ចុងឆ្នាំ២០២៤នេះ គ្រោះថ្នាក់យន្តហោះដ៏គួរឱ្យរន្ធត់ចំនួន២ករណីបង្កជាទុក្ខសោក និងភ្ញាក់ផ្អើលជុំវិញពិភពលោក
ឆ្នាំថ្មីនឹងឈានចូលមកដល់ យ៉ាងណានៅចុងកន្ទុយនៃឆ្នាំ២០២៤នេះ រឿងរ៉ាវសោកនាដកម្មជាច្រើនបានលេចឡើងក្នុងនោះគ្រោះថ្នាក់យន្តហោះដ៏គួរឱ្យរន្ធត់ចំនួន២ករណីបានបង្កជាទុក្ខសោក និងភ្ញាក់ផ្អើលជុំវិញពិភពលោកតែម្ដង។
-ករណីទី១ គឺឧបទ្ទវហេតុផ្លូវអាកាសដ៏សាហាវបំផុតមិនធ្លាប់មាននៅក្នុងប្រទេសកូរ៉េខាងត្បូងបានសម្លាប់មនុស្ស១៧៩ នាក់កាលពីថ្ងៃអាទិត្យទី២៩ ខែធ្នូ នៅពេលដែលយន្តហោះដឹកអ្នកដំណើរមួយគ្រឿងបានរអិលចេញពីផ្លូវរត់ ហើយបានជ្រុលទៅបុកជញ្ជាំងនៅឯអាកាសយានដ្ឋានអន្តរជាតិ Muan។ ក្រសួងដឹកជញ្ជូនរបស់ប្រទេសកូរ៉េខាងត្បូង បានបញ្ជាក់ថា យន្តហោះ Jeju Air ជើងហោះហើរលេខ 7C2216 ដែលមកដល់ពីរដ្ឋធានីបាងកករបស់ប្រទេសថៃ ជាមួយនឹងអ្នកដំណើរ១៧៥ នាក់ និងអ្នកបម្រើការលើយន្តហោះ៦ នាក់នៅលើនោះ បានព្យាយាមចុះចតភ្លាមៗបន្ទាប់ពីម៉ោង៩ ព្រឹក ម៉ោងនៅកូរ៉េខាងត្បូង នៅអាកាសយានដ្ឋាននៅភាគខាងត្បូងនៃប្រទេស។ សមាជិកអ្នកបម្រើការលើយន្តហោះពីរនាក់នៅរស់រានមានជីវិត ហើយកំពុងត្រូវបានព្យាបាលរបួស។
អ្នកនាំពាក្យរាជរដ្ឋាភិបាលថៃ លោក ជីរ៉ាយូ ហឿងស៊ូប (Jirayu Houngsub) បាននិយាយថា ស្ត្រីថៃពីរនាក់នៅលើយន្តហោះនោះមានអាយុ២២ ឆ្នាំ និង៤៥ ឆ្នាំ បានស្លាប់បាត់បង់ជីវិត។ ក្រសួងការបរទេសថៃ បានលើកឡើងនៅក្នុងសេចក្តីថ្លែងការណ៍មួយថា ស្ថានទូតនៅរដ្ឋធានីសេអ៊ូលកំពុងសម្របសម្រួលជាមួយភាគីកូរ៉េខាងត្បូង និងរៀបចំឱ្យសមាជិកគ្រួសារធ្វើដំណើរពីប្រទេសថៃ។ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា បានផ្ញើសាររំលែកទុក្ខដល់ក្រុមគ្រួសារនៃអ្នកស្លាប់ និងរបួសនៅក្នុងការបង្ហោះនៅលើបណ្តាញសង្គម X ដោយនិយាយថា លោកស្រីបានណែនាំក្រសួងការបរទេសឱ្យផ្តល់ជំនួយ។
