ក្រសួងសុខាភិបាលកុងហ្គោ ប្រកាសថា ជំងឺមិនស្គាល់អត្តសញ្ញាណពីមុនដែលរីករាលដាលនៅក្នុងខេត្ត Kwango ភាគនិរតី គឺជាទម្រង់ធ្ងន់ធ្ងរនៃជំងឺគ្រុនចាញ់

គីនស្ហាសា៖ ក្រសួងសុខាភិបាល នៃសាធារណរដ្ឋប្រជាធិបតេយ្យកុងហ្គោ បានប្រកាសកាលពីថ្ងៃអង្គារ ទី១៧ ខែធ្នូថា ជំងឺមិនស្គាល់អត្តសញ្ញាណពីមុនដែលរីករាលដាលនៅក្នុងខេត្ត Kwango ភាគនិរតី គឺជាទម្រង់ធ្ងន់ធ្ងរនៃជំងឺគ្រុនចាញ់។

កាលពីដើមខែនេះ អាជ្ញាធរក្នុងតំបន់បង្ហាញថា ជំងឺនេះបានសម្លាប់មនុស្ស ១៤៣នាក់ក្នុងខែវិច្ឆិកា។ រោគសញ្ញានៃជំងឺនេះ គឺក្ដៅខ្លួន ឈឺក្បាល ក្អក ហៀរសំបោរ និងឈឺខ្លួន។

យ៉ាងណា កាលពីថ្ងៃអង្គារ ក្រសួងសុខាភិបាល បានប្រកាសនៅក្នុងសេចក្តីថ្លែងការណ៍មួយថា ទីបំផុតអាថ៌កម្បាំងត្រូវបានស្រាយចេញហើយ។ វាជាករណីជំងឺគ្រុនចាញ់ធ្ងន់ធ្ងរ ក្នុងទម្រង់ជាជំងឺផ្លូវដង្ហើម ដោយបន្ថែមថា កង្វះអាហារូបត្ថម្ភនៅក្នុងតំបន់នេះ បានធ្វើឱ្យប្រជាជនក្នុងតំបន់ចុះខ្សោយ ធ្វើឱ្យពួកគេងាយនឹងកើតជំងឺ។

យោងតាមសេចក្តីថ្លែងការណ៍ ក៏បានបង្ហាញផងដែរថា ករណីឆ្លងចំនួន ៥៩២នាក់ ត្រូវបានរាយការណ៍ចាប់តាំងពីខែតុលា ជាមួយនឹងអត្រាមរណភាព ៦,២ភាគរយ។

រដ្ឋមន្ត្រីសុខាភិបាលប្រចាំខេត្ត Kwango លោក អាប៉ូលីនៀ យូមបា (Apollinaire Yumba) បានប្រាប់ទីភ្នាក់ងារសារព័ត៌មានរ៉យទ័រថា ថ្នាំប្រឆាំងជំងឺគ្រុនចាញ់ផ្តល់ដោយអង្គការសុខភាពពិភពលោក កំពុងត្រូវបានចែកចាយនៅក្នុងមន្ទីរពេទ្យធំ និងមណ្ឌលសុខភាពក្នុងតំបន់។

អ្នកនាំពាក្យរបស់អង្គការសុខភាពពិភពលោក បានឲ្យដឹងថា ឧបករណ៍សុខភាពបន្ថែមទៀតសម្រាប់ករណីកម្រិតមធ្យម និងធ្ងន់ធ្ងរ នឹងត្រូវទៅដល់នៅថ្ងៃពុធ។

ប្រធានអង្គការសុខភាពពិភពលោក លោក តេដ្រូស អាដាណម ហ្គេប្រេយេស៊ូស បាននិយាយកាលពីសប្តាហ៍មុនថា សំណាកដំបូងចំនួន១០ពីអ្នកជំងឺនៅក្នុងប្រទេសកុងហ្គោដែលទទួលរងពីជំងឺអាថ៌កម្បាំង បានធ្វើតេស្តវិជ្ជមានសម្រាប់ជំងឺគ្រុនចាញ់ ប៉ុន្តែលោកមិនបានច្រានចោលនូវលទ្ធភាពដែលថា ពួកគេឈឺជំងឺផ្សេងទៀតដំណាលគ្នានោះទេ។

គួរបញ្ជាក់ថា ជំងឺគ្រុនចាញ់នៅតែសម្លាប់មនុស្សជិត៦សែននាក់ក្នុងមួយឆ្នាំ នៅទូទាំងពិភពលោក ហើយ១២ភាគរយនៃការស្លាប់ទាំងនោះកើតឡើងនៅក្នុងប្រទេសកុងហ្គោ។