សម្ដេចធិបតី៖ ក្រុមជ្រុលនិយមក្រៅប្រទេស បានយកបញ្ហាកសិកម្ម មកញុះញង់ពលរដ្ឋ និងកសិករឱ្យងើបបះបោរប្រឆាំងរាជរដ្ឋាភិបាល

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា បច្ចុប្បន្ននេះ ពួកក្រុមជ្រុលនិយមនៅក្រៅប្រទេស មួយចំនួន រួមទាំងអ្នកនយោបាយចាស់វស្សាផងដែរ បានយកបញ្ហាកសិកម្ម មកញុះញង់ប្រជាពលរដ្ឋ និងប្រជាកសិករឱ្យងើបឡើងបះបោរប្រឆាំងរាជរដ្ឋាភិបាល។

ក្នុងពិធីសម្ពោធដាក់ឱ្យប្រើប្រាស់ សមិទ្ធផលនានានៅក្នុងភូមិប៊ុនរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់ នាថ្ងៃទី២០ ខែមករា ឆ្នាំ២០២៥ សម្តេចធិបតី ហ៊ុន ម៉ាណែត បានថ្លែងថា កាលពីមុន ពួកជ្រុលនិយម បោះឆ្នោតមិនឈ្នះគណបក្សប្រជាជនកម្ពុជា បានចោទប្រកាន់គ្រប់បែបយ៉ាងមកលើគណបក្សប្រជាជនកម្ពុជា ហើយពេលនេះ ពួកជ្រុលនិយម ដែលតែងអួតខ្លួនថា អ្នកប្រជាធិបតេយ្យនោះ បានញុះញង់ប្រជាពលរដ្ឋឱ្យផ្តួលរំលំរាជរដ្ឋាភិបាល តាមបែបមិនប្រជាធិបតេយ្យទៅវិញ។

ពាក់ព័ន្ធនឹងបញ្ហាកសិកម្មនេះដែរ សម្តេចធិបតី ហ៊ុន ម៉ាណែត ក៏បានចោទជាសំណួរទៅកាន់អ្នក នយោបាយចាស់វស្សានៅបារាំងថា បើសិនខ្លួនជាអ្នកស្នេហាជាតិមែន ហេតុអ្វីមិនស្នើសុំឱ្យ បរទេសបើកទីផ្សារនាំចូលស្រូវអង្ករពីប្រទេសកម្ពុជា? ប៉ុន្តែផ្ទុយទៅវិញ អ្នកនយោបាយចាស់វស្សា រូបនោះ តែងតែអំពាវនាវឱ្យបរទេសកាត់ទីផ្សារពីកម្ពុជាទៅវិញ៕