រដ្ឋមន្ត្រី ហង់ជួន ណារ៉ុន ជឿជាក់ថា កម្ពុជា-អូស្ត្រាលី បន្តពង្រឹងពង្រីកកិច្ចសហការជាមួយគ្នាបន្ថែមទៀត ក្នុងគោលដៅបន្តអភិវឌ្ឍធនធានមនុស្សកម្ពុជាឱ្យកាន់តែប្រសើរឡើង

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១១ ខែធ្នូ ឆ្នាំ២០២៤ បានអញ្ជើញជាអធិបតី ក្នុងពិធីអបអរសាទរ ខួប៣០ឆ្នាំ នៃកម្មវិធីអាហារូបករណ៍អូស្ត្រាលីនៅកម្ពុជា (Australia Awards Scholarships Program in Cambodia) និងមានការអញ្ជើញចូលរួមពី ឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំនៅកម្ពុជា ឯកឧត្តម លោកជំទាវ ថ្នាក់ដឹកនាំរាជរដ្ឋាភិបាលកម្ពុជា អតីតសិស្សនិស្សិត លោក លោកស្រី ភ្ញៀវជាតិ និងអន្តរជាតិជាតិមកពីបណ្តាស្ថាប័នពាក់ព័ន្ធ។

មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់រដ្ឋាភិបាលអូស្ត្រាលី ចំពោះការផ្តល់នូវអាហារូបករណ៍ដ៏មានសារៈសំខាន់សម្រាប់ប្រជាជនកម្ពុជារយៈពេល៣០ឆ្នាំកន្លងមកនេះ ដែលបានរួមចំណែកអភិវឌ្ឍធនធានមនុស្សកម្ពុជាឱ្យក្លាយជាកម្លាំងចលករដ៏មានសក្ដានុពលក្នុងការចូលរួមអភិវឌ្ឍសង្គមសេដ្ឋកិច្ចកម្ពុជាប្រកបដោយចីរភាព ក៏ដូចជាបានថ្លែងអំណរគុណដល់អតីតនិស្សិតដែលទទួលជោគជ័យក្នុងការសិក្សា ហើយបានយកចំណេះជំនាញត្រឡប់មកអភិវឌ្ឍជាតិមាតុប្រទេសវិញ។

តាមរយៈអាហារូបករណ៍អូស្ត្រាលីបានកសាងសមត្ថភាពបញ្ញវន្តកម្ពុជាជាង ១ពាន់នាក់ ដែលបច្ចុប្បន្ន បាននិងកំពុងដើរតួនាទីយ៉ាងសំខាន់ក្នុងការជំរុញការផ្លាស់ប្ដូរចំណេះដឹងជំនាញ បទពិសោធន៍ វប្បធម៌ ជំរុញឱ្យមានការផ្លាស់ប្តូររវាងប្រជាជននិងប្រជាជននៃប្រទេសទាំងពីរ និងជំរុញសមាហរណកម្មកម្ពុជាទៅក្នុងអាស៊ាន។ ចំពោះឆ្នាំសិក្សា ២០២៥ កម្មវិធីអាហារូបករណ៍អូស្ត្រាលី បានផ្តល់អាហារូបករណ៍សរុបចំនួន ៦២ ដោយរួមមាន ៥៦ សម្រាប់កម្រិត (Master) និង ៦ សម្រាប់កម្រិត(PHD)។

សារជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់សមិទ្ធផលដែលកម្មវិធីអាហារូបករណ៍អូស្ត្រាលីនៅកម្ពុជាសម្រេចបានក្នុងរយៈពេល ៣ទសវត្សរ៍នេះ និងជឿជាក់ថា រដ្ឋាភិបាលអូស្ត្រាលី និងប្រទេសកម្ពុជា បន្តពង្រឹងពង្រីកកិច្ចសហប្រតិបត្តិការជាមួយគ្នាបន្ថែមទៀត ក្នុងគោលដៅបន្តអភិវឌ្ឍធនធានមនុស្សកម្ពុជាឱ្យកាន់តែប្រសើរឡើង ឆ្លើយតបនឹងចក្ខុវិស័យរបស់រាជរដ្ឋាភិបាល៕