រថយន្តក្រុង១គ្រឿង បើកធ្លាក់ស្ពានចូលក្នុងជ្រោះ នៅរដ្ឋធានីហ្កាតេម៉ាឡា បណ្ដាលឲ្យមនុស្សយ៉ាងតិចណាស់ ៥១នាក់ស្លាប់
ហ្កាតេម៉ាឡា៖ រថយន្តក្រុងមួយគ្រឿងបានបើកធ្លាក់ស្ពានចូលទៅក្នុងជ្រោះក្នុងរដ្ឋធានីហ្កាតេម៉ាឡា នៅព្រឹកថ្ងៃចន្ទទី១០ ខែកុម្ភៈ ដោយបានប្រល័យជីវិតមនុស្សយ៉ាងតិចណាស់៥១ នាក់ ខណៈអ្នកនៅរស់រានមានជីវិតកំពុងជាប់គាំងក្នុងរថយន្ត។ នេះបើតាមអ្នកនាំពាក្យនាយកដ្ឋានពន្លត់អគ្គិភ័យ។
រថយន្តក្រុងមួយគ្រឿង ដែលផ្ទុកមនុស្សជាច្រើននាក់កំពុងធ្វើដំណើរចេញពីទីក្រុង San Agustin Acasaguastlan ទៅកាន់រដ្ឋធានីហ្កាតេម៉ាឡា។ ខណៈកំពុងតែធ្វើដំណើរនៅលើផ្លូវដ៏មមាញឹកមួយ ស្រាប់តែរថយន្តក្រុងនោះ បានជ្រួសធ្លាក់ចុះប្រហែល ២០ម៉ែត្រចេញពីស្ពានផ្លូវហាយវេ ចូលទៅក្នុងជ្រោះ។
រូបភាពដែលបានចែករំលែកដោយនាយកដ្ឋានពន្លត់អគ្គីភ័យនៅលើប្រព័ន្ធផ្សព្វផ្សាយសង្គមបានបង្ហាញពីរថយន្តក្រុងមួយផ្នែកបានលិចនៅក្នុងទឹកសំណល់ខ្មៅកខ្វក់ព័ទ្ធជុំវិញសាកសពជនរងគ្រោះ។ ពាក្យនាយកដ្ឋានពន្លត់អគ្គិភ័យលោក ខាឡូស ហើណាន់ដែស (Carlos Hernandez) បានអះអាងថា សាកសពបុរស ៣៦នាក់ និងស្ត្រី ១៥នាក់ ត្រូវបានបញ្ជូនទៅកន្លែងបញ្ចុះសពខេត្ត។
ជុំវិញបញ្ហានេះ ប្រធានាធិបតីហ្កាតេម៉ាឡា លោក បើណារដូ អារ៉េវ៉ាឡូ (Bernardo Arevalo) បានប្រកាសកាន់ទុក្ខជាតិរយៈពេលបីថ្ងៃ ហើយបានដាក់ពង្រាយកងទ័ព និងទីភ្នាក់ងារគ្រោះមហន្តរាយរបស់ប្រទេស ដើម្បីជួយដល់កិច្ចខិតខំប្រឹងប្រែងឆ្លើយតបទៅនឹងសោកនាដកម្មនេះ។ ជាចុងក្រោយ ប្រធានាធិបតីប្រទេសនេះបានចូលរួមរំលែកទុកលើប្រព័ន្ធផ្សព្វផ្សាយសង្គមថា «ខ្ញុំឈរនៅក្នុងជំហរសាមគ្គីភាពជាមួយក្រុមគ្រួសារនៃជនរងគ្រោះ ដោយថ្ងៃនេះភ្ញាក់ឡើងជាមួយនឹងដំណឹងដ៏សោកសៅ។ ការឈឺចាប់របស់ពួកគេគឺជាការឈឺចាប់របស់ខ្ញុំ»៕
