ភ្នំពេញ៖ ឯកឧត្តម សុខ សូកេន រដ្ឋមន្ត្រីក្រសួងអធិការកិច្ច នាថ្ងៃទី១១ ខែកុម្ភៈ ឆ្នាំ២០២៥ បានទទួលជួបសម្ដែងការគួរសម និងពិភាក្សាការងារជាមួយ ឯកឧត្តម Shaharuddin Onn ឯកអគ្គរាជទូតវិសាមញ្ញ និងពេញសមត្ថភាពនៃប្រទេសម៉ាឡេស៊ី ប្រចាំព្រះរាជាណាចក្រកម្ពុជា ព្រមទាំងសហការី ក្នុងគោលបំណងពិភាក្សាលើការពង្រឹងកិច្ចសហប្រតិបត្តិការទំនាក់ទំនងទ្វេភាគីរវាងកម្ពុជា និងម៉ាឡេស៊ីក្នុងវិស័យអធិការកិច្ច។
ឆ្លៀតក្នុងឱកាសនោះ ឯកឧត្តមរដ្ឋមន្រ្តី បានលើកឡើងអំពីយុទ្ធសាស្រ្តអាទិភាពទាំង ៨ ចំណុចរបស់ក្រសួងអធិការកិច្ច រួមមាន៖ (១) ពង្រឹងសមត្ថភាពស្ថាប័ន និងកសាងនិងអភិវឌ្ឍមូលធនមនុស្ស, (២) ការរៀបចំច្បាប់ និងលិខិតបទដ្ឋានគតិយុត្ត នៅក្នុងសមត្ថកិច្ចក្រសួងអធិការកិច្ច, (៣) ជំរុញការទទួលពិនិត្យ និងដោះស្រាយពាក្យបណ្តឹង, (៤) ជំរុញកិច្ចសហប្រតិបត្តិការ និងភាពជាដៃគូជាមួយស្ថាប័នរដ្ឋ ឯកជន និងដៃគូសំខាន់ៗនានា ដើម្បីពង្រឹងវិស័យអធិការកិច្ច, (៥) ពង្រឹងប្រសិទ្ធភាពនៃការតាមដានការអនុវត្តច្បាប់ និងអនុសាសន៍របស់ប្រមុខរាជរដ្ឋាភិបាល, (៦) ជំរុញ និងពង្រឹងការងារអធិការកិច្ច, (៧) ជំរុញការអប់រំផ្សព្វផ្សាយច្បាប់ និងវេទិកាសាធារណៈ, និង (៨) ជំរុញការប្រើប្រាស់បច្ចេកវិទ្យាឌីជីថលក្នុងវិស័យអធិការកិច្ច។
ជាកិច្ចបញ្ចប់ ភាភាគីទាំងពីរបានបញ្ជាក់នូវការប្តេជ្ញាចិត្តរួមក្នុងការពង្រឹងកិច្ចសហប្រតិបត្តិការលើវិស័យអធិការកិច្ច និងពិភាក្សាពីលទ្ធភាពរៀបចំដំណើរទស្សនកិច្ចការងារ និងការផ្លាស់ប្តូររវាងក្រសួងអធិការកិច្ចនៃប្រទេសកម្ពុជា និងស្ថាប័នពាក់ព័ន្ធនៃប្រទេសម៉ាឡេស៊ី ៕
