មន្ត្រីហុងកុង ពិភាក្សាជាមួយភាគីថៃ នៅរាជធានីបាងកកក្នុងសប្តាហ៍នេះ ដើម្បីស្វែងរកមធ្យោបាយជួយសង្គ្រោះអ្នកដែលត្រូវបានបោកបញ្ឆោតពីមជ្ឈមណ្ឌលហិរញ្ញវត្ថុអាស៊ី

បាងកក៖ មន្ត្រីហុងកុងបានធ្វើកិច្ចពិភាក្សាដ៏កម្រមួយជាមួយសមភាគីថៃ នៅរាជធានីបាងកកក្នុងសប្តាហ៍នេះ ដើម្បីស្វែងរកមធ្យោបាយជួយសង្គ្រោះអ្នកដែលត្រូវបានបោកបញ្ឆោតពីមជ្ឈមណ្ឌលហិរញ្ញវត្ថុអាស៊ី និងត្រូវបានបោកឱ្យធ្វើការងារខុសច្បាប់នៅអាស៊ីអាគ្នេយ៍ ដោយភាគីទាំង២កំពុងខ្នះខ្នែងប្រយុទ្ធប្រឆាំងនឹងនិន្នាការនៃការកើនឡើងរបស់ក្រុមឧក្រិដ្ឋជន។

កិច្ចពិភាក្សានេះ ធ្វើឡើងបន្ទាប់ពីករណីដ៏ល្បីកក្រើកកាលពីសប្តាហ៍មុនរបស់តារាសម្ដែងចិនម្នាក់ ដែលជាជនរងគ្រោះនៃការជួញដូរមនុស្ស បានបាត់ខ្លួនបន្ទាប់ពីធ្វើដំណើរទៅកាន់ប្រទេសថៃ ប៉ុន្តែក្រោយមកត្រូវបានបញ្ជូនទៅដល់ប្រទេសមីយ៉ាន់ម៉ា និងត្រូវបានជួយសង្គ្រោះ។

រដ្ឋាភិបាលហុងកុង បានលើកឡើងពីសញ្ញានៃការងើបឡើងវិញដែលអ្នករស់នៅហុងកុងត្រូវបានទាក់ទាញឱ្យទៅប្រទេសអាស៊ីអាគ្នេយ៍ ហើយត្រូវបានឃុំខ្លួនឱ្យចូលរួមក្នុងការងារខុសច្បាប់ ដោយបន្ថែមថា សញ្ញាបែបនេះបានកើនឡើងចាប់តាំងពីត្រីមាសទីពីរនៃឆ្នាំ២០២៤។

រដ្ឋាភិបាលបានរៀបរាប់នៅក្នុងសេចក្តីថ្លែងការណ៍ជាបន្តបន្ទាប់ថា ក្រុមដែលដឹកនាំដោយមន្ត្រីសន្តិសុខហុងកុង លោក មីឆែល ឈូក បានជួបប៉ូលិស និងមន្ត្រីរាជរដ្ឋាភិបាលថៃ ដើម្បីជួយសម្រួលដល់ការវិលត្រឡប់របស់អ្នកស្រុកហុងកុង ប្រកបដោយសុវត្ថិភាពឱ្យបានឆាប់តាមដែលអាចធ្វើទៅបាន។

កាលពីសប្តាហ៍មុន ស្ថានទូតចិនប្រចាំប្រទេសមីយ៉ាន់ម៉ា បានដាស់តឿនពលរដ្ឋខ្លួនឱ្យបង្កើនការប្រុងប្រយ័ត្នចំពោះការឆបោកតាមប្រព័ន្ធទូរគមនាគមន៍ និងការឆបោកតាមអ៊ីនធឺណិត បន្ទាប់ពីមានរបាយការណ៍ថា ជនរួមជាតិត្រូវបានទាក់ទាញទៅទីក្រុងមីយ៉ាវ៉ាឌី Myawaddy ព្រំដែនរបស់មីយ៉ាន់ម៉ា ដោយការបោកប្រាស់តាមអ៊ីនធឺណិត ដែលសន្យាផ្តល់ការងារក្រៅប្រទេសមានប្រាក់ខែខ្ពស់។

អង្គការសហប្រជាជាតិ លើកឡើងថា ទីប្រជុំជនជាប់ព្រំដែនក្នុងប្រទេសថៃ ឡាវ និងមីយ៉ាន់ម៉ា បានក្លាយជាសំបុកនៃការឆបោក ទូរគមនាគមន៍ និងការក្លែងបន្លំតាមអ៊ីនធឺណិត ដោយមានមនុស្សរាប់រយពាន់នាក់ត្រូវបានជួញដូរទៅធ្វើការនៅក្នុងមជ្ឈមណ្ឌលឆបោកនៅទីនោះ។

យោងតាមអង្គការសហប្រជាជាតិ ជនរងគ្រោះនៃការជួញដូរភាគច្រើនមកពីបណ្តាប្រទេសអាស៊ីអាគ្នេយ៍ ក៏ដូចជាប្រទេសចិន តៃវ៉ាន់ និងហុងកុង ប៉ុន្តែខ្លះទៀតមកពីប្រទេសឆ្ងាយៗដូចជាអាហ្វ្រិក និងអាម៉េរិកឡាទីនជាដើម៕