ញូវយ៉ក៖ នាយកដ្ឋានប៉ូលិសទីក្រុងញូវយ៉ក (NYPD) បង្ហាញនៅក្នុងសន្និសីទសារព័ត៌មានមួយ កាលពីព្រឹកថ្ងៃព្រហស្បតិ៍ទី២ ខែមករាថា មនុស្សចំនួន១០នាក់បានរងរបួសនៅក្នុងការបាញ់ប្រហារដ៏ធំមួយនៅក្នុងសង្កាត់ឃ្វីន (Queens) នៃទីក្រុងញូវយ៉ក កាលពីល្ងាចថ្ងៃឆ្លងឆ្នាំថ្មី។ ករណីនេះ គឺជាសោកនាដកម្មធំទី៣ ដែលកើតឡើងនៅថ្ងៃឆ្លងឆ្នាំនៅសហរដ្ឋអាម៉េរិក បន្ទាប់ពីការផ្ទុះរថយន្ត និងការបើករថយន្តបំបុកសម្លាប់មនុស្ស។
ប៉ូលិសបានឱ្យដឹងថា ឧបទ្ទវហេតុកើតឡើងនៅខាងក្រៅក្លឹបព្រឹត្តិការណ៍ឯកជនមួយកាលពីល្ងាចថ្ងៃពុធ បានធ្វើឱ្យស្ត្រីចំនួន៦នាក់ និងបុរស៤នាក់រងរបួស។ ឧប្បត្តិហេតុនេះកើតឡើងនៅពេលបុរសពី៣ទៅ៤នាក់ បានបាញ់ប្រហារទៅលើក្រុមមនុស្សនៅខាងក្រៅក្លឹប។ អ្នកប្រើបណ្ដាញសង្គមសម្ដែងការតក់ស្លុតចំពោះឧបទ្ទវហេតុនេះ និងបានចែករំលែករូបភាពនៃការដាក់ពង្រាយប៉ូលិសនៅកន្លែងនោះ។ យ៉ាងណាមិញ ប៉ូលិសបានច្រានចោលនូវលទ្ធភាពនៃការវាយប្រហារភេរវកម្ម។ ឧបទ្ទវហេតុនេះ កើតឡើងប៉ុន្មានម៉ោងបន្ទាប់ពីអំពើហិង្សាពីរផ្សេងទៀតនៅកន្លែងដទៃក្នុងសហរដ្ឋអាម៉េរិក នៅថ្ងៃឆ្លងឆ្នាំថ្មី។
នៅទីក្រុងញូវអ័រលៀន (New Orleans) រថយន្តដឹកទំនិញមួយគ្រឿងបានបំបុកចូលផ្លូវដែលក្រុមមនុស្សកំពុងប្រមូលផ្តុំអបអរថ្ងៃឆ្លងឆ្នាំថ្មី ដោយបានសម្លាប់មនុស្ស១៥នាក់ និងបណ្តាលឱ្យរងរបួស៣០នាក់ ហើយនៅទីក្រុងឡាសវេហ្គាស រថយន្តម៉ាក Cybertruck របស់ក្រុមហ៊ុន Tesla បានផ្ទុះឆេះ បង្កជាអណ្តាតភ្លើងនៅខាងក្រៅសណ្ឋាគារត្រាំឡាសវេហ្គាស (Trump Hotel Las Vegas) ដោយបានសម្លាប់មនុស្សម្នាក់ និងរបួសយ៉ាងតិច៧នាក់ផ្សេងទៀត។ ករណីទាំង២ កើតឡើងកាលពីថ្ងៃពុធទី១ ខែមករា ឆ្នាំ២០២៥។ អាជ្ញាធរអាម៉េរិកកំពុងព្យាយាមតាមចាប់ជនសង្ស័យពាក់ព័ន្ធនឹងឧប្បត្តិហេតុនៅទីក្រុងញូវអ័រលៀន និងឡាសវេហ្គាស និងស៊ើបអង្កេតថា តើវាពាក់ព័ន្ធនឹងអំពើភេរវកម្មដែរឬទេ?។
