លោក ដូណាល់ ត្រាំ នឹងដាក់ទណ្ឌកម្មលើប្រទេសរុស្ស៊ី ប្រសិនបើលោក ពូទីន មិនចរចាអំពីការបញ្ចប់សង្រ្គាមនៅអ៊ុយក្រែន
វ៉ាស៊ីនតោន៖ លោក ដូណាល់ ត្រាំ ប្រធានាធិបតីអាម៉េរិក បានអះអាងកាលពីថ្ងៃអង្គារទី២១ ខែមករាថា លោកនឹងដាក់ទណ្ឌកម្មលើប្រទេសរុស្ស៊ី ប្រសិនបើលោក វ្ល៉ាឌីមៀ ពូទីន មិនចរចាអំពីការបញ្ចប់ភ្លើងសង្រ្គាមនៅអ៊ុយក្រែន។
ដ្បិតបែបនេះ លោក ត្រាំ មិនបានផ្តល់ព័ត៌មានលម្អិតអំពីការដាក់ទណ្ឌកម្មបន្ថែមដែលអាចកើតមាននោះទេ ខណៈសហរដ្ឋ អាម៉េរិក បាន ដាក់ ទណ្ឌកម្ម រុស្ស៊ី រួច ទៅហើយ ជុំវិញ ការ ឈ្លានពាន អ៊ុយក្រែន កាលពីខែ កុម្ភៈ ឆ្នាំ ២០២២។ជាមួយគ្នា លោក ត្រាំ បានលើកឡើងថា រដ្ឋបាលថ្មីរបស់លោកក៏កំពុងសម្លឹងមើលបញ្ហានៃការបញ្ជូនអាវុធទៅអ៊ុយក្រែនផងដែរ ហើយសហភាពអឺរ៉ុបគួរតែខិតខំបន្ថែមទៀតដើម្បីគាំទ្រអ៊ុយក្រែន។
លោក ត្រាំ បានសង្កត់ធ្ងន់ថា៖«យើងកំពុងនិយាយជាមួយ(ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី)..យើងនឹងជជែកជាមួយប្រធានាធិបតី ពូទីន ក្នុងពេលឆាប់ៗនេះ។ យើងចាំមើលទាំងអស់គ្នា»។មិនត្រឹមតែប៉ុណ្ណោះ លោក ត្រាំ បានលើកឡើងថា លោកក៏បានដាក់សម្ពាធប្រធានាធិបតីចិន លោក ស៊ី ជីនពីង ក្នុងការអំពាវនាវឱ្យធ្វើអន្តរាគមន៍ដើម្បីបញ្ឈប់សង្គ្រាមនៅអ៊ុយក្រែនផងដែរ។
គួរបញ្ជាក់ថា កាលពីពេលកន្លងទៅ លោក ដូណាល់ ត្រាំ អះអាងពីការពន្លត់ភ្លើងសង្ក្រាមត្រឹមតែរយៈពេល២៤ម៉ោងប៉ុណ្ណោះ។ ដូច្នេះ ចង់ ឬមិនចង់ ត្រាំ ត្រូវតែព្យាយាមរិះរកសព្វវិធីដើម្បីបញ្ចប់សង្គ្រាមនៅអឺរ៉ុបខាងកើតមួយនេះឱ្យខាងតែបាន៕
