ប្រទេសក្នុងតំបន់បាល់ទិកទាំង៣ បានកាត់ផ្តាច់ប្រព័ន្ធអគ្គិសនីរបស់ពួកគេពីបណ្តាញអគ្គិសនីរបស់រុស្ស៉ី
បរទេស៖ ប្រតិបត្តិករក្នុងតំបន់ បានឲ្យដឹងថា ប្រទេសក្នុងតំបន់បាល់ទិកទាំង៣ បានកាត់ផ្តាច់ប្រព័ន្ធអគ្គិសនីរបស់ពួកគេពីបណ្តាញអគ្គិសនីរបស់រុស្ស៉ី នាថ្ងៃសៅរ៍ ទី៨ ខែកុម្ភៈនេះហេីយ ជាផ្នែកមួយនៃផែនការដែលបង្កេីតឡើងដើម្បីធ្វើសមាហរណកម្មប្រទេស ឱ្យកាន់តែជិតស្និទ្ធជាមួយសហភាពអឺរ៉ុប និងជំរុញសន្តិសុខ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។
ប្រទេសអេស្តូនី, ឡេតូនី និងប្រទេសលីទុយអានី បានផ្តាច់ខ្សែចេញពីបណ្តាញរួម IPS/UPS ហើយពួកគេនឹងងាកមកភ្ជាប់ជាមួយបណ្តាញរបស់សហភាពអឺរ៉ុប នៅថ្ងៃអាទិត្យ។ អ្នកគាំទ្រដ៏រឹងមាំទាំង ៣នៃទីក្រុងកៀវ បានបញ្ឈប់ការទិញថាមពលពីរុស្ស៉ីបន្ទាប់ពីការឈ្លានពានលេីអ៊ុយក្រែន ប៉ុន្តែបនៅពឹងផ្អែកលើខ្សែបណ្តាញអគ្គិសនីដើម្បីគ្រប់គ្រងប្រេកង់ និងស្ថេរភាព ជៀសវាងការដាច់ភ្លើង។
រដ្ឋមន្ត្រីក្រសួងថាមពលលីទុយអានី លោក Zygimantas Vaiciunas បានប្រាប់សន្និសីទសារព័ត៌មានមួយថា យើងបានឈានដល់គោលដៅ ដែលយើងខិតខំអស់រយៈពេលយូរមកហើយ។
លោក Kaspars Melnis រដ្ឋមន្ត្រីក្រសួងថាមពលឡេតូនី បានប្រាប់ Reuters ថាយើងនឹងមិនប្រើបណ្តាញអគ្គិសនីរុស្ស៉ីទៀតទេឡេីយ។
រដ្ឋមន្ត្រីការបរទេសអេស្តូនី លោក Margus Tsahkna បានឲ្យដឹងថា តាមរយៈការបញ្ចប់ការពឹងផ្អែកថាមពលនៃរដ្ឋបាល់ទិកលើរុស្សី ស្មេីនឹងធ្វេីឱ្យអ្នកឈ្លានពានគ្មានជម្រើសប្រើប្រាស់ថាមពលជាអាវុធប្រឆាំងនឹងយើង។
គួរបញ្ជាក់ថា ផែនការកាត់ផ្តាច់ខ្សែបណ្តាញអគ្គិសនីរបស់ប្រទេសក្នុងតំបន់បាល់ទិក ដែលពិភាក្សាគ្នាអស់រយៈពេលជាច្រើនទសវត្សរ៍មកហេីយ ហាក់មានសន្ទុះបន្ទាប់ពីរុស្ស៉ីកាត់បញ្ចូលតំបន់គ្រីមៀ ជាទឹកដីរបស់ខ្លួនកាលពីឆ្នាំ ២០១៤។
