អភិបាលខេត្តតាកែវ ប្ដេជ្ញាបន្តអនុវត្តច្បាប់ស្ដីពីការប្រឆាំងអំពើពុករលួយ ឱ្យកាន់តែប្រសើរ និងមានប្រសិទ្ធភាពខ្ពស់ថែមទៀត

ភ្នំពេញ៖ ក្នុងឱកាសអញ្ជើញទទួលជួបសម្ដែងការគួរសម និងពិភាក្សាការងារ ជាមួយប្រតិភូគណៈកម្មការទី១០ នៃព្រឹទ្ធសភា ដឹកនាំដោយ ឯកឧត្តម ម៉ម ប៊ុននាង ប្រធានគណ:កម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា នៅថ្ងៃទី៥ ខែមករា ឆ្នាំ២០២៥ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានលើកឡើងពីការប្ដេជ្ញាបន្តអនុវត្តច្បាប់ ស្ដីពីការប្រឆាំងអំពើពុករលួយ ឱ្យកាន់តែប្រសើរ និងមានប្រសិទ្ធភាពខ្ពស់ថែមទៀត។

ថ្លែងក្នុងឱកាសអញ្ជើញដឹកនាំគណៈប្រតិភូ គណៈកម្មការអង្គេត បោសសំអាត និងប្រឆាំងអំពើពុករលួយនៃព្រឹទ្ធសភា ជួបពិភាក្សាការងារជាមួយរដ្ឋបាលខេត្តតាកែវ ឯកឧត្តម ម៉ម ប៊ុននាង បានធ្វើការស្នើដល់អាជ្ញាធរខេត្តតាកែវ រួមនឹងមន្រ្តីពាក់ព័ន្ធទាំងអស់ បន្តការយកចិត្តទុកដាក់ពង្រឹងការអនុវត្តច្បាប់ ប្រឆាំងអំពើពុករលួយ ឲ្យកាន់តែល្អប្រសើរថែមទៀត ប្រកបដោយប្រសិទ្ធភាពខ្ពស់។

ឯកឧត្តម ប្រធានគណៈកម្មការទី១០ នៃព្រឹទ្ធសភា បានថ្លែងថា កន្លងមកនេះសង្កេតឃើញថាខេត្តតាកែវបានអនុវត្តច្បាប់ ស្ដីពីការប្រឆាំងអំពើពុករលួយបានល្អប្រសើរគួរជាទីមោទនៈ ហើយថ្មីៗនេះរដ្ឋបាលខេត្តបានសហការជាមួយអង្គភាពប្រឆាំងអំពើពុករលួយបានស្រាវជ្រាវរកឃើញមានមន្រ្តីរាជការ កងម្លាំងប្រដាប់អាវុធចំនួន៦នាក់ ក្នុងខេត្តតាកែវ បានប្រព្រឹត្តអំពើពុករលួយ ឃុបឃិត កេងប្រវ័ញ្ញ ទទួលសំណូកផ្សេងៗ ជាថ្នូរមិនបង្ក្រាបបទល្មើស ដែលនេះជាចំណុចកោតសសើរដល់អាជ្ញាធរខេត្តបានចូលរួមយ៉ាងសកម្មក្នុងកិច្ចការងារនេះ និងសូមបន្តពង្រឹងការអនុវត្តច្បាប់ប្រឆាំងអំពើពុករលួយ និងដាក់វិធានការដ៏តឹងរឹងបន្ថែមទៀត ដើម្បីជាគំរូដល់មន្រ្តីរាជការដៃទៀតឲ្យគោរពច្បាប់ វិន័យ អង្គភាពស្ថាប័នដែលបានកំណត់។

ឆ្លើយតបទៅនឹងការលើកឡើងរបស់គណៈកម្មកាទី១០នៃព្រឹទ្ធសភានេះដែរ ឯកឧត្តម វ៉ី សំណាង អភិបាលខេត្តតាកែវក៏បានទទួលយកសំណើរដែលបានលើកឡើង និងប្ដេជ្ញាបន្តអនុវត្តច្បាប់ ស្ដីពីការប្រឆាំងអំពើពុករលួយឲ្យកាន់តែប្រសើរ និងមានប្រសិទ្ធភាពខ្ពស់ ថែមទៀត។

ឆ្លៀតក្នុងឱកាសនោះ ឯកឧត្តមអភិបាលខេត្តតាកែវ ក៏បានធ្វើការណែនាំ និងរំលឹកដល់មន្រ្តីរាជការ កងកម្លាំងទាំងអស់ ត្រូវចៀសឲ្យឆ្ងាយពីអំពើពុករលួយផ្សេងៗ ក្នុងករណីរកឃើញមន្រ្តីណាម្នាក់ប្រព្រឹត្តអំពើពុករលួយគឺច្បាប់មិនមានការលើកលែងនោះទេ ពោលត្រូវអនុវត្តតាមអភិក្រមទាំង៥ គឺឆ្លុះកញ្ចក់ ងូតទឹក ដុសក្អែល ព្យាបាល និងវះកាត់៕