ខែធ្នូ ឆ្នាំ២០២៤ អង្គភាពច្រកចេញចូលតែមួយរាជធានី ខេត្តបានផ្តល់សេវារដ្ឋបាលសរុបចំនួន ៦៥.៨១១សេវា
ភ្នំពេញ៖ តាមរយៈរបាយការណ៍សកម្មភាព និងលទ្ធផលការងារប្រចាំខែធ្នូ និងទិសដៅ អនុវត្តការងារបន្តសម្រាប់ខែមករា ឆ្នាំ២០២៥ អគ្គនាយកដ្ឋានរដ្ឋបាល បានឲ្យដឹងថា ក្នុងខែធ្នូ ឆ្នាំ២០២៤នេះ អង្គភាពច្រកចេញចូលតែមួយរាជធានី ខេត្តបានផ្តល់សេវារដ្ឋបាលសរុបចំនួន ៦៥.៨១១សេវា ក្នុងនោះបើប្រៀបធៀបចំនួនសេវាដែលបានផ្តល់ក្នុងវិស័យទាំង១៤ឃើញថា ការងាររដ្ឋបាលបាន ផ្តល់សេវាច្រើនជាងគេចំនួន ១៨.២៤៥សេវា (ស្មើនឹង២៧,៧២%) ។
អគ្គនាយកដ្ឋានរដ្ឋបាល បញ្ជាក់ថា «ក្នុងខែធ្នូ ឆ្នាំ២០២៤ អង្គភាពច្រកចេញចូលតែមួយរាជធានី ខេត្តបានផ្តល់សេវារដ្ឋបាលសរុបចំនួន ៦៥.៨១១សេវា ក្នុងនោះបើប្រៀបធៀបចំនួនសេវាដែលបានផ្តល់ក្នុងវិស័យទាំង១៤ឃើញថា ការងាររដ្ឋបាលបាន ផ្តល់សេវាច្រើនជាងគេចំនួន ១៨.២៤៥សេវា (ស្មើនឹង២៧,៧២%) បន្ទាប់មកគឺ វិស័យរៀបចំដែនដី នគរូបនីយកម្ម និង សំណង់ផ្តល់សេវាចំនួន ១៦.៩៤សេវា (ស្មើនឹង២៥,៧៤%) ចំពោះវិស័យដែលបានផ្តល់សេវាតិចជាងគេគឺ វិស័យ ពាណិជ្ជកម្មចំនួន ១សេវា (ស្មើនឹង០,០២%)(ដូចមានក្នុងឧបសម្ព័ន្ធ៤)។ ទន្ទឹមនឹងនោះអង្គភាពច្រកចេញចូល តែមួយ រាជធានី ខេត្តទទួលបានចំណូលពីការផ្តល់សេវារដ្ឋបាលសរុបចំនួន ១៣.០៦១.៩៥៩.៩៤៥រៀល (ស្មើនឹង ៣.២៦៥.៤៨៩,៩៨ដុល្លារអាម៉េរិក) ក្នុងនោះបើប្រៀបធៀបចំណូលដែលទទួលបានក្នុងវិស័យទាំង១៤ ឃើញថា វិស័យរៀបចំដែនដី នគរូបនីយកម្ម និងសំណង់ទទួលបានចំណូលខ្ពស់ជាងគេគឺចំនួន ៦.៩៨៧.៥៩៣.៣៩៤រៀល(ស្មើនឹង ៥៣,៥០%) បន្ទាប់មក វិស័យសាធារណការ និងដឹកជញ្ជូនទទួលបានចំណូលចំនួន ៤.៤០៤៤៥១៣០០រៀល (ស្មើនឹង ៣៣,៧២%) ចំពោះវិស័យដែលទទួលបានចំណូលតិចជាងគេគឺវិស័យពាណិជ្ជកម្ម មានចំនួន ២០០.០០០រៀល(ស្មើនឹង ០០,០២%) (ដូចមានក្នុងឧបសម្ព័ន្ធ៥)»។
ជាមួយគ្នានេះដែរ អគ្គនាយកដ្ឋានរដ្ឋបាល ក៏បានអនុវត្តកិច្ចការចាំបាច់ មួយចំនួន និងផ្តល់ការគាំទ្រដល់អង្គភាពច្រកចេញចូលតែមួយដូចខាងក្រោម៖
