ទាហានជើងចាស់អាមេរិកម្នាក់ បើកឡានមានទង់ជាតិ ISIS បុកចូលក្រុមមនុស្សប្រមូលផ្តុំគ្នា ក្នុងទីក្រុងញូវអ័រលៀន ថ្ងៃឆ្លងឆ្នាំថ្មី សម្លាប់មនុស្ស ១៥នាក់ និងរបួស៣០នាក់
វ៉ាស៊ីនតោន៖ ទាហានជើងចាស់អាម៉េរិកម្នាក់ បានបើកឡានដែលមានទង់ជាតិ ISIS បុកចូលក្នុងក្រុមមនុស្សប្រមូលផ្តុំគ្នាជាច្រើនក្នុងទីក្រុងញូវអ័រលៀន (New Orleans) នៅថ្ងៃឆ្លងឆ្នាំថ្មី ដោយបានសម្លាប់មនុស្ស១៥ នាក់ និងរបួស៣០ នាក់។ ការិយាល័យស៊ើបអង្កេតសហព័ន្ធ (FBI) កំពុងស៊ើបអង្កេតថាវាជាអំពើភេរវកម្មឬយ៉ាងណា។
ជនសង្ស័យមានឈ្មោះ សាំស៊ូត-ឌីន ចាបបា (Shamsud-Din Jabbar) អាយុ ៤២ឆ្នាំ ជាពលរដ្ឋអាម៉េរិក មកពីរដ្ឋតិចសាស់ ដែលធ្លាប់បម្រើការនៅប្រទេសអាហ្វហ្គានីស្ថាន ត្រូវបានសម្លាប់នៅក្នុងការបាញ់ប្រហារជាមួយប៉ូលិស បន្ទាប់ពីបានវាយប្រហារសម្លាប់មនុស្សយ៉ាងគួរឱ្យសង្វេគហើយ។ ការវាយប្រហារដែលបានធ្វើឱ្យមនុស្ស៣០ នាក់ផ្សេងទៀតបានរងរបួសបានកើតឡើងប្រហែលម៉ោង៣ និង១៥ នាទីព្រឹក (ម៉ោងនៅសហរដ្ឋអាម៉េរិក) នៅផ្លូវដែលជាគោលដៅទេសចរណ៍ប្រវត្តិសាស្ត្រដែលល្បីល្បាញ។ ប៉ូលិស និងមេដឹកនាំនយោបាយប្ដេជ្ញាចាប់ជនសមគំនិត។ FBI បានបញ្ជាក់ថា ប៉ូលិសបានរកឃើញអាវុធ និងឧបករណ៍បំផ្ទុះដ៏មានសក្តានុពលនៅក្នុងរថយន្ត។ ទង់ជាតិ ISIS ត្រូវបានរកឃើញនៅលើរថយន្តបង្កហេតុ ដែលជំរុញឱ្យមានការស៊ើបអង្កេតលើទំនាក់ទំនងដែលអាចកើតមានជាមួយអង្គការភេរវករ។
លោកប្រធានាធិបតី ចូ បៃឌិន នៅក្នុងសុន្ទរកថាមួយកាលពីយប់ថ្ងៃពុធបាននិយាយថា៖«លោកកំពុងដឹកនាំមន្ត្រីអនុវត្តច្បាប់កំពូលឱ្យបន្តស៊ើបអង្កេតឱ្យបានហ្មត់ចត់ចំពោះការវាយប្រហារដ៏សាហាវនេះ។ សហគមន៍អនុវត្តច្បាប់ និងស៊ើបការណ៍សម្ងាត់កំពុងបន្តស្វែងរកទំនាក់ទំនង សមាគម ឬអ្នករួមគំនិត។ យើងមិនមានអ្វីបន្ថែមដើម្បីរាយការណ៍នៅពេលនេះទេ។ ការស៊ើបអង្កេតកំពុងបន្តសកម្ម ហើយគ្មាននរណាម្នាក់គួរសន្និដ្ឋានអ្វីឡើយ»។ លោក បៃឌិន បានបន្តថា៖«ជូនដល់គ្រួសារទាំងអស់នៃអ្នកដែលត្រូវបានសម្លាប់ ដល់អ្នករបួសទាំងអស់ ដល់ប្រជាជនទាំងអស់នៃទីក្រុងញូវអ័រលៀន ដែលកំពុងសោកសៅនៅថ្ងៃនេះ ខ្ញុំចង់ឱ្យអ្នកដឹងថា ខ្ញុំសោកសៅជាមួយអ្នក។ ប្រជាជាតិរបស់យើងសោកសៅជាមួយអ្នក»។
ការស៊ើបអង្កេតរបស់ FBI ទៅលើការវាយប្រហារដ៏សាហាវកាលពីថ្ងៃពុធកំពុងបន្ត និងវិវឌ្ឍ ហើយអ្នកស៊ើបអង្កេតនៅតែព្យាយាមកំណត់ថាតើមនុស្សផ្សេងទៀតអាចមានជាប់ពាក់ព័ន្ធបន្ថែម។ ការស៊ើបអង្កេតនេះកើតឡើង ខណៈដែលមន្ត្រីបច្ចុប្បន្ន និងអតីតមន្ត្រីអាមេរិកបានព្រមានជាសាធារណៈក្នុងប៉ុន្មានខែថ្មីៗនេះ អំពីកិច្ចខិតខំប្រឹងប្រែងជ្រើសរើសសមាជិករបស់ក្រុម ISIS ហើយថាសហរដ្ឋអាមេរិកកំពុងប្រឈមនឹងហានិភ័យពីការវាយប្រហារភេរវកម្ម៕
