ប៉េកាំង៖ ក្រសួងពាណិជ្ជកម្មចិន (MOC) បានបញ្ជាក់នៅថ្ងៃអាទិត្យនេះថា ប្រទេសចិនមានការមិនពេញចិត្តជាខ្លាំងចំពោះការសម្រេចចិត្តរបស់សហរដ្ឋអាមេរិកក្នុងការដាក់ពន្ធបន្ថែម ១០ភាគរយលើទំនិញដែលនាំចូលពីប្រទេសចិន។
អ្នកនាំពាក្យ MOC បានបញ្ជាក់នៅក្នុងសេចក្តីថ្លែងការណ៍មួយថា ដើម្បីឆ្លើយតបទៅនឹងសកម្មភាពខុសឆ្គងរបស់សហរដ្ឋអាមេរិក ប្រទេសចិននឹងដាក់ពាក្យបណ្តឹងនៅអង្គការពាណិជ្ជកម្មពិភពលោក (WTO) និងចាត់វិធានការឆ្លើយតបដើម្បីការពារសិទ្ធិ និងផលប្រយោជន៍របស់ខ្លួនយ៉ាងរឹងមាំ។
អ្នកនាំពាក្យរូបនេះបានបន្តថា ការដាក់ពន្ធបន្ថែមជាឯកតោភាគីរបស់សហរដ្ឋអាមេរិកបានបំពានយ៉ាងធ្ងន់ធ្ងរទៅលើច្បាប់របស់ WTO ដោយកត់សម្គាល់ថា វិធានការនេះនឹងមិនត្រឹមតែបរាជ័យក្នុងការដោះស្រាយបញ្ហារបស់ខ្លួនប៉ុណ្ណោះទេ ប៉ុន្តែថែមទាំងរំខានដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មធម្មតារវាងប្រទេសទាំងពីរផងដែរ។
យោងតាមសេចក្តីថ្លែងការណ៍បានឱ្យដឹងថា ប្រទេសចិនជំរុញឱ្យភាគីសហរដ្ឋអាមេរិកមើល និងដោះស្រាយបញ្ហា fentanyl និងពាក់ព័ន្ធរបស់ខ្លួនប្រកបដោយគោលបំណង និងសមហេតុផល ជាជាងការប្រើជាញឹកញាប់នូវពន្ធគយដើម្បីគំរាមកំហែងដល់ប្រទេសដទៃទៀត។
អ្នកនាំពាក្យរូបនេះ បានកត់សម្គាល់ថា ភាគីអាមេរិកគួរតែកែកំហុសរបស់ខ្លួន ហើយធ្វើការជាមួយចិន ដើម្បីជួបគ្នាពាក់កណ្តាលផ្លូវ អ្នកនាំពាក្យបានកត់សម្គាល់ដោយអំពាវនាវឱ្យសហរដ្ឋអាមេរិកប្រឈមមុខនឹងបញ្ហាដោយផ្ទាល់ ចូលរួមក្នុងការសន្ទនាដោយស្មោះត្រង់ ពង្រឹងកិច្ចសហប្រតិបត្តិការ និងគ្រប់គ្រងភាពខុសគ្នាដោយឈរលើមូលដ្ឋានសមភាព ផលប្រយោជន៍ និងការគោរពគ្នាទៅវិញទៅមក។
