ឆ្មាំឆ្នេរសមុទ្រអាមេរិក នៅរដ្ឋអាឡាស្កា រកឃើញបំណែកយន្តហោះធុនតូចមួយគ្រឿង ដែលបានបាត់ខ្លួន កាលពីថ្ងៃទី៦ កុម្ភៈ

វ៉ាស៊ីនតោ៖ ឆ្មាំឆ្នេរសមុទ្ទអាម៉េរិកនៅរដ្ឋអាឡាស្កាកាលពីថ្ងៃសុក្រទី៧ ខែមករា បានរកឃើញបំណែកយន្តហោះធុនតូចមួយគ្រឿង ដែលបានបាត់ខ្លួនកាលពីថ្ងៃព្រហស្បតិ៍ទី៦ ខែកុម្ភៈ ដោយមានផ្ទុកមនុស្សចំនួន១០នាក់។ ឆ្មាំឆ្នេរសមុទ្របញ្ជាក់ថា គ្មានអ្នកនៅរស់រានមានជីវិតទេ។ មកទល់ពេលនេះសាកសពចំនួន៣ នាក់ត្រូវបានរកឃើញ។

ឆ្មាំសមុទ្ទអាម៉េរិកបានលើកឡើងនៅលើបណ្តាញសង្គម X ថា ៖«សាកសពមនុស្ស ៧នាក់ដែលនៅសេសសល់ត្រូវបានគេជឿថាស្ថិតនៅក្នុងយន្តហោះ ប៉ុន្តែបច្ចុប្បន្នមិនអាចយកចេញបានទេ ដោយសារតែស្ថានភាពនៃយន្តហោះខូចខាតខ្លាំង» ។ ឆ្មាំសមុទ្ទបានបន្ថែមថា ៖«យើងចូលរួមរំលែកទុក្ខដ៏ក្រៀមក្រំរបស់យើងចំពោះអ្នកដែលរងគ្រោះដោយឧប្បត្តិហេតុសោកនាដកម្មនេះ»។

យន្តហោះដឹកអ្នកដំណើរធុនតូច Cessna 208B Grand Caravan ដឹកមនុស្ស ១០នាក់ ត្រូវបានគេរាយការណ៍ថាបានបាត់ខ្លួនក្នុងការធ្វើដំណើរចេញពីទីក្រុង Unalakleet ទៅកាន់ទីក្រុង Nome ប្រហែលម៉ោង ៤រសៀល។ ឆ្មាំឆ្នេរសមុទ្ទបានឱ្យដឹងថា យន្តហោះនេះបានបាត់ខ្លួនប្រហែល១៩គីឡូម៉ែត្រពីឆ្នេរសមុទ្ទ Norton Sound ដែលជាផ្នែកមួយនៃសមុទ្ទ Bering ។ ជុំវិញបញ្ហានេះ ក្រុមមន្ត្រីបានអះអាងថា អាកាសធាតុមិនល្អ និងខ្យល់បក់បោកខ្លាំងនៅក្នុងតំបន់ បណ្តាលឱ្យយន្តហោះធ្លាក់ភ្លាមៗ។

គួរបញ្ជាក់ថា ប៉ុន្មានថ្ងៃថ្មីៗនេះសហរដ្ឋអាម៉េរិកបានជួបប្រទះបញ្ហាអាកាសចរណ៍ជារឿយៗ ជាក់ស្តែង ហេតុការណ៍បុកគ្នាកណ្តាលលម្ហអាកាសរវាងយន្តហោះដឹកអ្នកដំណើរ និងឧទ្ធម្ភាគចក្រ Black Hawk របស់យោធាសហរដ្ឋអាម៉េរិកនៅរដ្ឋធានីវ៉ាស៊ីនតោន ដោយបានផ្តាច់ជីវិតមនុស្ស ៦៧នាក់។ បន្ទាប់មកក៏មានករណីធ្លាក់យន្តហោះពេទ្យមួយគ្រឿងនៅទីក្រុង Philadelphia ដែលបានសម្លាប់មនុស្ស៧នាក់ផងដែរ៕