នេះក៏ជាគ្រោះថ្នាក់ដ៏អាក្រក់បំផុតដែលពាក់ព័ន្ធនឹងក្រុមហ៊ុនអាកាសចរណ៍កូរ៉េខាងត្បូងក្នុងរយៈពេលជិត៣ ទសវត្សរ៍ផងដែរ។ យោងតាមទិន្នន័យរបស់ក្រសួងដឹកជញ្ជូន ការធ្លាក់យន្តហោះនេះគឺគ្រោះថ្នាក់អាក្រក់បំផុតដែលកើតឡើងលើក្រុមហ៊ុនអាកាសចរណ៍កូរ៉េខាងត្បូងចាប់តាំងពីការធ្លាក់យន្តហោះកូរ៉េឆ្នាំ១៩៩៧ នៅកោះហ្គាំ ដែលបានសម្លាប់មនុស្សជាង២០០ នាក់។
ប្រធានាធិបតីស្តីទីកូរ៉េខាងត្បូង លោក ឆយ សាំងម៉ុក (Choi Sang-mok) នៅថ្ងៃចន្ទទី៣០ ខែធ្នូ បានបញ្ជាឱ្យត្រួតពិនិត្យសុវត្ថិភាពជាបន្ទាន់នៃប្រព័ន្ធប្រតិបត្តិការអាកាសចរណ៍របស់ប្រទេសទាំងមូល នៅពេលដែលការងារសង្គ្រោះនៅលើយន្តហោះ Jeju Air ត្រូវបានបញ្ចប់។ លោក ឆយ បានប្រាប់កិច្ចប្រជុំគ្រប់គ្រងគ្រោះមហន្តរាយនៅសេអ៊ូលថា៖«អាទិភាពចម្បងសម្រាប់ពេលនេះគឺការកំណត់អត្តសញ្ញាណជនរងគ្រោះ ការគាំទ្រដល់គ្រួសាររបស់ពួកគេ និងការព្យាបាលអ្នករស់រានមានជីវិតទាំងពីរនាក់»។
-ករណីទី២គឺឧបទ្ទវហេតុយន្តហោះដឹកអ្នកដំណើរមួយគ្រឿង បានធ្លាក់បុកផ្ទប់នឹងដីនៅជិតទីក្រុងអាក់តាអ៊ូ Aktau ក្នុងប្រទេសកាហ្សាក់ស្ថាន កាលពីថ្ងៃពុធទី២៥ធ្នូ ដោយបានសម្លាប់មនុស្ស៣៩នាក់ បន្ទាប់ពីបានហោះប្ដូរទិសដៅគេចចេញពីតំបន់មួយនៃប្រទេសរុស្ស៊ី។ យន្តហោះ Embraer 190 ជើងហោះហើរ J2-8243 មកពីក្រុមហ៊ុនអាកាសចរណ៍ អាស៊ែបៃហ្សង់ អែរឡាញ (Azerbaijan Airlines) បានហោះហើររាប់រយម៉ាយគេចចេញពីផ្លូវ ដែលបានគ្រោងទុករបស់ខ្លួនពីអាស៊ែបៃហ្សង់ ទៅកាន់ប្រទេសរុស្ស៊ី។ ជាអកុសល យន្តហោះក៏បានធ្លាក់នៅជិតច្រាំងសមុទ្ទកាសព្យែន។
ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃសៅរ៍ទី២៨ ខែធ្នូ បានសុំទោសមេដឹកនាំអាស៊ែបៃហ្សង់ ចំពោះអ្វីដែលវិមានក្រឹមឡាំងហៅថា ជា«ឧប្បត្តិហេតុសោកនាដកម្ម» ជុំវិញការធ្លាក់យន្តហោះរបស់ជើងហោះហើរអាស៊ែបៃហ្សង់។ ការសុំទោសជាសាធារណៈដ៏កម្របំផុតពីលោក ពូទីន ហាក់ដូចជាការទទួលយកការស្តីបន្ទោសមួយចំនួនចំពោះសោកនាដកម្មនេះ បើទោះបីជាសេចក្តីថ្លែងការណ៍របស់វិមានក្រឹមឡាំងមិនបានអះអាងថារុស្ស៊ីបានបាញ់ទម្លាក់យន្តហោះនេះក៏ដោយ តែបានកត់សម្គាល់ថាសំណុំរឿងព្រហ្មទណ្ឌត្រូវបានបើក៕
