សម្ដេចធិបតី៖ ករណីប៉ូលីសចរាចរណ៍ជាមួយ បណ្ឌិត សុខ ទូច ទុកឱ្យភាគីទាំងសងខាងសម្របសម្រួលគ្នា ហើយសមត្ថកិច្ចត្រូវពង្រឹងការងារឡើងវិញ

ភ្នំពេញ៖ ក្នុងឱកាសអញ្ជើញជាអធិបតីប្រគល់សញ្ញាបត្រ ជូនដល់និស្សិតសាកលវិទ្យាល័យ អាស៊ី អឺរ៉ុប នៅព្រឹកថ្ងៃទី១៩ ខែកុម្ភៈ ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា ករណីប៉ូលីសចរាចរណ៍ជាមួយ បណ្ឌិត សុខ ទូច ទុកឱ្យភាគីទាំងសងខាងសម្របសម្រួលគ្នា ហើយសមត្ថកិច្ចត្រូវពង្រឹង ការងារឡើងវិញ។

សម្តេចធិបតី មានប្រសាសន៍ថា “មុនខ្ញុំមក មានគេលើយោបល់ថា សម្ដេច ជួយលើកឡើងផង ប៉ូលីស ជាមួយ បណ្ឌិត សុខ ទូច។ រឿងលូមួយកង់ ៤០ដុល្លារ។ ខ្ញុំ ថា រឿងច្រើនណាស់ ហើយអាហ្នឹង រឿងប៉ូលីស ទុកឱ្យគេដោះស្រាយ សម្របសម្រួលហើយយើងពង្រឹងមើលទៅ។ បើខ្ញុំ និយាយគ្រប់តែរឿង មិនដឹងនិយាយយ៉ាងម៉េច។ ហើយអ្នកលើកយោបល់មកខ្ញុំ មិនមែនតូចទេ សុទ្ធតែបណ្ឌិត អ្នកវិភាគ”។

សូមរំលឹកថា បណ្ឌិត សុខ ទូច ប្រធានរាជបណ្ឌិត្យសភាកម្ពុជា ត្រូវបានកម្លាំងអធិការដ្ឋាននគរបាលខណ្ឌសែនសុខ ឃាត់ត្រួតពិនិត្យជាតិស្រវឹង នៅចំណុចផ្លូវភ្នំពេញហាណូយ មុខសាលាបឋមសិក្សាភ្នំពេញថ្មី រហូតកើតជាជម្លោះពាក្យសម្តី ការកើតមានជម្លោះនេះបណ្ដាលឲ្យមានការវែកញ៉ែកតាមបណ្ដាញសង្គមផងដែរ៕