ប្រធានាធិបតីអាស៊ែបៃហ្សង់៖ យន្ដហោះដឹកអ្នកដំណើរដែលបានធ្លាក់កាលពីសប្ដាហ៍មុន គឺបានរងការខូចខាតដោយសារតែត្រូវបានបាញ់ប្រហារដោយអចេតនា ចេញពីលើដីនៅក្នុងប្រទេសរុស្ស៉ី

បាគូ៖ បើតាមការចេញផ្សាយដោយទីភ្នាក់ងារសារព័ត៌មាន Reuters ប្រធានាធិបតីអាស៊ែបៃហ្សង់ លោក Ilham Aliyev កាលពីថ្ងៃអាទិត្យ ទី២៩ ខែធ្នូ បាននិយាយថាយន្ដហោះដឹកអ្នកដំណើរមួយគ្រឿងដែលបានធ្លាក់កាលពីសប្ដាហ៍មុន ដោយសម្លាប់មនុស្ស៣៨នាក់ គឺបានរងការខូចខាតដោយសារតែត្រូវបានបាញ់ប្រហារដោយអចេតនា ចេញពីលើដីនៅក្នុងប្រទេសរុស្ស៉ី ជាមួយការបន្ថែមថាមនុស្សខ្លះនៅរុស្ស៉ីបាននិយាយកុហកពីមូលហេតុនៃសោកនាដកម្មនេះ។

ប្រធានាធិបតីរុស្ស៉ី លោក វ្ល៉ាឌីមៀ ពូទីន កាលពីថ្ងៃសៅរ៍ចុងសប្ដាហ៍កន្លងទៅ បានសុំទោសទៅកាន់លោក Aliyev ពាក់ព័ន្ធនឹងសោកនាដកម្មធ្លាក់យន្ដហោះដឹកអ្នកដំណើរ Azerbaijan Airlines បន្ទាប់ពី ប្រព័ន្ធការពារដែនអាកាសរុស្ស៉ីត្រូវដាក់ ឱ្យដំណើរដើម្បីបាញ់ទម្លាក់ដ្រូនអ៊ុយក្រែន។
ប៉ុន្តែ លោក ពូទីន និងវិមានក្រឹមឡាំងមិនបានទទួលស្គាល់ថារុស្ស៉ីជាអ្នកបាញ់ទម្លាក់យន្ដហោះនេះនោះទេ ដោយគ្រាន់តែថា សំណុំរឿងព្រហ្មទណ្ឌមួយកំពុងដំណើរការ។

ថ្លែងក្នុងសេចក្ដីថ្លែងការណ៍មួយផ្សាយផ្ទាល់ដោយទូរទស្សន៍រដ្ឋ កាលពីថ្ងៃអាទិត្យ លោក Aliyev បានសង្កត់ធ្ងន់យ៉ាងខ្លីថា «យន្ដហោះរបស់យើងត្រូវបានបាញ់ទម្លាក់ដោយចៃដន្យ»។

ប្រធានាធិបតីរូបនេះបន្តថា យន្ដហោះដឹកអ្នកដំណើរ Azerbaijan Airlines បានដាច់ប្រព័ន្ធ GPS ហើយក្រោយមកបានរងការបាញ់ប្រហារ ខណៈកំពុងហោះទៅក្បែរទីក្រុង Grozny នៃភាគខាងត្បូងប្រទេសរុស្ស៉ី។

គួរបញ្ជាក់ថា យន្ដហោះដឹកអ្នកដំណើរ Azerbaijan Airlines ធុន Embracer 190 ដែលមានជើងហោះហើរ លេខ J2-8243 គឺមានគោលដៅធ្វើដំណើរចេញពីរដ្ឋធានី Baku ឆ្ពោះទៅកាន់ទីក្រុង Grozny ដែលជា រដ្ឋធានីនៃតំបន់ Chechnya របស់ប្រទេសរុស្ស៉ី ប៉ុន្តែវាត្រូវបានបង្ខំឱ្យធ្វើការចុះចតបន្ទាន់ នៅចម្ងាយប្រហែល៣គីឡូម៉ែត្រ ពីទីក្រុង Aktau របស់កាហ្សាក់ស្ថាន។ យន្ដហោះខាងលើ ផ្ទុកអ្នកដំណើរ ៦៧នាក់ និងក្រុមការងារយន្តហោះផ្ទាល់ចំនួន៥នាក់ ហើយបើតាមក្រុមមន្ត្រីកាហ្សាក់ស្ថាន អ្នកដំណើរ ២៩នាក់ នៅរស់រានមានជីវិត៕