– បានទំនាក់ទំនងជាមួយក្រសួងសេដ្ឋកិច្ច និងហិរញ្ញវត្ថុ និងផ្តល់ការគាំទ្រដល់អង្គភាពច្រកចេញចូលតែមួយ ខេត្តកំពង់ចាម ខេត្តពោធិ៍សាត់ ខេត្តកោះកុង និងខេត្តបន្ទាយមានជ័យ ក្នុងការចុះបញ្ជីដីធ្លីលើកដំបូងដែលមាន លក្ខណៈជាប្រព័ន្ធនៅក្នុងកម្មវិធីព័ត៌មានវិទ្យាសម្រាប់គ្រប់គ្រង និងផ្តល់សេវារដ្ឋបាលនៅក្នុងអង្គភាពច្រកចេញ ចូលតែមួយ
–បានប្រជុំពិនិត្យលើបញ្ជីសំណួរ អំពីស្ថានភាពនៃការផ្តល់សេវារដ្ឋបាលក្នុងវិស័យទាំង១៤ និងនីតិវិធីនៃ ការផ្តល់សេវាផ្ទាល់ដែលទទួលបានពីអង្គភាពច្រកចេញចូលតែមួយនៃរដ្ឋបាលរាជធានី ខេត្ត។
ជាមួយគ្នានោះក្នុងខែធ្នូ ឆ្នាំ២០២៤ ការិយាល័យច្រកចេញចូលតែមួយនៃរដ្ឋបាលក្រុង ស្រុក ខណ្ឌបានផ្តល់សេវាសរុប ចំនួន ៣៦២.៣២៣សេវា ក្នុងនោះបើប្រៀបធៀបចំនួនសេវាក្នុងវិស័យទាំង១៧ ឃើញថា ការងារអត្រានុកូលដ្ឋាន បានផ្តល់សេវាបានច្រើនជាងគេគឺចំនួន ២០២.៧២៥សេវា (ស្មើនឹង៥៥,៩៥%) បន្ទាប់មកការងារនីត្យានុកូលកម្ម បានផ្តល់សេវាចំនួន១៤០.១០៣សេវា (ស្មើនឹង៣៨,៦៧%) ។ចំពោះវិស័យដែលបានផ្តល់សេវាតិចជាងគេគឺ វិស័យ កសិកម្ម បានផ្តល់សេវាចំនួន ១៦សេវា (ស្មើនឹង០,០១%) និងវិស័យដែលមិនបានផ្តល់សេវាគឺវិស័យការងារ និង បណ្តុះបណ្តាលវិជ្ជាជីវៈ និងវិស័យបរិស្ថាន (ដូចមានក្នុងឧបសម្ព័ន្ធ ៦)។ រយៈពេលដូចគ្នានេះដែរ ការិយាល័យច្រក ចេញចូលតែមួយទទួលបានចំណូលសរុបចំនួន ៨៣០.៦២២.៤៥០រៀល(ស្មើនឹង២០៧.៦៥៥,៦១ដុល្លារអាម៉េរិក) ក្នុងនោះបើប្រៀបធៀបចំណូលដែលទទួលបានក្នុងវិស័យទាំង១៧ ឃើញថាវិស័យសំណង់ទទួលបានចំណូលខ្ពស់ ជាងគេគឺចំនួន២០០.៥៥៩.៥០០រៀល (ស្មើនឹង២៤,១៥%) បន្ទាប់មកវិស័យសុរិយោដីទទួលបានចំណូលចំនួន ១៦៩.៥៩៥.០០០រៀល (ស្មើនឹង២០,៤២%) ចំពោះវិស័យដែលបានទទួលចំណូលតិចជាងគេគឺ វិស័យពាណិជ្ជកម្មបាន ទទួលចំណូលចំនួន ៥០.០០០រៀល (ស្មើនឹង០,០១%) និងវិស័យដែលមិនទទួលបានចំណូលគឺ វិស័យពាណិជ្ជកម្ម វិស័យធម្មការ និងសាសនា និងវិស័យបរិស្ថាន (ដូចមានក្នុងឧបសម្ព័ន្ធ ៧) ៕
