មន្ត្រីជាន់ខ្ពស់ក្រសួងសុខាភិបាល ចុះពិនិត្យមើលការរៀបចំ និងបំពាក់ឧបករណ៍សម្ភារៈបរិក្ខារពេទ្យ នៅមណ្ឌលសុខភាព ប៊ុន រ៉ានី សែនជ័យដំណាក់ត្រយឹង

ភ្នំពេញ៖ កាលពីព្រឹកថ្ងៃទី៩ ខែមករា ឆ្នាំ២០២៥ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានដឹកនាំគណៈប្រតិភូក្រសួងសុខាភិបាល រួមទាំងថ្នាក់ដឹកនាំ និងមន្ត្រីមន្ទីរសុខាភិបាលនៃរដ្ឋបាលខេត្តពោធិ៍សាត់ ការិយាល័យសុខាភិបាលស្រុកប្រតិបត្តិក្រគរ ការិយាល័យសុខាភិបាលស្រុកប្រតិបត្តិភ្នំក្រវាញ ព្រមទាំងក្រុមការងារពាក់ព័ន្ធ ចុះពិនិត្យមើលការរៀបចំ និងបំពាក់ឧបករណ៍សម្ភារៈ បរិក្ខារពេទ្យ នៅមណ្ឌលសុខភាព ប៊ុន រ៉ានី សែនជ័យដំណាក់ត្រយឹង ស្ថិតនៅក្នុងឃុំព្រងិល ស្រុកភ្នំក្រវាញ ខេត្តពោធិ៍សាត់ ដែលនឹងត្រូវដាក់សម្ពោធជាផ្លូវការ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ជាកិច្ចចាប់ផ្តើម លោកជំទាវរដ្ឋលេខាធិការ បានដឹកនាំប្រតិភូសុខាភិបាល ចុះពិនិត្យមើលជាក់ស្តែង នៃហេដ្ឋារចនាសម្ព័ន្ធនានា របស់មណ្ឌលសុខភាព ប៊ុន រ៉ានី សែនជ័យដំណាក់ត្រយឹង ដែលមានអគារចំនួន ០៣៖ ទី១) អគារសង្គ្រោះបឋម និងជំងឺទូទៅ មានចំនួន ១៤បន្ទប់ ទី២) អគារសម្ភព និងរោគស្រ្តី មានចំនួន ៨បន្ទប់ និងទី៣) អគារស្នាក់នៅរបស់គ្រូពេទ្យ មានចំនួន ២០បន្ទប់។ មណ្ឌលសុខភាពនេះ មានគ្រូពេទ្យចំនួនសរុប ៩នាក់ (ស្រីចំនួន ៥នាក់) ដែលមានឯកទេសជា វេជ្ជបណ្ឌិតចំនួន ០១នាក់ ធ្មបចំនួន ៤នាក់ និងគិលានុបដ្ឋាយិកាចំនួន ៤រូប។

ក្នុងនេះដែរ ក្រសួងសុខាភិបាល បានផ្តល់នូវឧបករណ៍សម្ភារៈ បរិក្ខារពេទ្យ ឱសថមួយចំនួន ជូនមណ្ឌលសុខភាព ប៊ុន រ៉ានី សែនជ័យដំណាក់ត្រយឹង រួមមាន៖ គ្រែសម្រាប់អ្នកជំងឺចំនួន ៣៦គ្រឿង Pulse Oxygen ចំនួន ៨គ្រឿង ដបអុកស៊ីសែនចំនួន ៥គ្រឿង ប្រដាប់វាស់សំពាធឈាម(Sphygmomanometer) ចំនួន ១០គ្រឿង ម៉ាស៊ីន X-Ray ចំនួន ០១គ្រឿង ម៉ាស៊ីនតាមដានសញ្ញាជីវិតចំនួន ១០គ្រឿង Stethoscope ចំនួន ១០គ្រឿង ម៉ាស៊ីនអេកូចំនួន ០១គ្រឿង និងឱសថសារវ័ន្តមួយចំនួនបន្ថែមទៀត។

បន្ទាប់ពីបានចុះពិនិត្យមើលជាក់ស្តែងទៅតាមអគារនីមួយៗ ឧបករណ៍សម្ភារៈ ការរៀបចំឱសថសារវ័ន្ត អនាម័យ ការផ្តល់សេវាជូនអ្នកជំងឺ និងហេដ្ឋារចនាសម្ព័ន្ធនានារួចរាល់ លោកជំទាវរដ្ឋលេខាធិការ បានដឹកនាំកិច្ចប្រជុំរួមជាមួយក្រុមការងារទាំងអស់ ដើម្បីពិភាក្សា និងរកដំណោះស្រាយ ទៅលើចំណុចខ្វះខាត ដែលត្រូវបំពេញបន្ថែម ដើម្បីជំរុញការដំណើរកាន់តែរលូន និងប្រកបដោយប្រសិទ្ធភាពខ្ពស់។

ឆ្លៀតក្នុងឱកាសនោះដែរ លោកជំទាវរដ្ឋលេខាធិការ ក៏បានពាំនាំការផ្តាំផ្ញើសួរសុខទុក្ខរបស់ ឯកឧត្តសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ដល់ក្រុមគ្រូពេទ្យ និងអ្នកជំងឺទាំងអស់នៅក្នុងមណ្ឌលសុខភាព។

លោកជំទាវរដ្ឋលេខាធិការ បានផ្តល់អនុសាសន៍ណែនាំជូន ប្រធានមន្ទីរសុខាភិបាលនៃរដ្ឋបាលខេត្ត ប្រធានការិយាល័យសុខាភិបាលស្រុកប្រតិបត្តិ ប្រធានមណ្ឌលសុខភាព និងមន្ត្រីសុខាភិបាលទាំងអស់ ក្នុងនាមជាម្ចាស់អាគារ ត្រូវប្រើប្រាស់ដោយមានការទទួលខុសត្រូវ ព្រមទាំងយកចិត្តទុកដាក់ក្នុងការថែទាំ សម្អាតអនាម័យឱ្យបានស្អាតជានិច្ច៕