គម្រោងវិនិយោគមានលក្ខណៈសម្បត្តិគ្រប់គ្រាន់ ១១គម្រោង បានដាក់សំណើសុំចុះបញ្ជីវិនិយោគនៅក្នុងរាជធានី-ខេត្តចំនួន៥ នៃប្រទេសកម្ពុជា

ភ្នំពេញ៖ គម្រោងវិនិយោគមានលក្ខណៈសម្បត្តិគ្រប់គ្រាន់ ១១គម្រោង បានដាក់សំណើសុំចុះបញ្ជីវិនិយោគនៅក្នុងរាជធានី-ខេត្តចំនួន៥ នៃប្រទេសកម្ពុជា។

ក្រោយដាក់សំណើសុំចុះបញ្ជី គម្រោងវិនិយោគមានលក្ខណៈសម្បត្តិគ្រប់គ្រាន់ទាំង១១នេះ ត្រូវបានគណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាកាលពីថ្ងៃទី២០ ខែកុម្ភៈ ឆ្នាំ២០២៥ ក្រោមអធិបតីភាព លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងមានការអញ្ជើញចូលរួមពីសំណាក់តំណាងក្រសួង ស្ថាប័ន និងរដ្ឋបាលរាជធានី-ខេត្តពាក់ព័ន្ធ។

គម្រោងវិនិយោគទាំង១១នេះ មានទុនវិនិយោគសរុបប្រមាណ ៧៤លានដុល្លារអាម៉េរិក អាចបង្កើតការងារបានចំនួនប្រមាណ ៣,៧ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មទាំង១១គម្រោង (ផលិតម្សៅថ្នាំពណ៌, ឧបករណ៍ជាងគ្រប់ប្រភេទ, អំពូលភ្លើងគ្រប់ប្រភេទ, គ្រឿងបន្ទាប់បន្សំអគ្គិសនីគ្រប់ប្រភេទ, សម្ភារៈលម្អក្នុងផ្ទះ, ទឹកថ្នាំបោះពុម្ព និងទឹកថ្នាំទ្រនាប់ប្រហាក់ប្រហែល-ថ្នាំទ្រនាប់កូតហ្វិល និងថ្នាំទ្រនាប់កូតក្រណាត់, គ្រឿងសង្ហារិម, ផលិតអេប៉ុង និងកែច្នៃលោហធាតុគ្រប់ប្រភេទ) ដោយបានបោះទីតាំងវិនិយោគនៅរាជធានីភ្នំពេញ, ខេត្តកណ្តាល តាកែវ កំពង់ស្ពឺ និងស្វាយរៀង។