មជ្ឈមណ្ឌលជំនាញឧតុនិយមអាស៊ាន ចេញប្រកាសអាសន្នកម្រិត១ ព្រមានអំពីចំណុចក្ដៅ និងការ បំពុល ផ្សែង អ័ព្ទ ឆ្លង ដែន នៅតំបន់អាស៊ីអាគ្នេយ៍
សិង្ហបុរី៖ មជ្ឈមណ្ឌលជំនាញឧតុនិយមអាស៊ាន (ASMC) បានចេញសេចក្តីប្រកាសអាសន្នកម្រិត១ នៅថ្ងៃព្រហស្បតិ៍ទី២ ខែមករា ឆ្នាំ២០២៥ ដោយព្រមានអំពីចំណុចក្ដៅ (hotspot) និងការ បំពុល ផ្សែង អ័ព្ទ ឆ្លង ដែន នៅតំបន់អាស៊ីអាគ្នេយ៍ ខណៈរដូវប្រាំងនៅក្នុងតំបន់ចាប់ផ្តើម។
មជ្ឈមណ្ឌលបានរៀបរាប់នៅក្នុងសេចក្តីប្រកាសព័ត៌មានមួយថា ខ្លួនបានសង្កេតឃើញស្ថានភាពស្ងួតលើផ្នែកភាគច្រើននៃអនុតំបន់មេគង្គ នៅពេលដែលខ្យល់មូសុងឦសានចាប់ផ្តើមបោកបក់។ មជ្ឈមណ្ឌលបានបន្ថែមថា ចំណុចក្ដៅ និងការ បំពុល ផ្សែង អ័ព្ទ ឆ្លង ដែននៅអនុតំបន់ អាចនឹងកាន់តែអាក្រក់ទៅៗក្នុងរយៈពេលប៉ុន្មានខែខាងមុខ ក្រោមលក្ខខណ្ឌអាកាសធាតុស្ងួតអូសបន្លាយរយៈពេលយូរក្នុងរដូវកាលនេះ។
មជ្ឈមណ្ឌលឧតុនិយមក្នុងតំបន់ ក៏បានកត់សម្គាល់ផងដែរអំពីការកើនឡើងបន្តិចម្ដងៗនៃចំនួនចំណុចក្ដៅនៅក្នុងអនុតំបន់ចាប់តាំងពីពាក់កណ្តាលខែធ្នូ។ វាបានកត់ត្រាការកើនឡើងនៃចំនួនចំណុចក្ដៅនៅចន្លោះថ្ងៃទី៣១ ខែធ្នូ ឆ្នាំ២០២៤ និងថ្ងៃទី១ ខែមករា ឆ្នាំ២០២៥ ពី១៦៤ចំណុចដល់៣៣៥។ ខណៈ ខ្លួន បាន រក ឃើញ ផ្សែង ហុយ ឬ អ័ព្ទ ក្នុង តំបន់ ខ្លះ នៃ ប្រទេស កម្ពុជា ឡាវ និង ថៃ មជ្ឈមណ្ឌល បាន បញ្ជាក់ ថា រហូត មក ដល់ ពេល នេះ មិន មាន ផ្សែង ឆ្លង ដែន ទេ។ សូមជម្រាបជូនថា អនុ តំបន់ ទន្លេ មេគង្គ រួមមាន៖ កម្ពុជា ថៃ ឡាវ វៀតណាម ម៉ីយ៉ាន់ម៉ា និងផ្នែកខ្លះនៃប្រទេសចិនផងដែរ។
មជ្ឈមណ្ឌលជំនាញឧតុនិយមអាស៊ាន ដែលហៅកាត់ជាភាសាអង់គ្លេសថា ASMC បានបន្ថែមថា ខ្លួនរំពឹងថា បាតុភូតឡានីណា (La Nina) មានរយៈពេលខ្លីនៅដើមឆ្នាំ២០២៥ អាចនាំមកនូវអាកាសធាតុចុះ ត្រជាក់នៅលើតំបន់មួយចំនួននៃតំបន់អាស៊ីអាគ្នេយ៍។ ទោះជាយ៉ាងណា វាអាចនៅតែមានហានិភ័យនៃការកើនឡើងនៃចំណុចក្ដៅ និងផ្សែងអ័ព្ទឆ្លងដែននៅក្នុងអនុតំបន់។
កាលពីដើមខែធ្នូ ឆ្នាំមុន រដ្ឋលេខាធិការអចិន្ត្រៃយ៍ និងតំណាងជាន់ខ្ពស់ទទួលបន្ទុកបញ្ហាដីធ្លី ភ្លើងឆេះព្រៃ និងអ័ព្ទអនុតំបន់ មេគង្គ បានប្រមូលផ្តុំគ្នាសម្រាប់កិច្ចប្រជុំលើកទី១៣ ស្តីពីការបំពុលអ័ព្ទឆ្លងដែននៅក្នុងអនុតំបន់មេគង្គ។
កិច្ចប្រជុំបានរំលឹកឡើងវិញនូវការប្តេជ្ញាចិត្តរបស់អនុតំបន់ក្នុងការកាត់បន្ថយការកើតឡើងនៃអ័ព្ទឆ្លងដែនក្នុងអំឡុងពេលអាកាសធាតុស្ងួត ដោយសារឥទ្ធិពលនៃការប្រែប្រួលអាកាសធាតុអាចបង្កើនហានិភ័យនៃចំណុចក្ដៅកើនឡើង។
កិច្ចប្រជុំក៏បានរំលឹកឡើងវិញនូវការប្តេជ្ញាចិត្តក្នុងការពង្រឹងសកម្មភាពក្នុងប្រទេស ដោយផ្តល់អាទិភាពដល់ការបង្ការអគ្គិភ័យ ការព្រមានជាមុន ការត្រួតពិនិត្យ និងការពន្លត់អគ្គិភ័យ ដើម្បីកាត់បន្ថយការកើតមានអ័ព្ទឆ្លងដែន៕
