ឯកឧត្តម អាន ពេជ្រ ហត្ថដា ណែនាំដល់មន្ទីរធនធានទឹកខេត្តមណ្ឌលគិរី និងខេត្តរតនគិរី ឲ្យយកចិត្តទុកដាក់លើកិច្ចការចំនួន ៣
ភ្នំពេញ៖ ចាប់ពីថ្ងៃទី១៤-១៥ ខែមករា ឆ្នាំ២០២៥ ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការ និងជាប្រធានក្រុមការងារសម្រួលការងារគ្រប់គ្រងធនធានទឹក និងឧតុនិយម ខេត្តមណ្ឌលគិរី និងខេត្តរតនគិរី ក្នុងនាមតំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានជួបពិភាក្សាការងារជាមួយលោកប្រធាន អនុប្រធាន និងមន្ត្រីរាជការនៃមន្ទីរធនធានទឹក និងឧតុនិយមខេត្តមណ្ឌលគិរី និងខេត្តរតនគិរី ដើម្បីពិនិត្យលទ្ធផលនៃការអនុវត្តផែនការសកម្មភាពការងារឆ្នាំ២០២៤ ស្ថានភាពទឹក ស្ថានភាពឧតុនិយម និងការងារបង្កបង្កើនផលរដូវប្រាំងឆ្នាំ២០២៥។
ក្នុងកិច្ចជំនួបនោះ ឯកឧត្តមរដ្ឋលេខាធិការ បានសង្កត់ធ្ងន់ថា ដើម្បីការគ្រប់គ្រងប្រព័ន្ធធារាសាស្ត្រប្រកបដោយប្រសិទ្ធភាព និងនិរន្តរភាព គឺត្រូវពង្រឹង និងកសាងសមត្ថភាពសហគមន៍កសិករប្រើប្រាស់ទឹក ឱ្យសហគមន៍យល់ដឹងអំពីតួនាទីភារកិច្ចរបស់ខ្លួនក្នុងការគ្រប់គ្រងសហគមន៍ឱ្យដំណើរការបានល្អ។ ទន្ទឹមនឹងនេះ ឯកឧត្តមរដ្ឋលេខាធិការបានជំរុញឱ្យមន្ទីរបង្កើនការផ្សព្វផ្សាយឯកសារគតិយុត្តមួយចំនួនដែលក្រសួងបានផលិតទាក់ទងទៅនឹងកិច្ចដំណើរការរបស់សហគមន៍កសិករប្រើប្រាស់ទឹកទៅដល់ភាគីពាក់ព័ន្ធ។
ជាមួយគ្នានេះ ឯកឧត្តមរដ្ឋលេខាធិការ បានណែនាំដល់មន្ទីរធនធានទឹក និងឧតុនិយមខេត្តទាំងពីរ ត្រូវយកចិត្តទុកដាក់លើកិច្ចការមួយចំនួនដូចជា៖ ១)បន្តជំរុញការចុះបញ្ជី និងការកំណត់ព្រំអាងទឹក និងប្រព័ន្ធធារាសាស្ត្រ និងឈានទៅដល់ការសិក្សាធ្វើផែនទីកំណត់ទីតាំងប្រព័ន្ធធារាសាស្ត្រ និងអាងទឹកទាំងអស់នៅទូទាំងខេត្តទាំងពីរ ទី២)បន្តសិក្សាទីតាំងដែលមានសក្ដានុពលធនធានទឹកសម្រាប់បម្រើឱ្យពហុវិស័យ ដោយធ្វើការសហការឱ្យបានជិតស្និទ្ធជាមួយស្ថាប័នពាក់ព័ន្ធ ទី៣)ដើម្បីគ្រប់គ្រង អភិរក្ស និងអភិវឌ្ឍន៍វិស័យធនធានទឹក និងឧតុនិយម ប្រកបដោយចីរភាព ហើយកត្តាដែលសំខាន់មិនអាចខ្វះបានគឺ ការបណ្ដុះបណ្ដាលធនធានមនុស្សប្រកបដោយគុណភាព និងការរៀបចំមូលដ្ឋានទិន្នន័យច្បាស់លាស់ ដើម្បីបម្រើឱ្យការសិក្សា និងការអភិវឌ្ឍគម្រោង។
ក្នុងឱកាសនោះ ឯកឧត្តមរដ្ឋលេខាធិការ ព្រមទាំងក្រុមការងារបច្ចេកទេសក្រសួង និងមន្ទីរធនធានទឹក និងឧតុនិយម ខេត្តមណ្ឌលគិរី និងខេត្តរតនគិរី ក៏បានចុះពិនិត្យស្ថានភាពជាក់ស្តែងនៅតាមបណ្តាប្រព័ន្ធធារាសាស្ត្រ និងអាងរក្សាទឹកមួយចំនួននៃខេត្តទាំងពីរនេះផងដែរ៕
