ឧត្តមសេនីយ៍ មីន អ៊ោងឡាំង៖ ទោះបីជាមានការអញ្ជើញឱ្យដោះស្រាយជម្លោះប្រដាប់អាវុធតាមរយៈការសន្ទនានយោបាយ និងការចរចា ក៏ក្រុមប្រដាប់អាវុធជនជាតិភាគតិចនៅតែបន្តមិនយកចិត្តទុកដាក់ចំពោះផលប្រយោជន៍ក្នុងតំបន់
ណៃពិដោ៖ យោងតាមប្រធានក្រុមប្រឹក្សារដ្ឋបាលរដ្ឋ (SAC) ឬប្រមុខរដ្ឋាភិបាល ប្រទេស មីយ៉ាន់ម៉ា ឧត្តមសេនីយ៍ មីន អ៊ោងឡាំង បាននិយាយថា ទោះបីជាមានការអញ្ជើញឱ្យដោះស្រាយជម្លោះប្រដាប់អាវុធតាមរយៈការសន្ទនានយោបាយ និងការចរចាក៏ដោយ ក៏ក្រុមប្រដាប់អាវុធជនជាតិភាគតិចមួយចំនួននៅតែបន្តមិនយកចិត្តទុកដាក់ចំពោះផលប្រយោជន៍ក្នុងតំបន់។
ក្នុងសារផ្ញើដើម្បីប្រារព្ធខួបលើកទី៥០ នៃទិវាជាតិ Akha ដែលបានប្រារព្ធនៅថ្ងៃទី២៨ខែធ្នូ ប្រធានក្រុមប្រឹក្សារដ្ឋបាលរដ្ឋ លោក មីន អ៊ោងឡាំង បានសង្កត់ធ្ងន់លើកិច្ចខិតខំប្រឹងប្រែងរបស់រដ្ឋាភិបាលក្នុងការផ្ដល់អាទិភាពដល់ផលប្រយោជន៍ជាតិ និងសាធារណៈ។ នេះរួមបញ្ចូលទាំងការកំណត់គោលដៅ និងការអនុវត្តយុទ្ធសាស្ត្រដើម្បីសម្រេចបាននូវការអភិវឌ្ឍរួមបញ្ចូលទូទាំងប្រទេស ក៏ដូចជាការដោះស្រាយជម្លោះប្រដាប់អាវុធនៅក្នុងតំបន់មួយចំនួនតាមរយៈដំណោះស្រាយនយោបាយ និងការសន្ទនា។
យ៉ាងណាក៏ដោយ លោ មីន អ៊ោងឡាំង បានកត់សម្គាល់ថា ក្រុមប្រដាប់អាវុធជនជាតិភាគតិចមួយចំនួននៅតែបន្តប្រព្រឹត្តអំពើហិង្សាដោយមិនគិតពីសុខុមាលភាពនៃតំបន់ និងសហគមន៍ជនជាតិភាគតិចរបស់ពួកគេឡើយ។
ជនជាតិ Akha ដែលបានតាំងទីលំនៅនៅភាគខាងកើតនៃរដ្ឋសាននៅដើមសតវត្សទី១១ បានរស់នៅដោយសុខដុមរមនាជាមួយជនជាតិដទៃទៀតនៅក្នុងតំបន់។
លោក មីន អ៊ោងឡាំង បានលើកឡើងថា៖«ដោយមើលឃើញភាពជិតស្និតជាមួយប្រទេសជិតខាងដូចជា ចិន ឡាវ និងថៃ ប្រជាជន Akha ដើរតួនាទីយ៉ាងសំខាន់ក្នុងការជំរុញទំនាក់ទំនងមិត្តភាពរវាងសហគមន៍ព្រំដែន ធានាស្ថិរភាពព្រំដែន និងការលើកកម្ពស់ពាណិជ្ជកម្មឆ្លងព្រំដែន។ នេះជាការរួមចំណែកដល់ការអភិវឌ្ឍជាតិ»៕
