊ុយក្រែន។

ប្រធានាធិបតីបារាំង លោក អេម៉ានុយអែល ម៉ាក្រុង និងនាយករដ្ឋមន្ត្រីអង់គ្លេស លោក គៀរ ស្តាមើ បានហៅទូរសព្ទជាច្រើនលើកច្រើនសារជាមួយប្រធានាធិបតីអាម៉េរិក លោក ដូណាល់ ត្រាំ និងមេដឹកនាំអ៊ុយក្រែន លោក វ៉ូឡូឌីមៀ ហ្សេឡេនស្គី ចាប់តាំងពីលោក ត្រាំ និងលោក ហ្សេឡេនស្គី បានប៉ះទង្គិចពាក្យសម្តីគ្នាកាលពីសប្តាហ៍មុននៅការិយាល័យប្រធានាធិបតី ដែលនាំឱ្យមានការផ្អាកជំនួយយោធារបស់សហរដ្ឋអាម៉េរិកដល់រដ្ឋធានកៀវ។ ភាពប្រេះឆានៃទំនាក់ទំនងរវាងសហរដ្ឋអាម៉េរិក និងអ៊ុយក្រែនបានផ្តល់ភាពបន្ទាន់ថ្មីដល់កិច្ចខិតខំប្រឹងប្រែងរបស់មហាអំណាចនុយក្លេអ៊ែរអឺរ៉ុបទាំងពីរ[បារាំង-អង់គ្លេស] ដើម្បីរួមដៃគ្នានាំផែនការសន្តិភាពជាដំបូងដល់អ៊ុយក្រែន និងបង្ហាញពីបទឈប់បាញ់ខ្លីមួយ ដើម្បីធានាសន្តិសុខឱ្យកាន់តែទូលំទូលាយផងដែរ។

អ្នកការទូតជាន់ខ្ពស់អឺរ៉ុបម្នាក់បានសង្កត់ធ្ងន់ថា ៖«យើងកំពុងសម្លឹងមើលការដាក់ផែនការសន្តិភាពរួមគ្នាក្នុងរយៈពេលប៉ុន្មានថ្ងៃខាងមុខនេះ»។

អ្នកការទូតអឺរ៉ុបម្នាក់ទៀតបានលើកឡើងថា ៖«គំនិតនេះគឺផ្តោតលើគ្រប់ភាគីឱ្យបន្ទន់ឥរិយាបថ រួមទាំងកិច្ចសន្ទនាដែលមានភាពល្អប្រសើរជាងមុនរវាងរដ្ឋធានីវ៉ាស៊ីនតោន និងរដ្ឋធានីកៀវ ខណៈនេះគឺជាការបញ្ជាក់សារទៅកាន់សហរដ្ឋអាម៉េរិកថា រុស្ស៊ីជាអ្នកឈ្លានពាន»។

អ្នកនាំពាក្យរដ្ឋាភិបាលបារាំង លោកស្រី សូភី ព្រីម៉ាស បានប្រាប់អ្នកយកព័ត៌មានកាលពីថ្ងៃពុធទី៥ ខែកុម្ភៈថា ដំណើរទស្សនកិច្ចរបស់លោក ម៉ាក្រុង លោក ស្តាមើ និងលោក ហ្សេឡេនស្គី ទៅកាន់សហរដ្ឋអាម៉េរិកកំពុងស្ថិតក្រោមការពិចារណា។

លោកស្រីបន្តថា ៖«យើងបានស្នើឱ្យមានបទឈប់បាញ់។ នោះគឺជាអ្វីដែលកំពុងត្រូវបានសិក្សានៅក្នុងការចរចាជាមួយសហរដ្ឋអាម៉េរិក។ បារាំង និងអឺរ៉ុបកំពុងព្យាយាមផ្សះផ្សារទំនាក់ទំនងឡើងវិញរវាងសហរដ្ឋអាម៉េរិក និងអ៊ុយក្រែន»។ លោក ហ្សេឡេនស្គី អះអាងត្រៀមខ្លួនជាស្រេចដើម្បីចូលតុចរចា និងគាំទ្រផែនការសម្រាប់បទឈប់បាញ់មួយ។

អ្នកការទូតបានលើកឡើងថា ជម្រើសដ៏ល្អនោះគឺបទឈប់បាញ់រយៈពេលមួយខែ ដែលនឹងគ្របដណ្ដប់លើការផ្អាកវាយប្រហារតាមផ្លូវអាកាស និងផ្លូវសមុទ្ទ ព្រមទាំងហេដ្ឋារចនាសម្ព័ន្ធថាមពល ប៉ុន្តែមិនមែនជាការប្រយុទ្ធគ្នានៅលើដីនោះទេ។ ផែនការនេះត្រូវបានគាំទ្រដោយប្រទេសបារាំង អង់គ្លេស និងសម្ព័ន្ធនៃបណ្តាប្រទេសដែលមានឆន្ទៈក្នុងការពន្លត់ភ្លើងសង្គ្រាមនៅអឺរ៉ុបខាងកើតផ្សេងទៀត៕